1-3. a) Wõnda yaa wakat bʋg la b gʋls Yɩɩn-sõamyã 147 soabã? b) D sã n maag d yĩng n bʋgs Yɩɩn-sõamyã 147 soabã zugu, bõe la d na n bãnge?

NAOOR WƲSGO, ned sã n maan bũmb wall a yeel bũmb tɩ yɩ-d noogo, d pẽgda a soaba. D sẽn pẽgd ninsaalbã, a Zeova la d segd n pẽg n yɩɩda! D sã n ges a sẽn naan bũmb ninsã sẽn be yamleoog to-to wã, d pẽgd-a-la a tõogã sẽn ka to wã yĩnga. D sã n leb n tags a sẽn sak n kɩt t’a Biigã wa ki n na n dol tõnd yel-wẽnã, d nee a nonglmã sẽn ka mak-n-taarã, tɩ d pẽgd-a rẽ yĩnga.

² D sã n karem Yɩɩn-sõamyã 147 soabã, d nee vẽeneg tɩ yɩɩn-gʋlsdã ra rata ne a sũur fãa n pẽg a Zeova, la a rat me tɩ neb a taabã naag-a tɩ b pẽg-a.—Karm-y Yɩɩn-sõamyã 147:1, 7, 12.

³ D pa mi sẽn yaa ned ning n gʋls Yɩɩn-sõamyã 147 soabã ye. La wõnda yaa ned sẽn zĩnd wakat ning a Zeova sẽn yiis Israyɛll nebã yembd Babilond tɩ b lebg n wa Zerizalɛmmã. (Yɩɩn. 147:2) Sẽn gʋls-a Yɩɩn-sõamyã 147 soabã pẽgda a Zeova, a sẽn kɩt t’a nin-buiidã le paam n wa b ba-yirã, n na n tũ-a wa a sẽn dat to-to wã. La pa rẽ yĩng bal la a pẽgd-a ye. Sõs-kãnga pʋgẽ, d na n bãnga sẽn yaa bũmb nins yĩng me la a sẽn pẽgd a Zeova  wã, la d bãng bũmb toor-toor sẽn kɩt tɩ tõnd me segd n yeel tɩ “haleluya,” rat n yeel tɩ “pẽg a Zeova.”—Yɩɩn. 147:1; Vẽn. 19:1.

4. Rĩm a Sirus sẽn wa n bas Israyɛll nebã tɩ b na n leb b ba-yirã, bõe yĩng tɩ b sũy yɩ noogo?

⁴ Tags-y n ges-y Israyɛll nebã sũy sẽn da sãam to-to, b sẽn wa n be yembd Babilondã. Babilond nebã ra yaand-b lame, n yet-b yaa: “Yɩɩl-y Sɩyõ yɩɩl n kõ-do.” Israyɛll nebã yam yaool n da ka be yɩɩl ye. Bala Babilond nebã sãama Zerizalɛm tẽngã sẽn da yaa bũmb ning sẽn da kõt Israyɛll nebã sũ-noog n tɩ yɩɩdã. (Yɩɩn. 137:1-3, 6) B sũyã ra sãama wʋsgo, tɩ b ra baood belsg la raood kengre. A Zeova sõng-b lame, n bels-b wa a sẽn da kɩt t’a no-rɛɛsdbã pĩnd n togsã. Bõe la a maan-yã? A kɩtame tɩ Pɛrs rĩm a Sirus zab n deeg Babilond tẽngã. Rẽ poore, ad a Sirus sẽn yeele: ‘Saasẽ Wẽnnaamã . . . yeela maam tɩ m me roog Zerizalɛm sẽn be Zʋʋda soolmã pʋgẽ wã. Woto, ned ning fãa sẽn yaa bãmb soolmã neda, bɩ a kẽnge, la bɩ Sẽn-Ka-Saab sẽn yaa yẽnda Wẽnnaamã zĩnd ne-a.’ (2 Kib. 36:23) Hakɩɩka, Israyɛll nebã sẽn wʋm koe-kãngã wã, b sũy yɩɩ noogo. Kenga b raood hal wʋsgo!

5. Bõe la yɩɩn-gʋlsdã yeel-yã, tɩ wilgdẽ t’a Zeova tõe n sigsa tõnd sũyã?

⁵ A Zeova belsa Israyɛll nin-buiidã gilli, n keng b raoodo. La b ned kam fãa yembr-yembr me paamame t’a bels-a. Rũndã-rũndã me, a Zeova sõngda a nin-buiidã woto. Yɩɩn-gʋlsdã ra yeelame tɩ Wẽnnaam “belsda sũ-sãang rãmbã, la b tɩpd b poglgã.” (Yɩɩn. 147:3) Rẽnd d tõe n kɩsa sɩd tɩ d sã n pa keeme, wall yaa d sũurã n sãame, a Zeova na n gesa d yell sõma. A rata ne a sũur fãa n bels tõnd la a sigs d sũyã. (Yɩɩn. 34:19; Eza. 57:15) A kõta tõnd yam la pãng sẽn na yɩl tɩ d tõog n mao ne zu-loɛɛg buuda fãa.—Zak 1:5.

6. Bõe yĩng tɩ yɩɩn-gʋlsdã sẽn yeel bũmb ning Yɩɩn-sõamyã 147:4 kengd tõnd daoodo? (Ges-y sõsgã sɩngrẽ fotã.)

⁶ Yɩɩn-gʋlsdã sẽn yeel t’a Zeova belsda sũ-sãang rãmbã poore, a yeelame: “Sẽn-Ka-Saab tara ãdsã sõore, la b mii ãdg fãa ne a yʋʋre.” (Yɩɩn. 147:4) D miime tɩ yɩɩn-gʋlsdã ra nee ãdsã, la a ra pa tõe n bãng b sõorã ye. Rũndã-rũndã, bãngdbã wilgame tɩ ãd-sulã b sẽn boond tɩ galagsi-rãmbã yaa milyaar ka tɛka, la tɩ ãd-sull ning b sẽn boond tɩ Voalakte wã ãdsã taa milyaar koabga. Ninsaal pa tõe n bãng ãdsã sõor gilli, la d Naandã mii b sõorã. A mii ãdg fãa sõma, hal n pʋd-b yʋya. Woto wilgdame t’a mii ãdg fãa n bake. (1 Kor. 15:41) Wẽnnaam sã n mi ãdg fãa, rẽnd a mii tõnd ned kam fãa me sõma. A mii ned fãa sẽn beẽ, a tagsgo, la a bõn-daabo.

7, 8. a) A Zeova sã n wa sõngd tõnd d zu-loeesã pʋgẽ, bõe la a pa yĩmda? b) Togs-y kibar sẽn wilgd t’a Zeova kʋmda tõndo.

⁷ A Zeova pa wʋmd tõnd toogã bal ye. A tara tõog n na n sõng-do, la a ratame me n sɩd sõng-do. (Karm-y Yɩɩn-sõamyã 147:5.) Tõe tɩ y tagsdame tɩ y zu-loeesã yaa wʋsgo, la tɩ yɩɩda y pãnga. La Wẽnnaam mii tõnd pãngã tɛka. A tẽegdame tɩ “tõnd yaa tẽng tom.” (Yɩɩn. 103:14) Tõnd sẽn pa zems zãngã, d kongda wʋsgo, n mi n yɩlem d kongr kẽer menga, tɩ sãamd d sũuri. D gomda gomd ning n wa maand d bãngẽ, d mi n tara tʋls-wẽnse, wall d maan sũ-kiir ne d to bũmbu. A Zeova yẽ pa kongd ye. La a mii d kongr sẽn sãamd d sũur to-to wã, bala a yamã ka tɛk ye.—Eza. 40:28.

⁸ Tõe tɩ y tẽra yell sẽn da sãamd y sũur  wʋsgo, t’a Zeova ning a nug tɩ y paam yolsgo. (Eza. 41:10, 13) A sõnga a Kiyoko sẽn yaa so-pakdã woto. B wa n kɩtame t’a toeem tiginga, la sãama a sũur wʋsgo. A maana wãn n bãng t’a Zeova kʋmd-a lame? A tiging-paallã pʋgẽ, neb wʋsg wilga ne b manesem la b no-goamã tɩ b wʋmda a sũ-sãangã võore. Kɩtame t’a Kiyoko yamẽ, ra yaa wa a Zeova yet-a lame yaa: “Mam nonga foo, f sẽn dɩk f meng n kõ maam, n yaa m biigã yĩnga. Pa f sẽn yaa so-pakdã yĩng bal ye. M datame tɩ f vɩɩmã yɩɩ noogo, f sẽn yaa mam Kaset soabã yĩnga!” Bõe la a Zeova maan n sõng yãmba, tɩ wilgdẽ t’a yamã ka tɛka?

9, 10. Bõe la a Zeova sõngd tõnd tɩ d paamdẽ, tɩ rẽ tar yõod n yɩɩd sẽn ketã? Togs-y kibare.

⁹ Rɩɩb ne fut la gãag zĩig yaa tɩlɛ ne d fãa. Tõe tɩ y mi n maanda yɩɩre, n tagsd y sã n na n paama rɩɩb tɩ sek-yã. La tẽeg-y t’a Zeova naana tẽngã, n kɩt tɩ rɩɩb buud toor-toor yit ãdem-biisã la rũmsã yĩnga. Baa “gãabg kamb sã n kelme,” yẽ n kõt-b rɩɩbo. (Karm-y Yɩɩn-sõamyã 147:8, 9.) A Zeova sã n geta gãabdã yelle, n kõt-b rɩɩb wakat fãa, y tõe n kɩsa sɩd t’a na n gesame tɩ y paam bũmb nins sẽn yaa tɩlɛ ne-yã.—Yɩɩn. 37:25.

¹⁰ La sẽn tar yõor n yɩɩda, a Zeova getame tɩ d paamd bũmb nins sẽn yaa tɩlɛ d tẽebã kengr yĩngã, la a kõt tõnd a “laafɩ wã sẽn yɩɩd ninsaalbã bãngr fãa wã.” (Fili. 4:6, 7) A sõnga a Mutsiyo ne a pagã woto yʋʋmd 2011. Sunami n maan Zapõ tẽngã yʋʋm-kãnga. Yɩɩ tɩlɛ t’a Mutsiyo rãmb rʋ b roogã zugu, n paam n põse. B bõna b sẽn da tarã fãa la bala. B roogã ra tara yĩngr roogo. Yaa be la b pa yʋngã tõre, likã la waoodã pʋgẽ. Beoogã sẽn vẽegã, b baoo sebr b sẽn tõe n karem tɩ keng b raoodo. La yaa yʋʋmd 2006 aniyɛɛrã bal n da kete. A Mutsiyo sẽn dɩk n lakã, a yãa zĩig ning b sẽn gʋls tɩ “ Le tsunami le plus meurtrier jamais recensé. ” Zĩ-kãngã, b gomda tẽn-digimdg sẽn maan Sumatra yʋʋmd 2004, n naag ne sunami hal t’a vargrã wẽnem pa tall to ye. A Mutsiyo ne a pagã sẽn karem bũmb ning sẽn paam b tẽed-n-taasã beenẽ wã, b yãbame. B yamẽ, yaa a Zeova n sõng-b tɩ b paam kiba-kãngã sẽn kell n zems ne bãmb yellã n karme, tɩ keng b raoodo. A Zeova gesame tɩ b paam bũmb a taab me sẽn yaa tɩlɛ. Wala makre, b tẽed-n-taas n tool-b rɩɩb la futu. Bũmb sẽn keng b raood n tɩ yɩɩd yaa siglgã taoor lʋɩtb sẽn tʋm saam-biis tɩ b wa kaag-bã. A Mutsiyo yeelame: “M da getame tɩ yaa wa a Zeova meng yasa d ned kam fãa sɛɛgẽ, n get d yelle. Belsg tɛkẽ!” Hakɩɩka, a Zeova getame tɩ d paamd sẽn yaa tɩlɛ d tẽebã kengr yĩngã, la a getẽ me tɩ d paamd sẽn yaa tɩlɛ ne d vɩɩmã.

11. D maanda wãn n paam tɩ Wẽnnaam sõng-do?

¹¹ A Zeova “zẽkda” sik-m-mens rãmbã. A nonga tõndo, n dat wakat fãa n sõng-do. (Yɩɩn. 147:6a) La d maanda wãn n paam tɩ Wẽnnaam sõng-do? Yaa tɩlɛ tɩ d bao zood sõma ne-a. D sã n dat Wẽnnaam zoodo, rẽnda d yɩ sik-m-mens rãmba. (Sof. 2:3) Sik-m-mens rãmbã teega a Zeova, n gũudẽ t’a wa rems yel-kɛgã la a kɩt tɩ b namsgã sa. Kɩtame t’a sũur noom ne-ba.

12, 13. a) D sã n dat n paam tɩ Wẽnnaam sõngd tõndo, bõe la d segd n kisgi? b) A Zeova sũur nooma ne ãnd dãmba?

¹² La Wẽnnaam “sikda nin-wẽnsã n tãag tẽnga.” (Yɩɩn. 147:6b) D pa rat t’a  buud paam-d ye. D ratame tɩ Wẽnnaam nong tõnd wakat fãa. Rẽ n so tɩ d segd n kisg bũmb nins a sẽn kisã. (Yɩɩn. 97:10) Wala makre, d segd n kisga yoob la raglem buud fãa. Dẽnd d tog n zãaga d meng ne yoob yɛl gesgo, la bũmb ning fãa sẽn tõe n wa kɩt tɩ d yo. (Yɩɩn. 119:37; Mat. 5:28) Yɩl n wõr d meng n kisg yoobã tõe n yɩɩ toog wʋsgo, la d modgrã pa na n yɩ zaalem ye. Bala, a Zeova na n ning-d-la barka.

¹³ Yɩl n wõr d meng n kisg yoobã, d pa segd n teeg d meng pãng ye. Rẽndame tɩ d paam a Zeova sõngre. D sã n teeg d meng wall ned a to, a Zeova sũur pa na n yɩ noog ye. Yɩɩn-gʋlsdã yeelame: ‘Ka wed-moaag pãng n noogd a Zeova sũuri, la ka ninsaal yãoog pãng n kõt-a sũ-noog ye.’ (Yɩɩn. 147:10) Yaa tɩlɛ tɩ d pʋʋsd a Zeova wakat fãa, n kot a sõngre. A pa na n tol n yɛ ne d pʋʋsgã kelgr ye. A Zeova ‘sũur nooma ne sẽn zoet-b yẽ wã, la ne neb nins sẽn maand tẽeb ne yẽ nonglmã.’ (Yɩɩn. 147:11) D tõe n kɩsa sɩd t’a nonglmã sẽn ka saabã yĩnga, a na n ket n sõngda tõnd tɩ d tõogd d tʋls-wẽnsã.

14. Bõe n keng yɩɩn-gʋlsdã pɛlga?

¹⁴ A Zeova ratame tɩ d bas d yam tɩ sẽn wa n yaa yell ning fãa n namsd tõndo, a na n sõng-d lame. Yɩɩn-gʋlsdã tagsa bũmb nins a Zeova sẽn da maand n sõngd Israyɛll nebã sẽn na yɩl tɩ b lebs n maneg Zerizalɛmmã yelle, n yeel t’a paasda tẽngã “kʋɩlemsã kʋɩlen-kuyã pãnga,” t’a ‘ningda kambã sẽn be a pʋgẽ wã barka,’ la t’a kɩtame tɩ ‘vɩ-bãan zĩnd soolmã pʋga.’ (Yɩɩn. 147:13, 14) Yaa vẽeneg tɩ yɩɩn-gʋlsdã sẽn da mi tɩ Wẽnnaam paasda tẽngã kʋɩlens pãng sẽn na yɩl n kogl a nin-buiidã, kenga a pɛlga.

15-17. a) Zu-loeesã mi n wata ne bõe, la wãn to la a Zeova sõngd tõnd ne a Gomdã maasem? b) Yɩɩn-gʋlsdã sẽn yeel t’a Zeova ‘gomdã saaga ne tʋʋlmã’ võor yaa bõe? Togs-y kibare.

¹⁵ Tõe tɩ y zu-loeesã kɩtame tɩ y maand yɩɩre. La bãng-y t’a Zeova tõe n kõ-y-la yam tɩ y bãng y sẽn na n maanega. Ad yɩɩn-gʋlsdã sẽn yeele: “Bãmb kɩtdame tɩ b noorã saag dũniyã gilli. Bãmb gomdã saaga ne tʋʋlem.” A paasame: “Bãmb kɩtdame tɩ neez rʋʋg wa pe-kõbdo, bãmb yɛdga meenem wa tompeglem. Bãmb fẽrgda b sapɩlm-zeremse.” Rẽ poore, a sokame yaa: “Ãnd soab n tõe n yals bãmb waoodẽ wã?” A leb n yeelame yaa: “Bãmb tʋmda b gomdã t’a yẽneg-ba.” (Yɩɩn. 147:15-18) Tõnd Wẽnnaam a Zeova mii bũmb fãa, a tõee bũmb fãa. A maanda a sẽn dat ne neezã la sapɩlmã. Dẽnd a tõe n sõng-y lame tɩ y mao ne zu-loɛɛg buud fãa.

¹⁶ Yaa ne Biiblã maasem la a Zeova wilgd tõnd sor rũndã-rũndã. Yɩɩn-gʋlsdã yeelame t’a Zeova “gomdã saaga ne tʋʋlem,” rat n yeel tɩ wakat fãa, a wilgda tõnd d sẽn segd n maanegã tao-tao. Tags-y n ges-y sõngr ning fãa y sẽn paamd Biiblã kareng pʋgẽ, tʋm-tʋmd sẽn tũud sɩd la sẽn tar yamã sẽn yiisd sɛb ninsã pʋgẽ, JW Télédiffusion wã pʋgẽ, jw.org sɩtã pʋgẽ, la ne kãsem-dãmbã la y tẽed-n-taas a taabã maasmã. (Mat. 24:45) Rẽ yĩnga, yãmb meng neeme tɩ wakat fãa, a Zeova sɩd sõngd-y-la tao-tao tɩ y bãng y sẽn segd n maaneg bɩ?

¹⁷ Saam-bi-poak a ye yʋʋr sẽn boond t’a Sɩmond tara kaset tɩ Wẽnnaam sɩd sõng-a-la ne a Gomdã maasem. Ra yaa ned sẽn tagsd t’a ka võore, la t’a Zeova sũur pa noom ne-a ye. La a sũur sã n da  mi n sãam hal t’a rat n koms raoodo, a wɩngda ne pʋʋsgo, n kot a Zeova sõngre, la a kell n wɩng ne Biiblã zãmsg me. Ad a sẽn yeele: “Sẽn wa n yaa a soab fãa, m neeme t’a Zeova ningda a nugu, n sõng-m la a wilg-m m sẽn segd n maanega.” Kɩtame t’a wae n tar tagsa sẽn kengd raood masã.

18. Bõe n kɩt tɩ y miẽ tɩ y yaa a Zeova zoa? Wilg-y bũmb kẽer sẽn kɩt tɩ y segd n pẽg a Zeova.

¹⁸ Yɩɩn-gʋlsdã ra miime tɩ buudã fãa sʋka, yaa Israyɛll buudã la a Zeova yãk tɩ b yaa a nin-buiidu. Yaa bãmb bal la Wẽnnaam vẽneg a “goamã” la a “noyã.” (Karm-y Yɩɩn-sõamyã 147:19, 20.) Rũndã-rũndã, tõnd me paamame n yaa a Zeova nin-buiidu, t’a boond tõnd t’a Kaset rãmba. Woto yaa zu-zẽkr tɛkẽ! D sũy yaa noog d sẽn paam n bãng Wẽnnaam, n paam me t’a wilgd-d sor ne a Gomdã maasem, tɩ rẽ fãa kɩt tɩ d paam n yaa a zo-rãmbã. Bʋʋm waoog sẽn kɩt tɩ y segd n dɩk Yɩɩn-sõamyã 147 gʋlsdã togs-n-taare, n pẽg a Zeova la y sagl y taabã tɩ bãmb me pẽg-a.