1. Koɛɛg ning a Ezayi sẽn taas Israyɛll nebã la bʋgo?

 NO-RƐƐS a Ezayi yeelame t’a Zeova yaa “sɩdã Wẽnnaam.” Gom-bil ning b sẽn lebg tɩ “sɩdã” võorã meng-meng yaa “ãmiina.” (Eza. 65:16, notã.) “Ãmiina” rat n yeelame tɩ “bɩ a yɩ woto,” wall “hakɩɩka.” Biiblã pʋgẽ, b sã n wa pʋd gom-bil ning sẽn “ãmiina” wã n gomd a Zeova bɩ a Zeezi yelle, rat n yeelame tɩ bũmb ning fãa b sẽn maan wall b sẽn yeel yaa sɩda. Rẽnd koɛɛg ning a Ezayi sẽn taas Israyɛll nebã yaa vẽenega. Yaa tɩ d tõe n basa d yam ne a Zeova sẽn pĩnd n togs fãa. Sɩd me, a pidsda a pʋleng fãa.

2. Bõe yĩng tɩ d tõe n bas d yam tɩ bũmb nins a Zeova sẽn pʋlmã na n pidsame, la sogs-bʋs la d na n leoke?

² D tõe n basa d yam woto me ne a Zeova sẽn pʋlem tɩ watame wã bɩ? Na maan yʋʋm kobs-nii a Ezayi wakatã poore, tẽn-tʋmd a Poll wilga bũmb ning sẽn kɩt tɩ d tõe n bas d yam ne Wẽnnaam pʋlemsã fãa wã. A yeelame: “Wẽnnaam pa tõe n yag ziri ye.” (Ebre. 6:18) Mams-y n ges-y-yã: Ko-bundg zĩig sã n yiisd ko-noogo, a pa tõe n yiisd yamsem koom me ye. Woto me, sɩdã sẽn yit a Zeova nengẽ wã, ziri me pa tõe n yi a nengẽ ye. Rẽnd d tõe n basa d yam ne bũmb ning fãa a Zeova sẽn yeele. Wala makre, bũmb nins fãa a sẽn pʋlem tɩ watame wã. Ad sogsg d sẽn na n leok sõs-kãngã pʋgẽ: Bõe la a Zeova pʋlem t’a na n kõ-d lame? Bõe la a Zeova maan tɩ wilgdẽ t’a pʋlemsã na n pidsame?

3. a) Pʋlen-bʋg la Wẽnnaam nin-buiidã nong wʋsgo? (Vẽnegre 21:3, 4) b) D sã n mi n taas neb kẽer pʋlen-kãngã, b manesem yaa wãna?

³ Wẽnnaam nin-buiidã sẽn be dũniyã gill zugã nonga pʋleng ning yell d sẽn na n gomã sõma. (Karm-y Vẽnegr 21:3, 4.) A Zeova pʋlmame tɩ wakat n wat tɩ “kũum pa na n le zĩndi, sũ-sãanga, yãbr wall toog pa na n le zĩnd ye.” D wʋsg sã n wa moond koɛɛgã, d nong n karemda Biiblã vɛrse-kãensã sẽn wilgd vɩɩmã sẽn na n yɩ to-to arzãnã pʋgẽ wã. D sã n wa karem pʋlen-kãngã tɩ neb kẽer kelge, b manesem yaa wãna? Tõe tɩ b mi n sokame yaa: “Bõn-kãensã tõe n pidsame waare?”

4. a) A Zeova sẽn wa n pʋlem tɩ arzãn n watã, bõe la a ra mi tõnd wakatã wɛɛngẽ? b) Pʋlengã sẽn yãk a toogo, bõe me la a Zeova maan-yã?

⁴ A Zeova sẽn wa n vẽneg tẽn-tʋmd a Zã t’a gʋls vɩɩmã sẽn na n yɩ to-to arzãnã pʋgẽ wã, a ra miime tɩ d sã n wa moond Rĩungã koɛɛgã rũndã-rũndã, d na n gomda pʋlen-kãng yelle. A ra miime me tɩ neb wʋsg na n gesame tɩ yaa toog tɩ b tẽ a sẽn pʋlem tɩ “bõn-paals” n watã. (Eza. 42:9; 60:2; 2 Kor. 4:3, 4) Woto wã, bõe n tõe n sõng tõnd mengã la neb a taabã, tɩ d kɩs sɩd tɩ bark nins yell b sẽn gomd Vẽnegr 21:3, 4 na n pidsame? A Zeova pa pʋlem pʋlen-no-kãensã bal ye. A wilga bũmb toor-toor sẽn tõe n kɩt tɩ d bas d yam tɩ na n pidsame. Bõn-kãens la bʋse?

5. Vɛrse-bʋs n kɩt tɩ d tõe n kɩs sɩd tɩ Wẽnnaam sẽn pʋlem bũmb ningã na n pidsame, la bõe la b yet be?

⁵ Vɛrse nins sẽn pʋgdã wilgda bũmb ning sẽn kɩt tɩ d tõe n kɩs sɩd t’a Zeova sẽn pʋlem arzãnã wɛɛngẽ wã na n pidsame. Be, b yeelame yaa: “Sẽn zao-a geerã yeelame: ‘Ade! Mam maanda bũmbã fãa paalse.’ A paasame: ‘Gʋlse, bala gom-kãensã yaa sɩda, n yaa goam b sẽn tõe n tẽ.’ A le yeela maam yaa: ‘Gom-kãensã pidsame! Mam yaa Alfa la Omega, rat n yeel tɩ sɩngrã la baasgã.’”—Vẽn. 21:5, 6a.

6. Bõe yĩng tɩ goam nins sẽn be Vẽnegr 21:5, 6 kɩt tɩ d maneg n kɩs sɩd tɩ Wẽnnaam pʋlengã na n pidsame?

⁶ Bõe yĩng tɩ Biiblã vɛrse-kãensã kɩt tɩ d maneg n kɩs sɩd ne Wẽnnaam pʋlengã? Révélation: dénouement sebrã goma vɛrse-kãensã yell n yeel yaa: “Yaa wa a Zeova mengã sẽn tik a nug n na n wilg neb nins sẽn maand sɩdã tɩ bark nins sẽn watã yaa waaziba.” b Wẽnnaam sẽn pʋlem bũmb ningã bee Vẽnegr 21:3, 4. D tõe n yeelame tɩ goam nins sẽn be vɛrse a 5 ne a 6 yaa a nug-tikri, n wilgdẽ tɩ bũmb ning a sẽn pʋlmã sɩd na n pidsame. D ges bũmb ning a Zeova sẽn yeel sẽn na yɩl tɩ d kɩs sɩd ne rẽ wã.

7. Vẽnegr 21:5 wã pʋgẽ, ãnda n gomda, la bõe yĩng tɩ rẽ tar yõod wʋsgo?

⁷ Vɛrse a nu wã sɩngrẽ, b yeelame yaa: “Sẽn zao-a geerã yeelame.” (Vẽn. 21:5a) Gom-kãensã tara yõod wʋsgo, bala Vẽnegr sebrã pʋgẽ, naoor a tãab bal la a Zeova gom-yã. A ye la woto. Dẽnd pa malɛk sẽn tar pãnga, wall a Zeezi n togs gom-kãensã ye. Yaa a Zeova meng a toore. Rẽ wilgdame tɩ d tõe n basa d yam tɩ bũmb ning a sẽn yeelã na n pidsame. Bõe yĩng tɩ d tõe n yeel woto? Bala a Zeova “pa tõe n yag ziri” ye. (Tɩt 1:2) Gom-kãensã kɩtame tɩ d tõe n bas d yam zãng-zãng ne bũmb ning sẽn be Vẽnegr 21:5, 6.

8. Wãn to la a Zeova wilg t’a pʋlengã pidsg yaa waaziba? (Ezayi 46:10)

⁸ Masã, d gom gom-bil ning sẽn yaa “Ade!” wã yelle. (Vẽn. 21:5) Vẽnegr sebrã pʋgẽ, b pʋda Gɛrk gom-bil ning b sẽn lebg tɩ “Ade!” wã naoor wʋsgo. Sebr a yembr wilgame tɩ b sẽn yeel woto wã, “yaa sẽn na yɩl tɩ sẽn karemd-a wã maag a yĩng n karem sẽn pʋgdã.” Vɛrse wã pʋgẽ, bõe n pʋgd gom-bil ning sẽn yaa “Ade!” wã? Wẽnnaam yeelame: “Mam maanda bũmbã fãa paalse.” Sɩd-sɩda, yaa bũmb sẽn wat yell la a Zeova ra gomda. La ne yẽ, yaa bũmb sẽn yaa waaziba, hal t’a gomd rẽ yell wa zoe n maandame.—Karm-y Ezayi 46:10.

9. a) A Zeova sẽn yeel t’a “maanda bũmbã fãa paalsã” wilgda bũmb a yiib a sẽn na n maane. Bãmb la bʋse? b) Bõe n na n paam “saasã” la “tẽngã” sẽn be masã wã?

⁹ D gom bũmb ning b sẽn yeel rẽ poor Vẽnegr 21:5 pʋgẽ wã yelle. Be, a Zeova yeelame t’a “maanda bũmbã fãa paalse.” Woto rat n yeelame tɩ bõe? Biiblã sag-kãngã pʋgẽ, gom-kãensã wilgda bũmb a yiib a Zeova sẽn maande. Yaa toeengo, la lebs n manege. Pipi, bõe la a Zeova na n toeeme? Vẽnegr 21:1 wã pʋgẽ, b yetame: “Pĩnd saasã ne pĩnd tẽngã loogame.” “Pĩnd saasã” makda ninsaalbã goosneema-rãmbã sẽn be a Sʋɩtãan ne a zĩn-dãmbã nugẽ wã. (Mat. 4:8, 9; 1 Zã 5:19) Biiblã pʋgẽ b sã n gomd “tẽng” yelle, tõe n makda dũniyã nebã. (Sɩng. 11:1; Yɩɩn. 96:1) Dẽnd “pĩnd tẽngã” makda rũndã-rũndã dũniyã neb sẽn yaa nin-wẽnsã. A Zeova pa na n maneg “saasã” la “tẽngã” sẽn be rũndã-rũndã wã ye. A na n toeem-b-la zãng fasɩ. A na n ledg-b-la ne “sa-paalg la tẽn-paalga,” rat n yeel tɩ goosneema-paall n na n dɩ naam nin-tɩrs zutu.

10. Bõe la a Zeova na n maan tɩ lebg paalse?

¹⁰ Vẽnegr 21:5 wã pʋgẽ, d yãta a Zeova sẽn yeel bũmb nins a sẽn na n maan tɩ lebg paalsã wɛɛngẽ wã. A Zeova pa yeel t’a “maanda bõn-paals” ye. A yeelame yaa: “Mam maanda bũmbã fãa paalse.” A Zeova na n kɩtame tɩ tẽngã la ninsaalbã zems zãnga, n lebg wa paalse. A Zeova na n kɩtame tɩ tẽngã gill lebg neer wa Edɛn zẽedã sẽn da yaa to-to wã, wa a Ezayi sẽn da pĩnd n togsã. A na n kɩtame tɩ tõnd me lebg paalse, rat n yeel t’a na n sãooga d bãasã fãa. Põya, zoens la wʋms na n paama laafɩ. Baa kũum meng na n vʋʋgame.—Eza. 25:8; 35:1-7.

11. A Zeova yeela a Zã t’a maan bõe, la bõe yĩnga?

¹¹ Bõe me la a Wẽnnaam yeel tɩ kɩt tɩ d tõe n bas d yam ne a pʋlengã? A Zeova yeela a Zã yaa: “Gʋlse, bala gom-kãensã yaa sɩda.” (Vẽn. 21:5) A Zeova pa yeel a Zã t’a “gʋls” bal ye. A yeel-a-la bũmb ning sẽn kɩt t’a segd n gʋlsã me. A yeelame: “Bala gom-kãensã yaa sɩda, n yaa goam b sẽn tõe n tẽ.” Rat n yeelame tɩ d tõe n basa d yam tɩ Wẽnnaam goamã yaa sɩda, la tɩ d tõe n teeg-a lame. D sũur yaa noog a Zã sẽn sak a Zeova sẽn yeelã n “gʋlsã.” Rẽ kɩtame tɩ d tõe n karem Wẽnnaam sẽn pʋlem arzãnã wɛɛngẽ wã, la d bʋgs bõn-sõma nins sẽn watã zugu.

12. Bõe yĩng t’a Zeova tõe n yeel tɩ “gom-kãensã pidsame!”

¹² Bõe la Wẽnnaam yeel rẽ poore? A yeelame: “Gom-kãensã pidsame!” (Vẽn.  21:6) Masã, a Zeova gomda bũmb ning a sẽn pʋlem arzãnã wɛɛngẽ wã yell tɩ yaa wa zoe n maaname. A tõe n sɩd goma woto, bala bũmb pa tõe n gɩdg-a t’a pa pids a raabã ye. Rẽ poore, a Zeova yeela bũmb a to sẽn kɩt tɩ d tõe n bas d yam t’a pʋlemsã pidsg yaa waaziba. Yaa bõe la rẽ?

13. Bõe yĩng t’a Zeova yeel t’a “yaa Alfa la Omega”?

¹³ Vẽnegr nins a Zã sẽn paamã pʋgẽ, a Zeova mengã goma naoor a tãab wa d sẽn yã tɩ loogã. (Vẽn. 1:8; 21:5, 6; 22:13) Naoor a tãabã fãa a Zeova sẽn gomã, a yeelame yaa: “Mam yaa Alfa la Omega.” Alfa wã yaa Gɛrkã gʋls-biisã pipi soabã, tɩ Omega wã yaa yaoolem soabã. A Zeova sẽn yeel t’a “yaa Alfa la Omega” wã, wilgdame t’a sã n sɩng bũmbu, a tõogd n maan-a lame n baase.

14. a) Rɩk-y makr n wilg wakat sẽn yaa wa a Zeova yeelame tɩ “Alfa,” la wakat sẽn yaa wa a na n yeelame tɩ “Omega.” b) Bõe n be Sɩngr 2:1-3 n wilgdẽ t’a Zeova pʋlemsã na n pidsame?

¹⁴ A Zeova sẽn naan a Ãdem ne a Awa wã poore, a wilga a raabã sẽn yaa a soab ne ninsaalbã la tẽngã. Biiblã yetame yaa: “Wẽnnaam ning-b-la barka, la a yeel-ba: ‘Bɩ y rog kamb n lebg wʋsgo, n pid tẽngã la y soog-a.’” (Sɩng. 1:28) Wakat kãnga, yaa wa a Zeova sẽn yeel tɩ “Alfa.” A wilga a raabã vẽenega. Wakat n wat t’a Ãdem ne a Awa yagens sẽn zems zãng la sẽn yaa sakdb na n pid tẽngã n kɩt t’a lebg arzãna. Wakat kãng sã n wa ta, na n yɩɩ wa a Zeova sẽn yeel tɩ “Omega.” A Zeova sẽn naan “saasã ne tẽngã la bũmb nins fãa sẽn be b pʋsẽ wã n sa” wã, a wilga bũmb sẽn kɩt tɩ d tõe n bas d yam ne a pʋlemsã. Rẽ bee Sɩngr 2:1-3 pʋgẽ. (Karm-y-yã.)  A Zeova welga rasem a yopoe-n-soabã t’a yaa sõng a nifẽ. Woto rat n yeelame tɩ bõe? Wilgdame tɩ d tõe n basa d yam t’a Zeova na n pidsa a raabã ne ninsaalbã la tẽngã. Rẽ na n pidsa zãng rasem a yopoe-n-soabã baasgẽ.

15. Bõe yĩng tɩ ra yaa wa a Sʋɩtãan toeema a Zeova raabã sẽn yaa a soab ne ninsaalbã?

¹⁵ A Ãdem ne a Awa sẽn kɩɩs a Zeova wã poore b lebga yel-wẽn-maandba, tɩ kɩt tɩ b kambã la b yagensã me lebg yel-wẽn-maandb la kiidba. (Rom. 5:12) Rẽ kɩtame tɩ yaa wa a Sʋɩtãan toeema a Zeova raabã sẽn yaa tẽngã na pid ne neb sẽn zems zãng la sẽn yaa sakdbã. Wõnda wa a Sʋɩtãan kɩtame t’a Zeova pa tol n tõe n yeel tɩ “Omega” ye. Tõe t’a Sʋɩtãan tagsame t’a Zeova pa na n tõog n pids a raabã ye. Bũmb a ye a Zeova sẽn da tõe n maan yaa a kʋ a Ãdem ne a Awa, la a lebs n naan pag ne rao sẽn zems zãnga, sẽn na yɩl n pids a raabã ne ninsaalbã. La a sã n da maan woto, a Sʋɩtãan ra na n yeelame t’a Zeova yaa pʋ-yagda. Bõe yĩnga? Bala Sɩngr 1:28 wã pʋgẽ, a Zeova yeela a Ãdem ne a Awa tɩ b kambã la b yagensã na n pida tẽngã.

16. Bõe n da tõe n kɩt t’a Sʋɩtãan yeel t’a Zeova pa pidsd a pʋlenga?

¹⁶ Tõe t’a Sʋɩtãan tagsame t’a Zeova ra tõe n maana bõe me? Tõe t’a tagsame t’a Zeova na n basame t’a Ãdem ne a Awa kell n dog kamb sẽn pa na n tol n wa zems zãng ye. (Koɛ. 7:20; Rom. 3:23) Woto, yaa vẽeneg t’a Sʋɩtãan na n yeelame t’a Zeova pa tõe n pids a pʋleng ye. Bõe yĩnga? Bala rẽ ra na n kɩtame tɩ Wẽnnaam daabã sẽn yaa tɩ tẽngã lebg arzãna, n pid ne a Ãdem la a Awa yagens sẽn zems zãng la sẽn yaa sakdbã pa tol n pids ye.

17. Bõe la a Zeova maan n welg a Sʋɩtãan ne a Ãdem la a Awa kɩɩsgã, la rẽ na n waa ne bark-bʋse? (Ges-y fotã me.)

¹⁷ A Zeova sẽn welg a Sʋɩtãan ne a Ãdem la a Awa kɩɩsgã to-to wã yɩɩga a Sʋɩtãan sẽn da tõe n mamsã. (Yɩɩn. 92:5) A Zeova basame t’a Ãdem ne a Awa rog kamba, sẽn na yɩl n wilg t’a yaa sɩd soaba, la t’a pa pʋ-yagd ye. A wilgame tɩ bũmb pa tõe n kɩt t’a sẽn yeel pa pids ye. A pa toeem a raabã ye. A yãka “yageng” sẽn na n fãag a Ãdem ne a Awa kamb la b yagens nins sẽn na n yɩ sakdbã. (Sɩng. 3:15; 22:18) A Zeova  sẽn kɩt t’a Zeezi wa ki tɩ yɩ maoongã segd n linga a Sʋɩtãan wʋsgo. Bõe yĩnga? Bala a Zeova sẽn maan bũmb ningã tika nonglem-kãseng zugu. (Mat. 20:28; Zã 3:16) A Sʋɩtãan sẽn yaa rat-m-ye soabã pa tar zʋg-kãng ye. A Zeezi sẽn ki tɩ yɩ maoongã na n waa ne bark-bʋse? Kiristã naam sẽn na n kaoos yʋʋm tusrã poore, a Ãdem ne a Awa yagens sẽn zems zãng la sẽn yaa sakdb n na n soog tẽngã sẽn na n lebg arzãnã, wa a Zeova sẽn da rat sɩngrẽ wã. Wakat kãnga, na n yɩɩ wa a Zeova sẽn yeel tɩ “Omega.”

18. Bũmb a tãab n kɩt tɩ d tõe n bas d yam tɩ Wẽnnaam pʋlemsã na n pidsame. Bãmb la bʋse? (Ges-y zĩ-gũbr ning gom-zug sẽn yaa: “ Bũmb a tãab sẽn kɩt tɩ d tõe n bas d yam t’a Zeova pʋlemsã na n pidsame.”)

¹⁸ Sõs-kãngã pʋgẽ d yãa bũmb wʋsg sẽn tõe n kɩt tɩ d bas d yam t’a Zeova sẽn pʋlem tɩ tẽngã na n wa lebga arzãnã na n pidsame. D sã n wa seg ned sẽn maand sãmbs rẽ wɛɛngẽ, bõe la d tõe n yeel-a? Pipi, d tõe n wilg-a lame tɩ yaa a Zeova mengã n pʋlme. Vẽnegr sebrã yetame: “Sẽn zao-a geerã yeelame: ‘Ade! Mam maanda bũmbã fãa paalse.’” A tara yam la pãng n tõe n maan dẽ, la a rat me n maand dẽ. Yiibu, a Zeova pʋlengã pidsg yaa waaziba, hal t’a nifẽ yaa wa zoe n pidsame. Rẽ n so t’a yeel yaa: “Gom-kãensã yaa sɩda. . . . Gom-kãensã pidsame!” Tãabo, a Zeova sã n sɩng bũmbu, a tõogd n maan-a lame n baase. Rẽ n so t’a yeel yaa: “Mam yaa Alfa la Omega.” A Zeova na n wilgame t’a Sʋɩtãan yaa pʋ-yagda, la t’a pa tõe t’a pa pids a raab ye.

19. Ned sã n wa maand sãmbs ne bũmb nins Wẽnnaam sẽn pʋlem arzãnã wɛɛngẽ wã, bõe la d tõe n yeel a soaba?

¹⁹ Tẽeg-y tɩ y sã n wa moond koɛɛgã n gomd bũmb ning a Zeova sẽn maan tɩ kɩt tɩ d kɩs sɩd ne a pʋlemsã yelle, paasda yãmb mengã tẽebã pãnga. Woto wã, y sã n karem bũmb ning a Zeova sẽn pʋlem arzãnã sẽn watã wɛɛngẽ tɩ be Vẽnegr 21:4 pʋgẽ wã tɩ ned sok yaa: “Bõn-kãensã tõe n pidsame waare?” Y na n leoka a soab tɩ bõe? Y tõe n karma vɛrse a 5 ne a 6 la y wilg-a b võore? Wilg-y bũmb ning a Zeova sẽn maane, tɩ yaa wa a sẽn tik a nug tɩ kɩt tɩ d tõe n bas d yam t’a pʋlemsã na n pidsame wã.—Eza. 65:16.