1-2. a) Bõe yĩng tɩ tẽn-tʋmd a Poll yeel tɩ nonglmã n yaa kãseng n yɩɩda? b) Sogs-bʋs la d na n leoke?

 TẼN-TƲMD a Poll sẽn wa n gomd tẽebo, saagr la nonglem yellã, a baasa a gomdã n yeel tɩ “sẽn yaa-a kãseng n yɩɩd b sʋkã yaa nonglem.” (1 Kor. 13:13) Bõe yĩng t’a Poll yeel woto? Wakat n wat tɩ d pa na n le yɩ tɩlɛ tɩ d tẽ bũmb nins Wẽnnaam sẽn pʋlem dũni-paalgã wɛɛngẽ wã, wall d saagdẽ tɩ pʋlen-kãens na n pidsame ye. Bala wakat kãng tɩ b fãa zoe n pidsame. La na n yɩɩ tɩlɛ tɩ d ket n nong a Zeova la neb a taabã. Sɩd me, d sẽn nong-b to-to wã pãng na n tara paasgo.

² Sẽn mik tɩ nonglem na n yɩɩ tɩlɛ ne tõnd wakat fãa wã, d na n baoo sogsg a tãab leoore. Pipi, bõe yĩng tɩ d segd n nong taaba? Yiibu, wãn to la d tõe n wilg tɩ d nonga taaba? La tãabo, bõe la d tõe n maan n kell n nong taab wʋsgo?

3. Bõe ne bõe n kɩt tɩ d segd n nong taaba?

³ Bõe yĩng tɩ tar yõod tɩ d nong taaba? Bũmb a ye yaa tɩ yaa nonglmã n wilgd tɩ d yaa kiris-neb hakɩɩka. A Zeezi yeela a tẽn-tʋmdbã yaa: “Yãmb sã n nong taaba, nebã fãa na n bãngame tɩ yãmb yaa mam karen-biisi.” (Zã 13:35) Sẽn paase, d sẽn nong taabã kɩtame  tɩ d zemsd taaba. A Poll yeelame tɩ “nonglem kɩtdame tɩ neb zemsd taab sõma.” (Kolo. 3:14) La bũmb a to me n wilgd tɩ tara yõod tɩ d nong taaba. Tẽn-tʋmd a Zã yeela a tẽed-n-taasã yaa: “Ned ning sẽn nong Wẽnnaam segd n nonga a saam-biig me.” (1 Zã 4:21) D sã n wilgdẽ tɩ d nonga taaba, d wilgdame me tɩ d nonga Wẽnnaam.

4-5. Rɩk-y makr n wilg nong Wẽnnaam ne nong d taabã sẽn tũud taab to-to wã.

⁴ Bõe yĩng tɩ d tõe n yeel tɩ nong Wẽnnaam la nong d tẽed-n-taasã tũuda taaba? D rɩk makr ne d sũurã la d yĩngã wil a taabã sẽn tʋmd ne taab to-to wã. Logtor sã n sɩɩs d nugã sẽn na yɩl n bãng d zɩɩmã sẽn kẽnd to-to wã, a tõe n bãnga bũmb kẽer tõnd sũurã wɛɛngẽ me. Yam-bʋg la d tõe n dɩk mak-kãngã pʋgẽ?

⁵ D tõe n gesa d sẽn nong d taabã to-to wã n bãng d sã n sɩd nonga Wẽnnaam, wa logtor sẽn tõe n ges d zɩɩmã sẽn kẽnd to-to wã n bãng bũmb kẽer d sũurã wɛɛngẽ wã. D sã n yã tɩ d sẽn nong d tẽed-n-taasã to-to wã booga bilfu, tõe n wilgame tɩ d sẽn nong Wẽnnaam to-to wã me boogdame. La d sã n wilgd wakat fãa tɩ d nonga d tẽed-n-taasã, wilgdame tɩ d sẽn nong Wẽnnaam to-to wã tara pãnga.

6. D sẽn nong d tẽed-n-taasã to-to wã sã n boogdẽ, bõe yĩng tɩ yaa yell meng-menga? (1 Zã 4:7-9, 11)

⁶ D sẽn nong d tẽed-n-taasã to-to wã sã n boogdẽ, yaa yell meng-menga. Bõe yĩnga? Tõe n dat n yeelame tɩ tõnd ne a Zeova zoodã pãng boogame. Tẽn-tʋmd a Zã wilga rẽ vẽeneg n yeel yaa: “Ned ning sẽn pa nong a saam-biig a sẽn ne wã pa tõe n nong Wẽnnaam a sẽn pa ne wã ye.” (1 Zã 4:20) Rẽ wilgda tõnd bõe? Wilgdame tɩ yaa d sã n “nong taab” bal la d tat a Zeova yam.—Karm-y 1 Zã 4:7-9, 11.

7-8. Bõe la d tõe n maan n wilg tɩ d nonga taaba?

⁷ Wẽnnaam Gomdã pʋgẽ, b yeta tõnd n yɩlemdẽ tɩ d “nong taaba.” (Zã 15:12, 17; Rom. 13:8; 1 Tes. 4:9; 1 Pɩy. 1:22; 1 Zã 4:11) La nonglem yita sũur pʋgẽ, tɩ ned yaool n pa tõe n bãng sẽn be d sũurẽ ye. Woto wã d maanda wãn tɩ neb a taabã yã tɩ d nong-b lame? Yaa ne d no-goamã, la ne d tʋʋm-tʋmdɩ wã.

⁸ Bũmb toor-toor la d tõe n maan n wilg d tẽed-n-taasã tɩ d nong-b lame. Ad vɛrse-rãmb a wãn d sẽn tõe n tũ: “Togsd-y taab sɩda.” (Zaka. 8:16) ‘Kell-y n zĩnd-y ne taab ne laafɩ.’ (Mark 9:50) “Yɩt-y pipi n waoogd taaba.” (Rom. 12:10) “Bɩ y reegd taab sõma.” (Rom. 15:7) “Bɩ y . . . kõt taab sugri.” (Kolo. 3:13) “Bɩ y ket n tʋkd taab zɩɩbo.” (Gal. 6:2) “Bɩ y ket n belsd taaba.” (1 Tes. 4:18) “Bɩ y ket n . . . paasd taab tẽeb pãnga.” (1 Tes. 5:11) ‘Pʋʋsd-y taab yĩnga.’—Zak 5:16.

9. Bõe yĩng tɩ d sã n belsd d taabã bɩ wilgdẽ tɩ d nong-b lame? (Ges-y fotã me.)

⁹ Bɩ d gom bũmb d sẽn tõe n maan tɩ wilg tɩ d nonga taab yelle, tɩ be sull ning sẽn loogã pʋgẽ. Yaa tẽn-tʋmd a Poll sẽn yeel tɩ d “ket n belsd taabã.” Bõe yĩng tɩ d sã n belsd d taabã bɩ wilgdẽ tɩ d nong-b lame? Sebr a ye sẽn bilgd Biiblã goam võor yeelame tɩ gom-bil ning a Poll sẽn pʋd tɩ b lebg tɩ “belsgã” rat n yeelame tɩ f “zĩnd ne  ned sẽn tar zu-loe-kɛgenga, n keng a raoodo.” D sã n belsd d tẽed-n-taag sẽn namsde, d sõngd-a lame sẽn na yɩl t’a kell n kẽn vɩɩm sẽn kõn sa wã sor zugu. D sã n wa belsd d tẽed-n-taag fãa, d wilgdame tɩ d nong-a lame.—2 Kor. 7:6, 7, 13.

10. Wãn to la nimbãan-zoeerã ne belsgã tũud taaba?

¹⁰ Nimbãan-zoeer la belsg tũuda taab sõma. Wãn to? Ned sẽn tar nimbãan-zoeer belsda a taabã, la a sõngd-b sẽn na yɩl tɩ b maood ne b zu-loeese. Dẽnd d rengd n zoee ned nimbãanega, n yaool n bels-a. Bɩ d ges a Poll sẽn bilg a Zeova nimbãan-zoeerã ne a belsgã sẽn tũud taab to-to wã. A Poll yeelame t’a Zeova yaa “Ba sẽn tar nimbãan-zoeer wʋsgo, la belsg fãa Wẽnnaam.” (2 Kor. 1:3) Vɛrse-kãngã pʋgẽ, tẽn-tʋmd a Poll sẽn yeel tɩ “nimbãan-zoeer wʋsgã” bilgda f sẽn na n kʋmd f taabã. Dẽnd b sẽn yeel tɩ Wẽnnaam yaa “Ba sẽn tar nimbãan-zoeer wʋsgã, wilgdame tɩ nimbãan-zoeerã yita a nengẽ.” Yaa nimbãan-zoeerã n kɩt t’a belsd tõnd d “zu-loeesã fãa pʋgẽ.” (2 Kor. 1:4) Ko-maasg sẽn yit ko-bundg zĩigẽ yiisda ko-yũud sõma. Woto me, a Zeova sigsda neb nins sẽn namsdã sũyã, la a belsd-ba. Nimbãan-zoeerã la d taabã belsgã wɛɛngẽ, wãn to la d tõe n dɩk a Zeova togs-n-taare? Bũmb a ye sẽn tõe n sõng-d yaa d bɩɩs zʋg-sõma sẽn na n kɩt tɩ d rat n bels d taabã. Zʋg-sõma-kãens kẽer la bʋse?

11. Sã n yaa ne Kolos rãmb 3:12 la 1 Pɩyɛɛr 3:8 wã, zʋg-sõma-bʋs la d segd n bɩɩs sẽn na yɩl tɩ sõng-d tɩ d nong d taabã la d belsd-ba?

¹¹ Bõe n tõe n sõng-d tɩ d ket n nong taab la d “ket n belsd taab” daar fãa? D segd n bɩɩsa zʋg-sõma wa nimbãan-zoeere, saam-biir nonglem la maan-neere. (Karm-y Kolos rãmb 3:12; 1 Pɩyɛɛr 3:8.) Wãn to la zʋg-sõma-kãensã na n sõng tõndo? D sã n bɩɩs nimbãan-zoeer la zʋg-sõma a taab sẽn wõnd rẽ, d pa tõe n pa belsd d taabã b sã n wa tar zu-loees ye. Yaa wa a Zeezi sẽn yeelã: “Yaa sũur sẽn pid ne bũmb ningã la noor yiisda. Nin-sõng noor yiisda bõn-sõma, a sũur sẽn pid ne bõn-sõma wã yĩnga.” (Mat. 12:34, 35) D sã n belsd d tẽed-n-taas nins sẽn namsdã, sɩd wilgdame tɩ d nong-b lame.

12. a) Bõe yĩng tɩ d segd n gũus sẽn na yɩl tɩ d sẽn nong d taabã to-to wã ra wa booge? b) Yaa sok-bʋg la d na n leok masã?

¹² D fãa rat n “ket n nonga taaba.” (1 Zã 4:7) La d segd n tẽegame t’a Zeezi yeelame tɩ “neb wʋsg nonglem pãng na n boogame.” (Mat. 24:12) A Zeezi pa yeel tɩ na n yɩɩ woto ne a karen-biis wʋsg ye. Baa ne rẽ, d segd n gũusame tɩ dũniyã nebã nonglmã sẽn boogdã ra mad-d ye. D ning rẽ d yamẽ, la d bao sokr sẽn tar yõod leoore: Bũmb bee d sẽn tõe n maan n bãng d sã n nonga d tẽed-n-taasã sõma bɩ?

13. Bõe n tõe n sõng-d tɩ d bãng d sã n sɩd nonga d tẽed-n-taasã?

¹³ Bũmb a ye d sẽn tõe n maan n bãng d nonglmã sã n tara pãnga, yaa d sẽn na n ges d manesem sẽn yaa to-to yɛl kẽer taoore. (2 Kor. 8:8) Wala makre, tẽn-tʋmd a Pɩyɛɛr yeelame yaa: “Sẽn yɩɩda, bɩ y nong taab wʋsgo,  bala nonglem luta yel-wẽn wʋsgo.” (1 Pɩy. 4:8) D tẽed-n-taag sã n wa tudgi, pa rẽ bɩ n maan bũmb n sãam d sũuri, d manesem sẽn na n yɩ to-to wã tõe n sõng-d lame tɩ d bãng d sã n sɩd nong-a lame.

14. Sã n yaa ne 1 Pɩyɛɛr 4:8 wã, d nonglmã segd n yɩɩ wãn to? Rɩk-y makre.

¹⁴ Bɩ d maag d yĩng n tags a Pɩyɛɛr sẽn yeel bũmb ningã zugu. Vɛrse a 8 wã sɩngrẽ a wilga d nonglmã sẽn segd n yɩ to-to. A yeelame tɩ d “nong taab wʋsgo.” A Pɩyɛɛr sẽn yeel ka tɩ “wʋsgã” võorã meng-meng yaa sẽn “tẽege.” Vɛrse wã babg a yiib-n-soabã wilgda nonglem a woto buudã sẽn tõe n maan bũmb ninga. A luta d tẽed-n-taasã yel-wẽna. Sẽn na yɩl n wʋm rẽ võore, yaa wa d sẽn gãd nonglmã ne nus a yiib wa peend n tẽeg-a sẽn na yɩl n lud d tẽed-n-taasã yel-wẽna. Pa a yembr wall a yiib bal ye. Yaa “yel-wẽn wʋsgo.” B sẽn yeel tɩ lutame wã bilgda f sẽn na n sak n kõt sugri. Nonglmã tõe n luda d tẽed-n-taasã pãn-komsmã, wa peend sẽn tõe n lud rẽgd to-to wã.

15. D sã n nong d tẽed-n-taasã sõma, bõe la d na n tõog n maane? (Kolos rãmbã 3:13)

 ¹⁵ D sẽn nong d taabã to-to wã segd n talla pãnga, hal n kɩt tɩ d tõe n kõ d tẽed-n-taasã sugr b pãn-komsem yĩnga, baa rẽ sã n wa pa nana. (Karm-y Kolos rãmb 3:13.) D sã n tõogd n kõt d taabã sugri, d wilgdame tɩ d nonglmã tara pãnga, la tɩ d rat n nooga a Zeova sũuri. Bõe me n tõe n sõng-d tɩ d ra get d taabã kongrã, wall bũmb nins b sẽn maand tɩ yikd d sũurã?

16-17. Bõe me n tõe n sõng-d tɩ d yĩm d taabã kong-bõonesã? Rɩk-y makre. (Ges-y fotã me.)

¹⁶ Get-y y tẽed-n-taasã zʋg-sõma wã n tɩ yɩɩda, la pa b pãn-komsmã ye. D rɩk makre. Mams-y wa y sẽn na n naag y tẽed-n-taas tɩ y kok pemsem. Y maana bũmb toor-toor sẽn yɩ-y noogo. Baasgẽ wã y yõka foto. Y yõka fot-rãmb a yiib n paase, y sẽn pa mi pipi soabã sã n yaa sõma bɩ pa sõma wã yĩnga. Lebga fot-rãmb a tãab la y sẽn tarã. La y mikame tɩ fot a yembr zugu, saam-biig a ye neng n gãneme. Bõe la y na n maan ne fot-kãnga? Y na n yẽes-a lame, bala y tara fot-rãmb a yiib sẽn yaa sõma tɩ nebã fãa nens be laado, baa saam-bi-kãnga.

¹⁷ D tõe n dɩka fot-rãmb nins d sẽn bĩngdã n mak ne bũmb nins d sẽn tẽr d tẽed-n-taasã zugã. D wae n tẽra bũmb  toor-toor d sẽn naag d tẽed-n-taasã n maan tɩ yɩ-d noogo. La tõe tɩ wakat kãnga, d tẽed-n-taag n maan bũmb tɩ pa yɩ-d noog ye. D na n ket n tẽegda rẽ yell bɩ? D tõe n yĩma rẽ yelle, tɩ yaa wa d sẽn yẽes fot sẽn pa sõma. (Yel. 19:11; Efɛɛ. 4:32) D tõe n yĩma d tẽed-n-taagã kongrã, bala d tẽra bũmb wʋsg d sẽn naag taab n maan tɩ yɩ noogo. Yaa bõn-kãens yell la d pa segd n yĩmi, n tẽegd wakat fãa.

18. Sõs-kãngã pʋgẽ, bõe yell la d gom nonglmã wɛɛngẽ?

¹⁸ Bõe yĩng tɩ d rat n kell n nong taab sõma? D yãame tɩ d sã n wilgdẽ tɩ d nonga d tẽed-n-taasã, d wilgdame tɩ d nonga a Zeova me. Wãn to la d tõe n wilg tɩ d nonga d tẽed-n-taasã? Bũmb a ye d sẽn tõe n maan yaa d sẽn na n belsd-ba. D sã n zoet taab nimbãanega, d na n tõog n ‘ket n belsda taaba.’ Bõe la d tõe n maan n ket n nong taab sõma? Yaa d sẽn na n maand d sẽn tõe fãa n kõt d taabã sugri.

19. Bõe yĩng tɩ tar yõod wʋsg rũndã-rũndã tɩ d wilgdẽ tɩ d nonga taaba?

¹⁹ Bõe yĩng tɩ tar yõod wʋsg rũndã-rũndã tɩ d wilgdẽ tɩ d nonga taaba? Ges-y-yã a Pɩyɛɛr sẽn yeel bũmb ningã: “Bũmb fãa saab kolgame. Woto yĩnga, . . . bɩ y nong taab wʋsgo.” (1 Pɩy. 4:7, 8) Dũni-kãngã saabã sẽn kolgdã, bõe n tõe n maane? A Zeezi pĩnd n yeela a karen-biisã yaa: “Buud toɛy-toɛyã fãa na n kisga yãmb mam yʋʋrã yĩnga.” (Mat. 24:9) Sẽn na yɩl n kell n maan sɩd ne a Zeova baa ne b sẽn na n kisg-dã, yaa tɩlɛ tɩ d zemsd taaba. D sã n nong d tẽed-n-taasã, a Sʋɩtãan pa na n tol n tõog n welg tõnd ye. Bala “nonglem kɩtdame tɩ neb zemsd taab sõma.”—Kolo. 3:14; Fili. 2:1, 2.