Ges-y sẽn be pʋgẽ wã

Ges-y sẽn be sebrã pʋgẽ

NED VƖƖM KIBARE

Mam lebga bũmbã fãa, nebã fãa yĩnga

Mam lebga bũmbã fãa, nebã fãa yĩnga

Daar a ye, m baaba yeela m ma yaa: “Fo sã n deeg lisgu, m na n bas-f lame!” Yɩɩ yʋʋmd 1941. Baa m baaba sẽn yeel woto n na n bugs m ma wã, a pa koms raood ye. A reega lisgu, n na n wilg t’a rɩka a meng n kõ a Zeova. M baaba maana a sẽn da yeelã. A sɩd loogame n bas tõndo. Rẽ tɩ m tara yʋʋm a nii bala.

SẼN deng wakat kãng meng tɩ mam da zoe n nonga Biiblã goamã. M ma ra paamda siglgã sɛba, tɩ m da nong seb-kãense, sẽn yɩɩd fãa fot-rãmbã. M baaba ra pa rat tɩ m ma wilg maam a sẽn da zãmsd Biiblã pʋgẽ wã ye. La m da sokda sogsg wʋsgo. Rẽ n so tɩ m ma ra zãmsd maam Biiblã, m baaba sã n wa pa be zakẽ. Kɩtame tɩ ma-me wa yãk yam n na n dɩk m meng n kõ a Zeova. M deega lisg yʋʋmd 1943 wã, Balakpull, Ãngeletɛɛr soolmẽ wã. M da tara yʋʋm piiga.

MAM KẼESA M MENG A ZEOVA TƲƲMDÃ PƲGẼ

M lisgã tɛka, maam ne m ma ra tũuda taab n moond koɛɛgã wakat fãa. Wakat kãng tɩ yaa fonograf-rãmb la d ra tar n taasd nebã koɛɛgã. Fonograf fãa ra yaa bedre, n zɩsa, t’a zɩslmã tõe n ta kilo a naas la pʋɩ-sʋka. Mams-y n ges-y yʋʋm piig la zak biig sẽn zãad bũmb sẽn zɩs woto.

Mam sẽn wa n tar yʋʋm 14, m tʋlg n na n lebga so-pakda. La m ma yeela maam tɩ m segd n deng n goma ne tigims sull yel-gɛtã n gese. Yel-gɛtã sagla maam tɩ m deng n zãms nug-tʋʋmde, tɩ m sã n wa sɩng so-pakrã, bɩ m tõog n get m meng yelle. M tʋma yʋʋm a yiibu. Rẽ poore, m togsa tigims sull yel-gɛt a to tɩ m dat n lebga so-pakda, t’a yeel yaa: “Yaa sõma. Sɩnge!”

Woto wã, yʋʋmd 1949 tʋʋl-nif kiuugã, maam ne m ma koosa d roogã teed kẽere, n dɩk sãnda n kõ, la d yik n kẽng Midollton sẽn pẽ Mansɛstɛɛrã, n tɩ sɩng so-pakrã. Kiis a naas poore, maam ne saam-biig n zems taab n na n yɩ tũud-n-taas so-pakrã tʋʋmd pʋgẽ. Filiyallã kosa tõnd tɩ d tɩ sõng Irlam tiging a ye sẽn nan lugl paalem. M ma ra bee tiging a to, tɩ yẽ ne saam-bi-poak sẽn yaa so-pakd me tũud taab n moondẽ.

Baa m sẽn da tar yʋʋm 17 balã, b yãka maam ne m tũud-n-taagã tɩ d ra lʋɩt taoor n wɛgsd sõss tigissã sasa, bala saam-biis sẽn tar minim da pa waoog ye. B wa n kosa maam tɩ m tɩ sõng Bogston tigingã, bala be koe-moondbã ra paooda wʋsgo. Mam getame tɩ tʋʋm nins fãa b sẽn kõ maam m so-pakrã sɩngrẽ wã kɩtame tɩ m paam minim sẽn sõng-ma, b sẽn wa n kõ-m tʋʋm a taabã.

Maam ne m tẽed-n-taas sẽn boond neb tɩ b wa kelg zãma taoor sõsga. Yɩɩ yʋʋmd 1953, Rokɛstɛɛr, Niuyorke

Yʋʋmd 1951 wã, mam kosame n na n kẽng Gileyaad lekollã. La 1952 yʋʋm-sar kiuugã, b boola maam sodaarã. M yeela sodaarã yell bʋ-kaoodbã tɩ mam yaa wakat fãa koe-moonda, sẽn na yɩl tɩ b sak tɩ m da kẽ sodaarã ye. B zãgsame, n yeel tɩ b kẽes maam bãens roog kiis a yoobe. M sẽn wa n ket bãensã roogã, b gʋlsa maam lɛtre, n bool-m tɩ m wa Gileyaad lekoll 22 soabã. Yʋʋmd 1953 sẽoog kiuugã, mam kẽe batayo b sẽn boond tɩ Georgic n na n kẽng Niuyorke.

Mam sẽn ta wã, m paam n kẽnga yʋʋmd 1953 tigis-kãsengã. A gom-zugã yɩɩ “ La société du monde nouveau. ” Rẽ poore, mam kẽe tẽr n na n kẽng Saflãnsĩng sẽn be Niuyorkã, bala lekollã ra bee be. M sẽn da nan yi bãens roogã, m da pa tar ligd wʋsg ye. Tẽrã sẽn ta gaarẽ wã, m da segd n kẽe biis n paam n ta Saflãnsĩng. M kong n penga so-toagd a ye ligd bilf n na n yao biisã ligdi.

B TƲMA MAAM TẼN-ZẼNGA

Gileyaad lekollã sõnga tõnd tɩ d paam minim, sẽn na yɩl tɩ misioneeremdã pʋgẽ bɩ d tõog n “yɩ bũmbã fãa, nebã fãa yĩnga.” (1 Kor. 9:22). Lekollã poore, b tʋma maam ne a Paul Bruun la a Raymond Leach Filipin soolmẽ wã. D gũu kiis a wãn n yaool n na n tõog n paam d so-toakã sɛba. Rẽ poore, tõnd kẽe batayo n pasg Rotɛrdam, Mediterane mogrã, Kanalldesʋɛɛz, Oseyã ẽndiyẽ wã, Malɛzi la Hõng Kõng. Yɩɩ rasem 47 la d maan mogrã zugu. Yʋʋmd 1954 sɩpaolg rasem 19 la d ta Maniy sẽn yaa Filipin na-tẽngã.

Maam ne m misioneer-taag a Raymond Leach. D maana rasem 47 batayo pʋgẽ n yaool n na n ta Filipin

D ra segdame masã n minim tẽng a to pʋgẽ vɩɩm, n minim a nebã, la d zãms b buud-gomdã. La b reng n kɩtame tɩ tõnd d tãabã kẽng Kezon tiging a ye pʋgẽ. Tẽn-kãng nebã wʋsg ra gomda ãngilindã. Rẽ n so tɩ kiis a yoob poore, tõnd sẽn tõog n zãms yaa tagaloogã gom-biis a wãn bala. La b wa n kõo tõnd tʋʋmd a to, tɩ rẽ sõng-d tɩ d zãms buud-gomdã sõma.

Yʋʋmd 1955 sig-noy kiuugã, tõnd yii koe-moonegã daar a ye n lebg n wa, n mik lɛta b sẽn tool maam ne saam-biig a Leach. B yeela lɛta wã pʋgẽ tɩ b yãka tõnd tɩ d na n yɩ tigims sul yel-gɛtba. M da tara yʋʋm 22 bala, la tʋʋm-kãnga paka sor tɩ m na n le maan bũmb a taaba, n kell n “yɩ bũmbã fãa, nebã fãa yĩnga.”

Bikoll buudã gomd tigis-kãseng sasa, tɩ mam wɛgsd sõsga

Wala makre, mam sẽn lebg tigims sull yel-gɛtã, mam pipi zãma taoor sõsg yɩɩ zĩ-vɩʋʋgẽ, tẽn-bil a ye butik noore. M wa n bãngame tɩ wakat kãnga, Filipin saam-biisã ra tagsdame tɩ sẽn na yɩl tɩ sõsg sɩd yɩ zãma taoor sõsga, rẽnda yɩ zĩ-vɩʋʋgẽ. M sẽn wa n gilgd n kaagd tigimsã, m da wɛgsda sõss zãn tẽngre, raasẽ, meeri-rãmb noy, baskɛtboll tãoob zĩisẽ, zardẽ-rãmbẽ, la naoor wʋsg menga, soayã kɩremse. Daar a ye, Sãnpablo tẽngẽ wã, saag n kɩt tɩ m da pa tõe n wɛgs m sõsg raagẽ ye. Mam yeela kãsem-dãmbã tɩ d tõe n kẽnga Rĩungã roogẽ. Sõsgã poore, saam-biisã soka maam tɩ sẽn pa yɩ zĩ-vɩʋʋgẽ wã, rẽ yĩnga yaa zãma taoor sõsg sɩda?

Wakat fãa mam da sigda saam-biisã zagsẽ. Baa b rotã sẽn da pa ro-bɛdã, ra yaa yɩlma. Mam gãagã zĩig wae n yaa pĩir b sẽn tɩʋ tẽn-lamdã sẽn lud ne ra-pɛgdã zugu. Ko-solsã ra pa gũbg ye. Mam-me ra maanda wa nebã, n sood yɩng ne futu. Mam sã n da na n tog sore, m da kẽeda kaar bɩ biisi. La m sẽn dabdẽ wã sã n yaa koom sʋk tẽnga, m kẽeda batayo. Mam sẽn kẽes m meng zãng a Zeova tʋʋmdã pʋgẽ wã tɛka, m zɩ n paam m toor mobill ye.

Koe-moonegã la tigimsã kaagr sõnga maam tɩ m zãms tagaloogã. Mam pa tol n paam tɩ b zãms maam buud-gomdã woto ye. Yaa m sẽn da kelgd m tẽed-n-taasã koe-moonegã sasa la tigissã sasa wã n sõng-m tɩ m zãmse. M tẽed-n-taasã ra rata ne b sũur fãa n sõng-m tɩ m bãng b buud-gomdã. M pʋʋsd-b-la bark b sẽn sõng maam ne sũ-mar la ne pʋ-peelmã.

B wa n kõo maam tʋʋm a taaba, tɩ kɩt tɩ m le sak n toeem bũmb kẽere. Yʋʋmd 1956, tigis-kãseng n zĩnd Filipin soolmã tõr yĩnga, tɩ saam-biig a Nathan Knorr wa. B yãka maam tɩ m segd n ges tɩ nebã paam kibay tigs-kãsengã zugu. Mam da pa tar tʋʋmdã minim ye. La neb a taab n sak n sõng-ma. Sẽn pa yã n ta yʋʋmde, tigis-kãseng a to n le zĩnd tẽngã tõr yĩnga. So-kãnga, yɩɩ saam-biig a Frederick Franz sẽn da tʋmd tõnd biru-kãsengẽ wã n wa. Maam n da yaa tigis-kãsengã yel-gɛta. M paam n dɩka yam saam-biig a Franz nengẽ. A ra mi n sakd n toeemda a sẽn maandã tɩ zemsd ne nebã minimdu. Saam-biig a Franz yeelga tagaloog-rãmbã fuug n wɛgs a zãma taoor sõsgã. Rẽ sɩd yɩɩ saam-biisã noogo.

B wa n yãka maam tɩ m lebg distrik yel-gɛta. Kɩtame tɩ m da segd n sak n toeem bũmb kẽer yɛsa. Wakat kãnga, tõnd da wilgda nebã filim ning gom-zug sẽn yaa “ Le bonheur de la société du Monde Nouveau ” wã. La wae n yaa zĩ-vɩʋʋgẽ. Sasa ninga, bõn-yɩgdsã namsda tõndo. Yaa masĩn ning d sẽn da tar n ningd filmã bugum n boond-ba. B pʋd n kẽeda masĩnã pʋgẽ. Filmã poore, yɩl n yiis-b masĩnã pʋgẽ yaa tʋʋm-saalg menga! Yɩl n sigl bũmba fãa n tõog n ning filmã tɩ nebã gesã pa nana ye. La d sã n da ne gɛtbã sũy sẽn noom to-to, b sẽn bãng t’a Zeova nin-buiidã bee dũniyã gill zugã, d yĩmda d naongã.

Katolikã taoor dãmb ra tõgda tẽngã taoor dãmb kẽer sẽn na yɩl tɩ b ra kõ tõnd sor tɩ d maan d tigis-kãsemsã, wall sã n mik tɩ tigis-kãsengã zĩig pẽe b wẽnd-doogo, b wẽeda lombrã n tiisd tigsgã. Baasgo, a Zeova tʋʋmdã kẽnga taoore. Rũndã-rũndã, zĩ-kãens nebã wʋsg yaa a Zeova Kaset rãmba.

TƲƲM SẼN KƖT TƖ M LE SAK N TOEEM BŨMB KẼERE

Yʋʋmd 1959 soabã pʋgẽ, b gʋlsa maam lɛtr n yeel tɩ b ratame tɩ m tɩ tʋm filiyallẽ wã. Beenẽ, m paam n zãmsa bũmb a taaba. B wa n kosa maam tɩ m gilgd n kaagd tẽns a taab filiyall-dãmba. Filiyall a ye kaagr sasa, mam bãnga Taylãnd misioneer-poak yʋʋr sẽn boond t’a Janet Dumond. Rẽ tɛka, d ra gʋlsda taab lɛta. Tarẽ-n-tarẽ, d wa n kẽe kãadem. Yʋʋm 51 la woto d sẽn naag taab n tʋmd a Zeova tʋʋmdã hal tɩ kõt-d sũ-noogo.

Maam ne a Janet. Yaa Filipin koom sʋk tẽng a yembrẽ

A Zeova Kaset rãmb sẽn be tẽns 33 pʋgẽ la m gilg n kaage. M sũur nooma ne tʋʋm nins b sẽn kõ-m m so-pakrã sɩngrẽ wã, bala sõnga maam tɩ m paam minim, tɩ rẽ naf-ma, m sẽn wa n gilgd n kaagd filiyall-dãmba, n da segd n tʋm ne neb buud toor-toorã. Filiyall-dãmbã kaagr kɩtame tɩ m bãng buud a taab minimdu, la kɩt me tɩ m sɩd neẽ t’a Zeova nonga neb buud fãa.—Tʋʋ. 10:34, 35.

Tõnd maanda d sẽn tõe, n ket n wɩngd ne koɛɛgã moonego

M KET N SAKD N TOEEMDA BŨMB KẼERE

Tõnd sẽn be Filipin soolmẽ wã, n naag d tẽed-n-taasã n tʋmd a Zeova tʋʋmdã nooma tõnd wʋsgo! Rũndã-rũndã, koe-moondbã sõor yɩɩda m sẽn wa n wa paalmã naoor piiga. Maam ne a Janet ket n tʋmda Filipin filiyallẽ wã. Filiyallã bee Kezon. Yʋʋm 60 la zak la m sẽn be tẽn-zẽng n tʋmd a Zeova tʋʋmdã. La m ket n neeme tɩ yaa tɩlɛ tɩ m sakd n toeemd bũmb kẽer sẽn na yɩl n maan a Zeova sẽn dat fãa. Bũmb nins b sẽn toeem siglgã pʋgẽ sẽn nan pa kaoosã kɩtame tɩ yaa tɩlɛ tɩ d ket n sakd n toeemd bũmb kẽere, n tõog n tʋm a Zeova tʋʋmdã, n sõng d saam-biisã.

A Zeova Kaset rãmbã sõor sẽn tar paasgã kõta tõnd sũ-noog wakat fãa

Tõnd maanda d sẽn tõe, n sakd bũmb ning fãa d sẽn mi tɩ yaa a Zeova raabo. Woto kɩtdame tɩ ned vɩɩm tall barka. Tõnd maoome me n toeem bũmb kẽere, n tõog n tʋm n sõng d tẽed-n-taasã sõma. A Zeova sã n sake, d na n ket n maooda ne d sũy fãa n lebgd “bũmbã fãa, nebã fãa yĩnga.”

Tõnd ket n tʋmda Filipin filiyallẽ wã, Kezon