1, 2. Bõe yĩng t’a Zeova Kaset rãmbã wae n karemd Rom-dãmb 5:12?

ROM-DÃMB 5:12 yetame tɩ ‘yel-wẽnã waa dũni ned a yembr maasem yĩnga, tɩ yel-wẽnã wa ne kũum, tɩ nebã fãa kiidẽ, b fãa sẽn maan yel-wẽnã yĩnga.’ Tõnd mii vɛrse-kãngã sõma. D wae n karemd-a-la koe-moonegã sasa, la d sã n wa zãmsd nebã Biiblã.

² D sã n ges Biiblã sɩd yetame tɩ bõe? sebrã pʋgẽ, d yãta vɛrse-kãngã zĩis wʋsgo. D sã n zãmsd d kambã bɩ neb a taab seb-kãngã n wa ta sak a 3, a 5 la a 6, tõe tɩ d na n karma Rom-dãmb 5:12 wã, n wilg-b bũmb ning sẽn kɩt tɩ tẽngã pa arzãna, a Zeezi maoongã sẽn yaa tɩlɛ ne-dã võore, la bũmb ning sẽn kɩt tɩ d yaa kiidbã. La vɛrse-kãngã tõe n sõnga tõnd tɩ d maneg n wilg a Zeova tɩ d sũy nooma d sẽn paam n yaa a zo-rãmbã. A tõe n kɩtame me tɩ d tʋlg ne d sũur fãa n ta a Zeova yam, la d gũ bũmb nins a sẽn pʋlmã.

3. Yel-wẽnã wɛɛngẽ, bõe la d pa segd n yĩmi?

³ D fãa pa segd n yĩm tɩ d yaa yel-wẽn-maandb ye. Daar fãa, d kongdame. La a Zeova kʋmda tõndo. A tẽegdame tɩ d yaa tẽng tom, n sakd n kõt-d sugri. (Yɩɩn. 103:13, 14)  A Zeezi yeelame tɩ d pʋʋsd Wẽnnaam n kot d yel-wẽnã sugri. (Luk 11:2-4) D sã n da maana yel-wẽn t’a Zeova kõ-d sugr me, d pa segd n ket n tagsd rẽ yell n sãamd d sũur ye. La d sã n tẽegd bũmb ning sẽn kɩt t’a Zeova sakd n kõt-d sugrã, na n naf-d lame. Sõs-kãngã na n wilga a sẽn kõt-d sugrã võore.

4, 5. a) Bõe n sõng tõnd tɩ d wʋm Rom-dãmb 5:12 goamã võore? b) Bõe la b sẽn boond Rom-dãmb 3:24 pʋgẽ tɩ “Wẽnnaam barkã”?

⁴ D sã n karem Rom-dãmb sebrã, sẽn yɩɩd fãa a sak a 6, d bãngda bũmb ning sẽn kɩt t’a Zeova tõe n kõ tõnd d yel-wẽna sugrã. Sak a 3 wã pʋgẽ, a Poll yeelame tɩ nebã fãa yaa yel-wẽn-maandba. A paasame: “La Wẽnnaam barkã kɩtdame tɩ b zems fãagr Kirist Zezi maasem yĩnga, la bãmb paam-a-la zaalem.” (Rom. 3:23, 24, Wẽnnaam Sebre, 1983) Gɛrk gom-bil ning b sẽn lebg tɩ “barkã” bilgda f sẽn na n maan ned neere, t’a soab yaool n da pa segd ne rẽ, tɩ f pa gũudẽ me t’a rol-f ye.

⁵ Bãngd a ye yeelame tɩ Biiblã pʋgẽ, b sã n gomd Wẽnnaam ne a Zeezi sẽn maan tɩ yaa bark sẽn ka to, naoor wʋsgo, yaa b sẽn maan bũmb ning n na n fãag ãdem-biisã ne yel-wẽndã la kũumã. Dẽnd gom-bilã võor yaa “bark d sẽn pa segd ne.” La bõe la Wẽnnaam maan ninsaalbã yĩnga, tɩ yaa bark d sẽn da pa segd ne? Wãn to la rẽ sõngd tõnd tɩ d paam a zoodo, la kɩt tɩ d tẽed manegre? D gom rẽ yell masã.

6. Ãnd dãmb n tõe n paam Wẽnnaam barkã sẽn ka to wã?

⁶ A Ãdem n yaa ned ning sẽn kɩt tɩ yel-wẽnã kẽ dũniyã, tɩ kũum wa yel-wẽnã yĩngã. Rẽ n so tɩ Biiblã yeel tɩ “nin-yend yel-wẽnd waa ne kũum dũni pʋgẽ, la kũum lebga naaba.” (Rom. 5:17, Sebr Sõngo) A Zeova barkã sẽn ka to wã yĩnga, a maana bũmb sẽn kɩt tɩ ninsaalbã tõe n paam b mense, a Zeezi Kirist maasem yĩnga. (Rom. 5:12, 15) Biiblã paasame tɩ “ned a yembr tãa sakr yĩnga, b na n kɩtame tɩ neb wʋsg lebg tɩrse,” n “tõe n paam vɩɩm sẽn kõn sa, tõnd Zu-soab a Zeezi Kiris maasem yĩnga.”—Rom. 5:19, 21.

7. Bõe yĩng tɩ Wẽnnaam sẽn kɩt t’a Zeezi wa ki tɩ yɩ maoong tõnd yĩngã yaa bark d sẽn pa segd ne?

⁷ D tẽeg tɩ ra pa tɩlɛ t’a Zeova tʋm a Biigã t’a wa ki tɩ yɩ maoong tõnd yĩng ye. Sẽn paase, ninsaalbã sẽn pa zems zãngã, b ra pa tar b sẽn tõe n maan tɩ sek na kɩt t’a Zeova ne a Zeezi maan bũmb tɩ b tõe n paam b yel-wẽnã sugr ye. Rẽnd d sẽn paamd tɩ Wẽnnaam kõt tõnd d yel-wẽnã sugri, tɩ d saagd n na n wa n vɩɩmd wakat sẽn kõn sa wã sɩd yaa bark d sẽn pa segd ne. Togame tɩ d wilg bũmba fãa pʋgẽ tɩ d sũur nooma ne Wẽnnaam, a sẽn maan-d neer woto fãa wã.

8. Bõe la d pa segd n tagse?

⁸ D miime tɩ Wẽnnaam barkã sẽn ka to wã yĩnga, a sakd n kõta d yel-wẽnã sugri, baa d yel-wẽn-kãsemsã. La d pa segd n teeg rẽ, n tagsdẽ tɩ d sẽn maan a soab fãa, a na n kõo sugr ye. Tʋm-tʋmdbã sẽn wa n ket n vɩ wã menga, kiris-neb kẽer n da tagsd woto. (Karm-y Zʋʋd 4.) Tõnd me segd n maana gũusg rũndã-rũndã, n da wa bas tɩ tagsg a woto bul d sũurẽ ye. D sã n  zoe n tagsda woto d sũurẽ, bɩ d modg tɩ ra paam pãng ye.

9, 10. A Poll sẽn yeel tɩ yẽ ne a tẽed-n-taasã paama b mens ne yel-wẽnã la kũumã rat n yeelame tɩ bõe?

⁹ A Poll sagla kiris-nebã tɩ b gũus n da wa yetẽ tɩ: ‘Wẽnnaam yaa wʋmda. A pa na n ges m tʋʋm-wẽnsã ye. A kõta sugr wakat fãa.’ Bõe yĩnga? A Poll wilga a võore, n yeel tɩ kiris-nebã ‘yaa wa kũum ne yel-wẽnã yelle.’ (Karm-y Rom-dãmb 6:1, 2.) Bõe yĩng t’a yet tɩ b “yaa wa kũum” tɩ b yaool n da ket n vɩ?

¹⁰ A Zeezi sẽn ki tɩ yɩ maoongã yĩnga, Wẽnnaam kõo a Poll ne a tẽed-n-taasã b yel-wẽnã sugri. A zae-b-la ne a vʋʋsem sõngã tɩ b lebg a kamba, tɩ b sã n kell n sak-a bɩ b na n wa tɩ naag a Zeezi saasẽ n dɩ naam. La bõe yĩng t’a Poll yet tɩ b ‘yaa wa kũum ne yel-wẽnã yelle’? A Poll tẽega kiris-nebã a Zeezi sẽn yɩ ninsaala, n ki n vʋʋg n lebg malɛk n be saasẽ, n pa le tõe n ki wã. Kũum pa le tar pãng a Zeezi zug ye. Yel-wẽnã me pa le tar pãng sẽn paam-b vʋʋsem sõng zaeebã zugu, wa kũumã sẽn pa le tar pãng a Zeezi zugã. B lebga “wa kũum ne yel-wẽna yelle, la wa neb sẽn vɩ Wẽnnaam yĩnga, a Zeezi Kiris lagem-n-taarã pʋgẽ.” (Rom. 6:9, 11) B yel-manesmã toeema fasɩ, tɩ b pa le tũud b yĩngã ratem-wẽnsã ye. Dẽnd ne ‘yel-wẽnã yelle,’ b sɩd yaa wa kũum.

11. Bõe yĩng tɩ d tõe n yeel tɩ rũndã-rũndã me, kiris-nebã ‘yaa wa kũum ne yel-wẽnã yelle’?

¹¹ La rũndã-rũndã yẽ? D tõe n yeelame tɩ tõnd me ‘yaa wa kũum ne yel-wẽnã yell’ bɩ? N-ye. Nand tɩ d lebg kiris-nebã, d ra maanda yel-wẽn wʋsgo. Tõe meng tɩ d ra pa mi tɩ d sẽn maandã yaa wẽng wʋsg Wẽnnaam nifẽ ye. D tõe n yeelame tɩ d ra yaa “rẽgd la tʋʋm-wẽns yembse,” rat n yeel tɩ “yel-wẽna yembse.” (Rom. 6:19, 20) La d sẽn wa n zãms Biiblã n bãng Wẽnnaam sẽn dat tɩ d vɩɩmd to-to wã, d toeemame, n dɩk d meng n kõ Wẽnnaam n deeg lisgu. Rẽ tɛka, d rata ne d sũy faa n tũ a Zeova noyã la a saglsã, n paam n ta a yam. D paama d mens ne ‘yel-wẽnã yembdã,’ n lebg “tɩrlem yembse.” (Rom. 6:17, 18) Dẽnd d tõe n yeelame tɩ tõnd me ‘yaa wa kũum ne yel-wẽnã yelle.’

12. Bõe la tõnd ned kam fãa tõe n yãk yam n maane?

¹² Baasgo, yaa tõnd n yãkd d sã n na n basame tɩ yel-wẽndã le soog-do. Tʋm-tʋmd a Poll ra yeelame: ‘Da sak-y tɩ yel-wẽnd le rɩ naam y yĩn-kiidgã zug ye; da le sak-y-yã a tʋls-wẽnsã ye.’ (Rom. 6:12, Sebr Sõngo) Rẽnd d tõe n basame tɩ d tʋls-wẽnsã soog-do, wall d mao n tõog-ba. Bɩ d sok d menga: ‘Mam basame tɩ m tʋls-wẽnsã paamd pãnga, hal n kɩt tɩ m maand wẽng bɩ, bɩ m modgd n yiisd-b-la m yamẽ tao-tao?’ D sã n dat n wilg tɩ d sũur nooma ne Wẽnnaam, a barkã sẽn ka to wã yĩnga, d na n maana d sẽn tõe fãa n ta a yam.

13. Bõe n wilgd tɩ d tõe n maana sẽn yaa tɩrga?

¹³ Pipi kiris-nebã wakatẽ, Korẽnt tigingã neb kẽer da yɩɩ wagda, neb sẽn da zãmbd b pagb wall b sɩdba, bõn-naands pʋʋsdba, neb sẽn da yũud rãam n suuda, tɩ pagb kẽer da kẽed ne pagba, tɩ rap kẽer me ra kẽed ne rapa. La b sẽn wa n bãng a Zeova, n nong-a wã, b tõog n toeemame. B sã n da mi n tẽeg b pĩnd tʋʋmã, yãnd tar-b lame. (Rom. 6:21; 1 Kor. 6:9-11) Rom tigingã  neb kẽer me ra segd n mao n basa zʋg-wẽns la minim-wẽns a woto buudu. A Poll ra yeel-b lame: “Da rɩk-y y yĩngã will n kɩs yel-wẽnã tɩ yɩ ka-tɩrlem tʋʋm teed ye. Kõ-y y mens Wẽnnaam, wa neb sẽn vʋʋg n yi kũum sʋk n vɩ, la y kõ Wẽnnaam y yĩngã wil tɩ yɩ tɩrlem tʋʋm teedo.” (Rom. 6:13) A Poll ra kɩsa sɩd t’a tẽed-n-taasã sẽn be Rommã tõe n maana sẽn yaa tɩrga, tɩ Wẽnnaam barkã sẽn ka to wã ket n nafd-ba.

14, 15. Bõe la d segd n sok d menga?

¹⁴ Rũndã-rũndã me, d tẽed-n-taas kẽer ra yaa wa Korẽnt tigingã neb nins yell d sẽn gomã. La b sẽn wa n bãng a Zeova wã, b tõog n toeemame, n ‘paam pekre.’ Sẽn na yɩl n ta a Zeova yam, tõnd ned kam fãa me toeema bũmb wʋsg a vɩɩmã pʋgẽ. La baa masã, d rat n wilgame tɩ d sũur nooma ne Wẽnnaam, a barkã sẽn ka to wã yĩnga. Rẽ n so tɩ d rat ne d sũur fãa n mao ne d tʋls-wẽnsã, n maan a raabã d vɩɩmã tõre.

¹⁵ Yaa vẽeneg tɩ d segd n gũusame n da wa maand yel-wẽn-kãsems nins Korẽnt kiris-neb kẽer sẽn maanã ye. D pa tõe n maand yel-wẽn a woto buudu, n tagsdẽ tɩ Wẽnnaam barkã sẽn ka to wã yĩngã, a na n kõ-d-la sugr ye. La yel-wẽn nins neb kẽer sẽn get tɩ pa maneg n yaa wẽngã yẽ? Tõnd modgdame n sakd a Zeova baa yaa yel-kãens wɛɛngẽ bɩ?—Rom. 6:14, 17.

16. Bõe n wilgd tɩ pa yel-wẽn nins b sẽn sõdg 1 Korẽnt-rãmb 6:9-11 pʋgẽ wã bal la d pa segd n maane?

¹⁶ D tẽeg tʋm-tʋmd a Poll yelle. D tõe n kɩsa sɩd t’a ra pa maand yel-wẽn nins a sẽn sõdg 1 Korẽnt-rãmb 6:9-11 pʋgẽ wã ye. Baasgo, a yeelame tɩ yẽ yaa yel-wẽn-maanda. Ad a sẽn yeele: “Mam yaa yĩnga, yel-wẽn sẽn so n maand a sẽn dat ne. Bala, bũmb nins mam sẽn maandã, mam ka wʋmd b võor ye. Mam sẽn dat n maan bũmb ninsã, mam ka maand ye, la mam yaool n maanda bũmb nins mam sẽn kisã.” (Rom. 7:14, 15) Woto wilgdame tɩ bũmb a taab me la a Poll ra get tɩ yaa yel-wẽna, n da maood n pa rat n maan dẽ ye. (Karm-y Rom-dãmb 7:21-23.) Bɩ tõnd me rɩk a togs-n-taare, n maand d sẽn tõe fãa n sakd a Zeova.

17. Bõe yĩng tɩ y rat n yɩ pʋ-peelem dãmba?

¹⁷ D miime tɩ ned sã n dat n tũ a Zeova, yaa tɩlɛ t’a yɩ pʋ-peelem soaba. (Karm-y Yel-bũn 14:5; Efɛɛs-rãmb 4:25.) D pa rat n yɩ wa a Sʋɩtãan sẽn yaa “zĩrẽ wã ba” wã ye. D tẽeg me t’a Hananiyaas ne a pagã kii b sẽn yag ziri yĩnga. Rẽnd d pa rat n yagd ziri ye. (Zã 8:44; Tʋʋ. 5:1-11) La pʋ-peelem soab pa ned sẽn pa yagd ziri bal ye. D sã n dat n wilg tɩ d sũur nooma ne Wẽnnaam barkã sẽn ka to wã, d na n yɩɩ pʋ-peelem dãmb bũmb a taabã me pʋgẽ.

18, 19. Bõe n wilgd tɩ ned tõeeme n pa yag ziri, n yaool n pa maan pʋ-peelem?

¹⁸ Bũmb ning pʋgẽ, ned tõeeme n pa yag ziri, n yaool n pa maan pʋ-peelem ye. A Zeova ra yeela Israyɛll nebã yaa: “Bɩ y ra zu ye. Bɩ yãmb ned ba a yembr da rõd a tẽng-n-bi-taaga, la ra-y zãmb-y-yã-a ye.” Bõe yĩng tɩ ra yaa tɩlɛ tɩ b tũ no-kãnga? A Zeova da reng n yeel-b lame: “Yɩ-y pʋ-peelem dãmba, bala, maam a Sẽn-Ka-Saab sẽn yaa yãmb Wẽnnaamã yaa pʋ-peelem soaba.” (Maan. 19:2, 11)  Ned tõeeme n pa yag ziri, la a sã n kɩt t’a taabã tẽ bũmb sẽn pa sɩda, a pa maan pʋ-peelem ye.

¹⁹ Wala makre, ned tõe n yeela a tʋʋmd taoor soaba, wall a tʋmd-n-taas t’a na n siga pĩnda, bala a rat n tɩ yãa logtore. La yaool n pa rẽ yĩng la a sẽn dat n loog pĩndã ye. Yaa sẽn na yɩl n tɩ segl a meng n tog sore, wall a tall a zakã rãmb tɩ b tɩ kok pemsem. A sẽn yeel t’a na n tɩ yãa logtorã yaa sẽn na n pɩʋʋg n da tɩɩm bala, wall a pɩʋʋg logtor-yir n yao samde. Woto wã, a maana pʋ-peelem ne a taabã sɩda? A kɩtame tɩ b tẽ bũmb sẽn pa sɩda. Wakat ninga, nebã belgda b taab sẽn na yɩl n paam bũmbu, wall b gil sɩbgre. La tõnd yẽ tũuda a Zeova noyã. D tẽeg t’a yeelame tɩ d ra ‘zãmb’ d to ye. D rat n maana bũmb ning fãa a sẽn yet tɩ yaa sõma la tɩrga.—Rom. 6:19.

20, 21. D sũur sã n nooma ne Wẽnnaam bark sẽn ka to wã, bõe la d pa na n maane?

²⁰ Yaa vẽeneg tɩ d pa na n sak n zãmb d pag bɩ d sɩda, d pa na n yũ rãam n su wall d maan yel-wẽn-kãsems a taab ye. La d tolg n dat n laka d meng ne bũmb ning fãa sẽn tõe n sãam a Zeova sũuri. Wala makre, d pa rat n yo, la d pʋd n lakda d mens ne filim bɩ sɛb sẽn wilgd yoob yɛla. D pa na n yũ rãam n su, la d pʋd n pa rat n yũ n kolg suub ye. Yɩl n tõog n lak d mens ne bõn-kãensã fãa, ned kam fãa tog n maoo wʋsgo, la tõeeme.

²¹ D rata ne d sũur fãa n tũ saglg ning a Poll sẽn kõ wã. A ra yeelame: ‘Da sak-y tɩ yel-wẽnd le rɩ naam y yĩn-kiidgã zug ye; da le sak-y-yã a tʋls-wẽnsã ye.’ (Rom. 6:12, Sebr Sõngo; 7:18-20) Yaa sɩd tɩ d pa tõe n pa wa kong wakat ning ye. La d sã n maood n dat n gil yel-wẽnd buudã fãa, d wilgda Wẽnnaam ne Kiristã tɩ d sũur yaa noog b bark sẽn ka to wã yĩnga, la tɩ d pa zɩ-beoog rãmb ye.

22. D sã n wilgdẽ tɩ d sũur nooma ne Wẽnnaam, a bark sẽn ka to wã yĩnga, d keoor na n yɩɩ bõe?

²² Wẽnnaam barkã sẽn ka to wã yĩnga, a kõo tõnd d yel-wẽnã sugri, n tõe n ket n kõt-d sugri. Bɩ d fãa wilg tɩ d sũur nooma wʋsg ne rẽ, n mao n da maand bũmb nins a sẽn yeel tɩ yaa wẽngã, baa neb kẽer sã n tagsdẽ tɩ sãnda pa tolg n yaa yel-wẽna. D sã n maand woto, d keoor na n yɩɩ bõe? Ad a Poll sẽn yeele: “Yãmb sẽn paam yolsg n yi yel-wẽnã yembdẽ n lebg Wẽnnaam yembsã, yãmb bi-womdɩ yaa maneg n yɩ yɩlemde, la a baoosg yaa vɩɩm sẽn kõn sa.”—Rom. 6:22.