1. A Ãdem ne a Awa sẽn beeg a Zeova wã poor bala, bõe la a Zeova maane? (Sɩngre 3:15)

 A ÃDEM ne a Awa sẽn beeg a Zeova wã poor bilf bala, a Zeova togsa bãngr-gomde. Yaa bãngr-gomd sẽn tar yõod wʋsgo, sẽn wilgd t’a Ãdem ne a Awa yagensã beoog na n yɩɩ neere. A sẽn yeel bũmb ningã bee Sɩngr 3:15 wã pʋgẽ.—Karm-y.

2. Bõe yĩng tɩ d tõe n yeel tɩ Biiblã pipi bãngr-gomdã tara yõod wʋsgo?

² Bãngr-gomdã bee Biiblã pipi sebrã pʋgẽ. Biiblã sɛb a taabã fãa tara loees ne bãngr-gom-kãnga. Wa b sẽn mi n tall wĩir n sẽbg raad n naag taab tɩ lebg killã, Sɩngr 3:15 goamã me yaa wa wĩir b sẽn tall n sẽbg Biiblã sɛb toor-toorã n naag taaba, tɩ lebg seb-yend sẽn gomd bũmb a yembr yelle. Bõe yell la Biiblã gomda? A wilgdame tɩ Wẽnnaam na n tʋma fãagda, t’a wa sãam a Sʋɩtãan ne a poorẽ dãmbã fãa. * Neb nins fãa sẽn nong a Zeova wã na n paama bark tɛkẽ.

3. Bõe yell la d na n gom sõs-kãngã pʋgẽ?

³ Ad sogsg d sẽn na n leok sõs-kãngã pʋgẽ, Sɩngr 3:15 bãngr-gomdã wɛɛngẽ: Ãnd dãmb yell la b gomd bãngr-gomdã pʋgẽ? Wãn to la bãngr-gomdã paamd pidsgu? La wãn to la nafd tõndo?

4. “Waafã” yaa ãnd soaba, la bõe n kɩt tɩ d mi rẽ?

⁴ Sɩngr 3:14, 15 wã pʋgẽ, b gomda “waaf” la “waafã yageng” yelle, la “pag” ne “pagã yageng” me yelle. Biiblã sõngda tõnd tɩ d bãng sẽn yaa b rãmba. * Bɩ d reng n  gom “waafã” yelle. Pa tõe n yɩ waaf sɩd-sɩd ye. Bala waaf sɩd-sɩd pa tõe n wʋm bũmb ning a Zeova sẽn togs Edɛn zẽedã zĩigẽ wã võor ye. Dẽnd a Zeova sẽn da gomd ne a soabã yaa a bõn-naandg sẽn tar yam. Woto wã, yaa ãnd soab la a Zeova sẽn da gomd ne wã? Vẽnegr 12:9 wã togsda waafã sẽn sɩd yaa a soabã vẽenega. Wag-kʋdrã yell b sẽn gomd beenẽ wã yaa a Sʋɩtãan b sẽn boond tɩ Munaafɩkã. La waafã yagengã yẽ?

5. Waafã yagengã yaa ãnd dãmba?

⁵ Wakat ninga Biiblã sã n gomd yageng yelle, tõe n yaa neb sẽn dɩkd ned togs-n-taar kɛpɩ tɩ b tõe n yeel tɩ b yaa a kamba. Dẽnd waafã yagengã yaa malɛgs la ninsaalb sẽn dɩk a Sʋɩtãan togs-n-taar n kɩɩsd a Zeova, la b namsd a nin-buiidã. Malɛgs nins sẽn bas tʋʋmd ning a Zeova sẽn da kõ-b saasẽ wã n sig tẽngã zug a Nowe wakatẽ wã, n paas ninsaalb nins fãa sẽn tar a Sʋɩtãan sẽn yaa b ba wã yel-manesmã buudã naaga waafã yagengã sʋka.—Sɩng. 6:1, 2; Zã 8:44; 1 Zã 5:19; Ziid 6.

6. Bõe yĩng tɩ “pagã” pa tõe n yɩ a Awa?

⁶ Masã, d bao n bãng “pagã” sẽn yaa a soaba. Pagã pa tõe n yɩ a Awa ye. Bõe yĩng tɩ d yet woto? Ad bũmb a ye sẽn wilgd rẽ. Bãngr-gomdã pʋgẽ, b yeelame tɩ pagã yagengã na n bedsa waafã zugu. D yãame tɩ waafã yaa a Sʋɩtãan sẽn yaa malɛg-wẽngã. A Awa yagensã sẽn yaa ninsaalb sẽn pa zems zãngã baa a ye pa tar tõog n na n beds a Sʋɩtãan ye. Woto wã, wãn to la b na n sãam a Sʋɩtãana?

7. Wa Vẽnegr 12:1, 2, 5, 10 sẽn wilgdã, pag ning yell b sẽn gomd Sɩngr 3:15 pʋgẽ wã makda bõe?

⁷ Vẽnegr sebrã sõngda tõnd tɩ d bãng pag ning yell b sẽn gomd Sɩngr 3:15 pʋgẽ  wã sẽn yaa a soaba. (Karm-y Vẽnegr 12:1, 2, 5, 10.) Pa pag sɩd-sɩd ye. Bala, a tara kiuugã tɩ be a naoã tẽngre, tɩ maanf sẽn maan ne ãds piig la a yiib be a zugẽ wã. A roga bi-ribla. A sẽn dog biig ningã makda Wẽnnaam Rĩungã. Sẽn mik tɩ Rĩungã bee saasẽ wã, pagã me segd n bee saasẽ. Dẽnd pagã makda a Zeova siglgã babg ning sẽn be saasẽ wã, rat n yeel tɩ malɛg-sakdbã.—Gal. 4:26.

8. Pagã yagen-kãsengã yaa ãnda, la yɩɩ wakat bʋg la a lebg yagen-kãsenga? (Sɩngre 22:15-18)

⁸ Wẽnnaam Gomdã leb n sõngda tõnd tɩ d bãng pagã yagen-kãsengã sẽn yaa a soaba. A ra segd n yɩɩ a Abrahaam yagenga. (Karm-y Sɩngr 22:15-18.) Wa bãngr-gomdã sẽn togsã, a Zeezi sɩd yaa ra-kãngã sẽn yɩ wẽn-sakdã yagenga. (Luk 3:23, 34) La yagengã ra segd n yɩɩ ned sẽn tar pãng sẽn yɩɩd ninsaal rẽndã. Bala yẽ n na n sãam a Sʋɩtãan fasɩ. Rẽ n so t’a Zeezi sẽn wa n tar yʋʋm 30, a paama vʋʋsem sõngã zaeebo. Rẽ tɛka, a lebga pagã yagen-kãsenga. (Gal. 3:16) A Zeezi vʋʋgrã poore, “Wẽnnaam kõ-a-la ziir la waoogre,” la a “kõ-a noor t’a ges bũmb fãa yell saasẽ la tẽngã zugu,” la a “sãam Sʋɩtãanã tʋʋma.”—Ebre. 2:7; Mat. 28:18; 1 Zã 3:8.

9-10. a) Ãnd dãmb me n naag pagã yagengã, la wakat bʋg la b paamd n naage? b) Bõe yell la d na n gom masã?

⁹ Pa a Zeezi a ye bal la pagã yageng ye. Neb a taab me n naage. Bũmb la tẽn-tʋmd a Poll togs Zʋɩf-rãmb la bu-zẽms neb sẽn da paam vʋʋsem sõngã zaeebo, tɩ rẽ tõe n sõng tõnd tɩ d bãng nin-kãensã sẽn yaa b rãmba. A yeel-b lame yaa: “Yãmb sã n yaa Kirist rẽnda, yãmb sɩd yaa a Abrahaam yagense, la yãmb na n paama rogem-pʋɩɩr wa sẽn zems Wẽnnaam sẽn pʋlmã.” (Gal. 3:28, 29) A Zeova sã n zae kiris-ned ne a vʋʋsem sõngã, a soabã naagda pagã yagensã sʋka. Dẽnd pagã yagengã yaa a Zeezi Kiristi, n paas neb tus-koabg la tus pis-naas la a naasã sẽn yaa a na-rɩt-n-taasã. (Vẽn. 14:1) B fãa rɩkda Wẽnnaam a Zeova sẽn yaa b Ba wã togs-n-taare.

¹⁰ D bãnga neb nins yell b sẽn gomd Sɩngr 3:15 pʋgẽ wã sẽn yaa b rãmba. Masã bɩ d ges a Zeova sẽn pidsd bãngr-gom-kãnga bilf-bilf to-to, la rẽ sẽn nafd tõnd to-to rũndã-rũndã.

11. B sẽn yeel tɩ b na n pogla pagã yagengã ‘nao-kãsenkãarã’ võor yaa bõe?

¹¹ Wa b sẽn togs Sɩngr 3:15 bãngr-gomdã pʋgẽ wã, waafã na n pogla pagã yagengã “nao-kãsenkãare.” Gom-kãngã paama pidsgu, a Sʋɩtãan sẽn wa n tũnug ne Zʋɩf-rãmbã la Rom dãmbã n kʋ Wẽnnaam Bi-riblã. (Luk 23:13, 20-24) Ned nao-kãsenkãar sã n pogle, tõe n kaoosa bilf t’a wa tõe n kẽn sõma. Woto me, a Zeezi sẽn wa n ki n maan rasem a tãab yaoogẽ wã, a ra pa tõe n le maan baa fʋɩ.—Mat. 16:21.

12. Wãn to la b na n beds waafã zugu, la na n yɩɩ wakat bʋgo?

¹² Sẽn na yɩl tɩ Sɩngr 3:15 bãngr-gomdã paam pidsgu, a Zeezi ra pa segd n pa yaoogẽ wã ye. Bõe yĩng tɩ d yet woto? Bala b togsa bãngr-gomdã pʋgẽ tɩ yagengã na n bedsa waafã zugu. Dẽnd a Zeezi nao-kãsenkãarã nodr ra segd n maagame, rat n yeel t’a ra segd n vʋʋgame. La sɩd yɩɩ woto. A kũumã  rasem a tãab poore, a vʋʋgame n lebg malɛk sẽn pa le tõe n ki, n kẽng saasẽ. Wakat ning Wẽnnaam sẽn yãkã sã n ta, a Zeezi na n sãama a Sʋɩtãan fasɩ. (Ebre. 2:14) Neb nins sẽn na n dɩ naam ne a Zeezi wã na n naag-a lame n sãam Wẽnnaam bɛɛbã fãa tẽngã zugu, rat n yeel tɩ waafã yagengã.—Vẽn. 17:14; 20:4, 10. *

13. Wãn to la bãngr-gom-kãngã pidsgã nafd tõndo?

¹³ Yãmb sã n tuuda a Zeova, dẽnd bãngr-gomdã sẽn paamd pidsgã nafd-y lame. A Zeezi ra yaa ninsaal a sẽn wa n be tẽngã zugã. A rɩkda a Ba wã togs-n-taar kɛpɩ. (Zã 14:9) Dẽnd ne yẽ maasem, d paam n bãnga Wẽnnaam a Zeova la d nong-a. D paamame me t’a Zeezi zãmsd tõnd la a wilgd-d sor rũndã-rũndã ne kiris-neb tigingã maasem. A wilga tõnd d sẽn tõe n maan n paam n ta a Zeova yam. A Zeezi kũumã, rat n yeel t’a nao-kãsenkãarã poglgã tõe n nafa d fãa. Wãn to? Bala a Zeezi kũumã poore, a Zeova vʋʋg-a lame, n sak t’a kũumã yɩ maoong sẽn “pekd tõnd n yiisd yel-wẽn buud fãa.”—1 Zã 1:7.

14. Bõe n kɩt tɩ d mi tɩ bãngr-gomdã a Zeova sẽn togs Edɛn zẽedã zĩigẽ wã pa paam pidsg wakat kãnga?

¹⁴ Goam nins a Zeova sẽn togs Edɛn zẽedã zĩigẽ wã wilgdame tɩ bãngr-gomdã ra pa na n pids wakat kãng ye. Ra na n kaoosame, bala pagã ra segd n paama a yagengã, t’a Sʋɩtãan me tigs a poorẽ dãmbã tɩ beem bɩ kisgr zĩnd pagã yageng ne waafã yageng sʋka. D sã n wʋmd bãngr-gom-kãngã võore, nafd-d lame. Sõngd-d lame tɩ d bãng tɩ dũni-kãngã sẽn be a Sʋɩtãan nugẽ wã na n kisga a Zeova nin-buiidã. A Zeezi ra pĩnd n togsa a karen-biisã rẽ. (Mark 13:13; Zã 17:14) D nee bãngr-gomdã bab-kãngã sẽn paamd pidsg vẽenega, sẽn yɩɩd fãa yʋʋm koabgã sẽn loogã. Wãn to?

15. Bõe yĩng t’a Sʋɩtãan dũniyã neb maneg n kis a Zeova nin-buiidã? Bõe yĩng tɩ d pa segd n zoe rabeem?

¹⁵ A Zeezi sẽn lebg Wẽnnaam Rĩungã rĩm yʋʋmd 1914 poor bilf bala, a riga a Sʋɩtãan saasẽ. B lob-a-la tẽngã zugu, n na n wa sãam-a fasɩ ka la bilfu. (Vẽn. 12:9, 12) La a Sʋɩtãan pa zĩ sɩɩ n gũud rẽ ye. A sũurã puuga wʋsgo, t’a zabd ne Wẽnnaam nin-buiidã. (Vẽn. 12:13, 17) Rẽ n so t’a Sʋɩtãan dũniyã neb maneg n kis Wẽnnaam nin-buiidã. La d pa segd n zoe a Sʋɩtãan ne a poorẽ dãmbã ye. Tõnd me tõe n basa d yam wa tẽn-tʋmd a Polle. A yeelame: “Wẽnnaam sã n be ne tõndo, ãnda n tõe n zab ne tõnd n tõoge?” (Rom. 8:31) D tõe n kɩsa a Zeova sɩd zãng-zãnga, bala wa d sẽn yã wã, bũmb wʋsg b sẽn togs Sɩngr 3:15 bãngr-gomdã pʋgẽ zoe n pidsame.

16-18. A Kɛrtis ne a Ursula la a Zesika sẽn wʋm Sɩngr 3:15 bãngr-gomdã võorã, wãn to la naf-ba?

¹⁶ A Zeova sẽn togs bũmb ning Sɩngr 3:15 pʋgẽ wã tõe n sõnga tõnd tɩ d kell n mao ne zu-loɛɛg buud fãa. Wala makre, d gom saam-biig a ye yʋʋr sẽn boond t’a Kɛrtis yelle. A yaa misioneer n be Guwam tẽngã. A yeelame: “Yɛl wʋsg n maan m vɩɩmã pʋgẽ, tɩ ra yaa toog wʋsg tɩ m kell n maan sɩd ne a Zeova. La m sẽn bʋgs Sɩngr 3:15 bãngr-gomdã zugã,  sõng-m lame tɩ m kell n teeg a Zeova sẽn yaa m saasẽ Ba wã.” A Kɛrtis gũuda wakat ning a Zeova sẽn na n kɩt tɩ namsg buud fãa sa wã ne a sũur fãa.

¹⁷ Saam-bi-poak sẽn be Bavariya tẽngã, t’a yʋʋr boond t’a Ursula yeelame t’a sẽn wʋm Sɩngr 3:15 bãngr-gomdã võorã, sõng-a lame t’a kɩs sɩd tɩ Biiblã yaa Wẽnnaam n kɩt tɩ b gʋlse. A yãame tɩ Biiblã bãngr-goam a taabã fãa tara loees ne bãngr-gom-kãngã, hal tɩ yɩ a noog wʋsgo. A paasame yaa: “Mam sẽn bãng t’a Zeova maana bũmb tao-tao n na n sõng ãdem-biisã tɩ b bãng tɩ manegr n watã yɩ-m-la noog wʋsgo.”

¹⁸ A Zesika sẽn yit Mikronezi wã me yeelame: “M ket n tẽra m sẽn wa n bãng sɩdã. M sũ-noogã ra pa tõe n bãng n bilg ye! Sɩngr 3:15 bãngr-gomdã ra paamda pidsgu. Sõnga maam tɩ m bãng tɩ pa woto la a Zeova ra rat tɩ ninsaalbã vɩɩm yɩ ye. Bãngr-gomdã leb n sõnga maam tɩ m maneg n kɩs sɩd tɩ d sã n tũud a Zeova, masã menga d paamda vɩɩm sẽn tar barka, la d na n wa paama vɩɩm sẽn kõn sa ka la bilfu.”

19. Bõe yĩng tɩ d tõe n kɩs sɩd tɩ bãngr-gomdã yaoolem babgã na n paama pidsgu?

¹⁹ Wa d sẽn yã wã, Sɩngr 3:15 bãngr-gomdã paamda pidsgu. D bãnga pagã yagengã ne waafã yagengã sẽn yaa b rãmb vẽenega. A Zeezi sẽn yaa pagã yagen-kãsengã nao-kãsenkãarã poglgã maagame. La masã a lebga rĩm sẽn tar pãnga, n pa le tõe n ki ye. Neb nins a Zeova sẽn yãk tɩ b na n naag a Bi-riblã n dɩ naam saasẽ wã sõorã pidame la bala. Bãngr-gomdã pipi babgã sẽn paam pidsgã yĩnga, d tõe n kɩsa sɩd t’a yaoolem babgã sẽn gomd waafã zugã bedsgã me na n pidsame. B sã n wa sãam a Sʋɩtãana, Wẽnnaam nin-buiidã na n paama yolsg meng-menga. La nananda, ra koms-y raood n bas ye. Tõnd Wẽnnaamã yaa sɩd soaba. Ne pagã yagengã maasem, a Zeova na n kɩtame tɩ “dũniyã nebã buud fãa” paam bark ka tɛka.—Sɩng. 22:18.