A Hulda tõog n paama a sẽn da ratã
SAAM-BI-POGS a tãab n be Ẽndonezi ko-sʋk tẽn-bil ning b sẽn boond tɩ Sãngiir Besaarã. Yʋʋm a wãn sẽn looge, b ra naaga taab n tʋmd mogrã noore. Ko-sʋk tẽn-kãng pʋgẽ, neb wʋsg mii saam-bi-pog-kãensã, b sẽn moond koɛɛgã n sõngd nebã tɩ b wʋmd Biiblã võorã yĩnga. La mogrã noorã, b ra tʋmda tʋʋm sẽn yaa toor fasɩ.
Sãngiir Besaar ko-sʋk tẽngã sẽn be Ẽndonezi rɩtg sẽnesã
Pipi, b kẽeda koomẽ wã n gẽes kug-bɛd n tʋk n yiis mogrã noore. Kug kẽer bedrem taa balle. Rẽ poore, b zombda goeen-bõones n tall magto n wã kugã tɩ lebg bõones n pa ta gɛl ye. B wʋkda kugã n ning so-sũud pʋgẽ n tall n tɩ rʋ rʋʋdg n kuil b zagsẽ wã. B suiida kugã yon-bɛd pʋsẽ, tɩ b wa wʋk ne mobil-bɛd n tar n manegd soayã.
A Hulda sẽn wʋkd kug mogrã noore
Saam-bi-pog-kãensã a ye yʋʋr la a Hulda. A yɛlã sẽn da yaa to-to wã kɩtame t’a ra tõe n tʋm n kaoos n yɩɩd a taabã. A ra rɩkda ligd ning a sẽn paamdã n get a zakã rãmb yelle. La masã a ra rata bũmb a to me. A ra rata tablɛt sẽn na yɩl n tõog n ning JW Library® aplikasiyõ wã. A Hulda ra miime tɩ video-rãmbã, la bũmb a taabã sẽn be aplikasiyõ wã pʋgẽ wã tõe n paasa a koe-moonegã sõmblem, la sõng t’a maneg n wʋm Biiblã goam võor sõma.
A Hulda tʋma lɛɛr a yiib daar fãa yibeoog n maan kiuug la pʋɩ-sʋka, n wã kug hal n pids kamiyõ-bila. A wa n paama ligd sẽn sek a na ra tablɛtã.
A Hulda sẽn zãad a tablɛtã
A Hulda yeelame: “Baa ne kugã wãab sẽn kɩt tɩ m ya tɩ toog me ra tar-mã, m sẽn wa n sɩng tablɛtã tall-n-tʋmã, n neẽ tɩ paasda m koɛɛgã mooneg sõmblem, la tɩ kɩtdame tɩ tigissã seglg yaa nana wã, m yĩma rẽ fãa.” A paasame tɩ tablɛtã sõng-a-la koronaviriisã bã-loangdgã sɩngrẽ. Tablɛtã sõng-a lame t’a tõog n naag tigingã neb a taabã n maan tigissã, la a moon koɛɛgã. D sũur nooma a Hulda sẽn tõog n paam bũmb ning a sẽn da ratã.
