1. D kɩsa sɩd ne bõe, la bõe yĩnga?

 YÃMB sã n get yɛlã sẽn yaa to-to dũniyã gill zugã, yaa toog ne-y tɩ y tẽ tɩ manegr n wat bɩ? Zagsã pʋsẽ, nebã pa le nong taab wa pĩndã ye. Neb wʋsg lebgda nen-kɛglem dãmba, la rat-m-yembr dãmba. Yaa toog ne neb wʋsg tɩ b kɩs b taoor dãmbã sɩda. La yel-kãensã fãa tõe n sõng-y lame tɩ y bas y yam tɩ manegr n wate. Bõe yĩng tɩ d yet woto? Bala nebã yel-manesmã sẽn yaa to-to wã kell n zemsa ne b sẽn da pĩnd n togs Biiblã pʋgẽ tɩ na n yɩɩ to-to “yaoolem wakatã.” (2 Tɩm. 3:1-5) Yaa bãngr-gomd sẽn pidsd kɛpɩ tɩ ned ka tõe n kɩɩs ye. Leb n yaa kaset t’a Zeezi Kirist lebga Wẽnnaam Rĩungã rĩma. Pa bãngr-gom-kãngã bal n gomd Wẽnnaam Rĩungã yell ye. A taab me n be. D sã n lebg n ges bãngr-goam a taab sẽn paamd pidsg yʋʋma noorã, na n paasa d tẽebã pãnga.

2. Bõe yell la d na n gom sõs-kãngã pʋgẽ, la bõe yĩnga? (Gom-y sebrã pipi neng fotã yelle.)

² Sõs-kãngã pʋgẽ, d na n yãa 1) bãngr-gomd sẽn sõngd tõnd tɩ d bãng Wẽnnaam Rĩungã sẽn lugl wakat ninga, 2) bãngr-goam sẽn wilgd t’a Zeezi sẽn yaa Wẽnnaam Rĩungã rĩmã sɩnga naam dɩɩb saasẽ, la 3) bãngr-goam sẽn wilgd Wẽnnaam Rĩungã bɛɛbã baasg sẽn na n yɩ to-to. D na n yãame tɩ bãngr-gom-kãensã yekda taaba, la tɩ wakat ning a Zeova sẽn yãk n na n welg yɛlã ta n saame.

3. Bãngr-gomd ning sẽn be Dãniyɛll 7:13, 14 sõngda tõnd tɩ d bãng bõe Wẽnnaam Rĩungã rĩmã zugu?

³ Bãngr-gomd ning sẽn be Dãniyɛll 7:13, 14 wilgdame t’a Zeezi Kirist na n yɩɩ Wẽnnaam Rĩungã rĩma, la t’a na n yɩɩ rĩm sẽn ka to. Buud toɛy-toɛy neb na n tʋma yẽ yĩng ne sũ-noogo, la rĩm baa a ye pa na n tol n ledg-a ye. Bãngr-gomd a to sẽn be Dãniyɛll sebrã pʋgẽ pĩnd n togsame t’a Zeezi na n lebga Wẽnnaam Rĩungã rĩm yʋʋm a yopoe baasgẽ. Rẽ yĩnga, d tõe n bãnga wakat ning a Zeezi sẽn lebg rĩmã bɩ?

4. Wãn to la Dãniyɛll 4:7-14 sõngd tõnd tɩ d bãng wakat ning Kiristã sẽn lebg Wẽnnaam Rĩungã rĩmã? (Ges-y tẽngr notã me.)

⁴ Karm-y Dãniyɛll 4:7-14. “Yʋʋm a yopoe” wã yell b sẽn gomd ka wã kaoosda yʋʋm 2 520. Yʋʋm-kãensã sõdg sɩnga yʋʋmd 607 sẽn deng a Zeezi rogmã, wakat ning Babilon nebã sẽn wa n sik yaoolem rĩm ning sẽn da rɩt naam Zerizalɛm a Zeova yʋʋr yĩngã a naamẽ wã. Baasa yʋʋmd 1914, wakat ning a Zeova sẽn kɩt t’a Zeezi lebg a Rĩungã rĩmã, la soab ning sẽn na n kao bʋʋdã. *—Eze. 21:30-32.

5. Bãngr-gomd ning sẽn gomd “yʋʋm a yopoe” yellã sõngda tõnd tɩ d bãng bõe?

⁵ Wãn to la bãngr-gom-kãngã nafd tõndo? D sã n wʋmd bãngr-gomd ning sẽn gomd “yʋʋm a yopoe” wã võor sõma, sõngda tõnd tɩ d maneg n kɩs sɩd t’a Zeova pidsda a sẽn yeel fãa tɩ zemsd a wakate. Wala a Zeova sẽn yãk wakat takɩ n sɩd lugl a Rĩungã, woto me, a na n gesame tɩ bãngr-goam a taabã fãa pids tɩ zems a wakate. Dẽnd a Zeova daarã “ka na n vaal n ka pids ye.”—Hab. 2:3.

6. a) Bõe n maand tẽngã zugu, tɩ wilgdẽ tɩ Kiristã sɩnga naam dɩɩb saasẽ? b) Wãn to la Vẽnegr 6:2-8 bãngr-gomdã wilgd tɩ Kiristã sɩnga naam dɩɩb saasẽ?

⁶ A Zeezi koe-moonegã sẽn wa n debd a saabẽ, a togsa yɛl sẽn na n zĩndi, sẽn na n sõng a karen-biisã tɩ b bãng t’a sɩnga naam dɩɩb saasẽ. Wala makre, a goma zaba, kom, la tẽn-digimdg yelle. A goma bã-longds sẽn na n ‘zĩnd zĩig-zĩig’ me yelle, wala koronaviriisã bã-longdgã. Woto fãa naaga yɛl nins Biiblã sẽn yeel tɩ na n yɩɩ “bãnd” sẽn wilgd tɩ Kirist waame wã. (Mat. 24:3, 7; Luk 21:7, 10, 11) A Zeezi sẽn vʋʋg n leb saasẽ wã, sẽn yɩɩd yʋʋm 60 poore, a vẽnega tẽn-tʋmd a Zã bũmb kẽere, sẽn wilgd tɩ yel-kãensã na n pidsdame. (Karm-y Vẽnegr 6:2-8.) Yel-kãensã fãa sɩd sɩnga pidsg a Zeezi sẽn lebg Wẽnnaam Rĩungã rĩm yʋʋmd 1914 tɛka.

7. Bõe yĩng t’a Zeezi sẽn sɩng naamã rɩɩb tɛka, toog be tẽngã zugu?

⁷ A Zeezi sẽn lebg rĩmã tɛka, bõe yĩng tɩ yɛlã maneg n keng dũniyã zugu? Vẽnegr 6:2 togsda bũmb rẽ wɛɛngẽ. B wilgame t’a Zeezi sẽn lebg rĩmã tɛka, pipi bũmb a sẽn maane, yaa a sẽn sɩng zabre. Ne ãnd la a zab-yã? A zaba ne a Sʋɩtãan la ne a zĩn-dãmbã. Vẽnegr sak 12 wilgdame t’a tõoga a Sʋɩtãana, n lob yẽ ne a zĩn-dãmbã tẽngã zugu. A Sʋɩtãan sũurã puuga wʋsgo, t’a zabd ne ãdem- biisã. Woto kɩtame tɩ ‘toog be tẽngã zugu.’—Vẽn. 12:7-12.

8. D sẽn ne bãngr-goam nins sẽn gomd Wẽnnaam Rĩungã yellã sẽn paamd pidsgã, wãn to la rẽ nafd tõndo?

⁸ Wãn to la bãngr-gom-kãensã tõe n naf-do? Yɛl nins sẽn na n maan duniyã gill zugã, la nebã yel-manesem sẽn na n lebg to-to wã na n sõngame tɩ d bãng t’a Zeezi lebga rĩma. Dẽnd d pa segd n yik d sũuri, nebã sẽn yaa rat-m-yembr dãmb la nen-kɛglem dãmbã yĩng ye. D tẽeg tɩ b yel-manesmã pidsda Biiblã bãngr-gomd sẽn wilgd tɩ Wẽnnaam Rĩungã luglame. (Yɩɩn. 37:1) Armagedõ zabrã sẽn ta n sa wã, yɛlã na n maneg n kengdame. (Mark 13:8; 2 Tɩm. 3:13) La d sũur noomame, d saasẽ Ba wã sẽn nong-dã sẽn sõng tõnd tɩ d bãng yɛlã sẽn kengd dũniyã gill zugã võorã.

9. Bõe la Dãniyɛll 2:28, 31-35 bãngr-gomdã yeta, dũni gill yaoolem pãn-soaadã wɛɛngẽ? Wakat bʋg la pãn-soaad-kãng ra na n sɩng naam dɩɩbo?

⁹ Karm-y Dãniyɛll 2:28, 31-35. D nee bãngr-gom-kãngã sẽn pidsd rũndã-rũndã. A Nebukadnezaar zãmsdã wilgda bũmb ning sẽn na n zĩnd “yaoolem wakate,” Kiristã sã n wa sɩng a naamã rɩɩbo. Yaoolem dũni gill pãn-soaadã Biiblã sẽn gomd a yellã me naaga a Zeezi bɛɛbã sʋka. B mak-a-la ne “naoã sẽn yaa kut ne yagd” sẽn kalem taabã. Pãn-soaad-kãng zoe n dɩta naam. Yɩɩ dũni gill pipi zabrã sasa, Garãnd Bertayn ne Etazĩni sẽn naag taab n lebg dũni gill pãn-soaadã wakate. A Nebukadnezaar zãmsdã pʋgẽ bõn-naandgã sõngda tõnd tɩ d bãng bũmb a yiib sẽn kɩt tɩ pãn-soaad-kãng yaa toor ne pãn-soaadb nins sẽn deng yẽ wã.

10. a) Bõe la a Dãniyɛll bãngr-gomdã togse, tɩ pidsd Garãnd Bertayn ne Etazĩni sẽn naag taab n yaa dũni gill pãn-soaadã zug rũndã-rũndã? b) Bõe la d segd n gũus ne? (Ges-y zĩ-gũbrã: “ Gũus-y ne yagdã!”)

 ¹⁰ Pipi, Garãnd Bertayn ne Etazĩni sẽn naag taab n yaa dũni gill pãn-soaadã pa wõnd pãn-soaadb nins sẽn deng yẽ wã ye. Bala b maka pãn-soaad-kãens ne bũmb sẽn yaa kãn-kãe, wala sãnem bɩ wãnzuri. La b maka yẽ soabã ne kut la yagd sẽn kalem taaba. Yagdã makda ninsaalbã kambã, rat n yeel tɩ nin-buiidã. (Dãn. 2:43) Vẽenega, nin-buiidã manesem sẽn yaa to-to vot-rãmbã sasa wã, b sẽn baood n soog b mengã, b sẽn mi n sũ taab n wilg tɩ b pa sakã, la b sẽn lugl sigls tʋm-tʋmdbã sõngr yĩngã kɩtame tɩ dũni gill pãn-soaadã pa tõe n tʋm wa a sẽn datã ye.

11. Wãn to la Garãnd Bertayn ne Etazini sẽn wa n lebg dũni gill pãn-soaadã sõngd tõnd tɩ d maneg n kɩs sɩd tɩ d vɩɩ dũniyã saab wakate?

¹¹ Yiibu, bõn-naand-kãsengã nao wã makda Garãnd Bertayn ne Etazĩni sẽn naag taab n yaa dũni gill yaoolem pãn-soaad Biiblã sẽn gomd a yellã. Pãn-soaad a to pa na n wa ledg-a ye. Wẽnnaam Rĩungã na n wa sãama yẽ ne a goosneemã rãmbã fãa Armagedõ zabrã sasa. *—Vẽn. 16:13, 14, 16; 19:19, 20.

12. Bõe me la a Dãniyɛll bãngr-gomdã togsda, tɩ wilgdẽ tɩ manegr n wate?

¹² Wãn to la bãngr-gom-kãngã tõe n naf-do? A Dãniyɛll bãngr-gomdã leb n kõta kaset tɩ d vɩɩ dũniyã saab wakate. Sẽn yɩɩd yʋʋm 2 500, a Dãniyɛll pĩnd n togsame tɩ Babilon sẽn yaa dũni gill pãn-soaadã loogr poore, dũni gill pãn-soaadb a naas n na n zĩndi, n tall pãng wʋsg Wẽnnaam nin-buiidã zugu. Sẽn paase, a wilgame tɩ Garãnd Bertayn ne Etazĩni sẽn naag taab n yaa dũni gill pãn-soaadã n na n yɩ yaoolem soaba. Woto kɩtame tɩ d tõe n bas d yam tɩ ka la bilfu, Wẽnnaam Rĩungã na n sãama goosneema-rãmbã fãa la a soog dũniyã gilli.—Dãn. 2:44.

13. ‘Rĩm a nii-n-soabã’ ne ‘rĩm-dãmb piigã’ yell b sẽn gomd Vẽnegr 17:9-12 makda bõe, la wãn to la bãngr-gom-kãng paamd pidsgu?

¹³ Karm-y Vẽnegr 17:9-12. Dũni gill pipi zabrã sẽn wa ne sãoong ningã pidsa Biiblã bãngr-gomd a to, sẽn gomd yaoolem wakatã yelle. Dũniyã nanambsã ra maoodame n dat tɩ laafɩ zĩnd dũniyã gill zugu. Rẽ n so tɩ yʋʋmd 1920 yʋʋm-vẽkr kiuugã, b lugla siglg b sẽn boond tɩ Sosiete dɛ nasiõ. B wa n ledg-a-la ne siglg ning b sẽn boond tɩ Nasiõzĩni wã, yʋʋmd 1945 zĩ-likr kiuugã. Biiblã boond-a lame tɩ “rĩm a nii-n-soaba.” A pa dũni gill pãn-soaad ye. Yaa goosneema-rãmbã sẽn teend-a wã yĩng n kɩt t’a tar pãngã. Biiblã boonda goosneema-rãmbã tɩ “rĩm dãmb piiga.”

14-15. a) Bõe la Vẽnegr 17:3-5 wã sõngd tõnd tɩ d bãng Babilon-kãsengã zugu? b) Bõe la neb wʋsg sẽn da teend ziri tũudmã maand rũndã-rũndã?

¹⁴ Karm-y Vẽnegr 17:3-5. Wẽnnaam vẽnega tẽn-tʋmd a Zã t’a yã pʋg-yoodre, b sẽn boond tɩ “Babilon-kãsengã.” A makda ziri tũudmã fãa sẽn naag taaba. Wãn to la bũmb ning a Zã sẽn yã wã paamd pidsgu? Hal sẽn kaoose, ziri tũudmã teenda goosneema-rãmbã dũniyã gill zugu. La ka la bilfu, a Zeova na n ninga politik pãn-soaadbã sũyẽ “tɩ b pids Wẽnnaam daabã.” Na n baasa wãna? ‘Rĩm dãmb piiga,’ rat n yeel tɩ  politik pãn-soaadbã, na n wẽneg n zaba ne ziri tũudmã fãa, n sãam-ba.—Vẽn. 17:1, 2, 16, 17.

¹⁵ Bõe n wilgd tɩ Babilon-kãsengã sãoong ta n saame? Sẽn na yɩl n paam sok-kãngã leoore, d tẽeg tɩ Efrat kʋɩlgã sẽn da gũbg Babilonnã me ra sõngdame tɩ tẽngã paamd koglgo. Vẽnegr sebrã maka neb milyõ-rãmbã sẽn teend Babilon-kãsengã ne “koom sẽn yaa wʋsg” sẽn kogend-a. (Vẽn. 17:15) B yeelame me tɩ koomã na n kʋɩɩme. Woto wilgdame tɩ ziri tũudmã fãa sẽn naag taabã pa na n le wa tar neb wʋsg sẽn teend-a ye. (Vẽn. 16:12) Rũndã-rũndã, bãngr-gom-kãngã paamda pidsgu. Bala neb wʋsg basda tũudmã, n baood b zu-loeesã tɩɩm zĩis a taaba.

16. Wãn to la d sẽn bãng Nasiõzĩni wã luglgã la Babilon-kãsengã sãoongã sẽn na n yɩ wakat ningã nafd tõndo?

¹⁶ Wãn to la bãngr-gom-kãensã tõe n naf-do? Nasiõzĩni wã sullã luglgã, n paas neb wʋsg sẽn pa le teend ziri tũudmã yaa kaset tɩ d vɩɩ yaoolem wakate. Baa ne neb wʋsg sẽn pa le teend Babilon- kãsengã, pa rẽ n na n wa ne ziri tũudmã sãoong ye. Wa d sẽn togs tɩ loogã, a Zeova na n ninga “rĩm dãmb piigã” sũyẽ, rat n yeel tɩ goosneema-rãmb nins sẽn teend Nasiõzĩni wã, “tɩ b pids Wẽnnaam daabã.” B na n sãama ziri tũudmã zĩig pʋgẽ, la na n linga dũniyã nebã. * (Vẽn. 18:8-10) Babilon-kãsengã sãoongã na n sãama dũniyã neb sũy hal wʋsgo, la wa ne namsgo. La Wẽnnaam nin-buiidã yẽ na n kɩdma sũ-noogo, bʋʋm a yiib yĩnga. Pipi, ziri tũudmã sẽn sɩng n kɩɩsd a Zeova hal sẽn kaoosã pa na n le beẽ ye. Yiibu, wakat ning a Zeova sẽn na n fãag-d dũni-wẽn-kãngã pʋgẽ wã ta n saame.—Luk 21:28.

17-18. a) Bõe la d tõe n maan n ket n paasd d tẽebã pãnga? b) Bõe yell la d na n gom sõsg ning sẽn pʋgdã pʋgẽ?

¹⁷ A Dãniyɛll pĩnd n togsame tɩ “bãngr hakɩɩkã” na n ‘lebga wʋsgo.’ La sɩd yaa woto rũndã-rũndã. (Dãn. 12:4, 9, 10, MN) D wʋmda bãngr-goam nins sẽn gomd yaoolem wakatã yellã võore. Bãngr-gom-kãensã pidsda kɛpɩ, tɩ sõngd tõnd tɩ d maneg n sakd a Zeova la a Gomdã sẽn yetã. (Eza. 46:10; 55:11) Rẽ wã, bɩ y ket n wɩngd ne Biiblã zãmsgo, sẽn na yɩl n paas y tẽebã pãnga, la y sõng neb a taabã tɩ b paam zood sõma ne a Zeova. A Zeova na n kogla neb nins fãa sẽn teeg-a wã, la a sõng-b tɩ b paam “vɩ-bãane.”—Eza. 26:3.

¹⁸ Sõsg ning sẽn pʋgdã pʋgẽ, d na n goma bũmb kẽer b sẽn da pĩnd n togs kiris-neb tigingã zugu, tɩ na n pids dũniyã saab wakate. Wa d sẽn na n yã wã, bãngr-gom-kãens me wilgda vẽeneg tɩ d vɩɩ yaoolem wakate. D leb n na n yãa bũmb a taab sẽn wilgd vẽeneg t’a Zeezi sẽn yaa d rĩmã lʋɩɩ taoore, n get a nin-buiidã sẽn maand sɩd ne-a wã yelle.