Yãmb karma Gũusg Gasg nins b sẽn yiis yaoolmã bɩ? Bɩ y ges y sã n tõe n leoka sogs-kãensã:

Yaa kong bʋs yell la a Zeezi da rat n gome, a sẽn wa n kõt sagls nins sẽn be Matye 18:15-17 wã?

Yaa kongr neb sẽn tõe n welg bãmb ne taab sʋk bala. La yaa kongr sẽn sek b na yiis sẽn kong-a soabã tigingã pʋgẽ, a sã n pa sak tek yam. Tõe n yɩɩ wa kãnegre, pa rẽ bɩ zãmb wall wẽgbo.—w16-MM 1/5 s.n. 11, 12.

Bõe la d tõe n maan tɩ Biiblã kareng naf-do?

D bao n bãng bõn-paala, la d sok d meng sogsgo. Wala makre: ‘Wãn-wãn la m tõe n tũ m sẽn bãngã? Wãn to la m tõe n dɩk-a n sõng neda?’ D leb n tõe n tũnuga ne tʋʋm-teed nins siglgã sẽn kõ-dã, n bao bãngr d sẽn karmã zug n paase.—w16-MM 1/5 s.n. 29-31.

Kiris-nebã sẽn tẽed kũum vʋʋgrã, b ned sã n maan kaalem tɩ b wilg b sũ-sãanga, yaa wẽng bɩ?

Kiris-nebã sẽn tẽed kũum vʋʋgrã pa kɩt tɩ b ned sã n maan kaalem bɩ pa sãamd b sũy ye. Biiblã wilgame t’a ‘Abrahaam yãba a Saara kʋʋrã.’ (Sɩng. 23:2) Tarẽ-n-tarẽ, sũ-sãangã wat n boogame.—w16-MM 1/5 s.n. a 4.

Ezekɩyɛll sak a 9 wã pʋgẽ, rao ning sẽn zãad bũmb sẽn tar n gʋlsdẽ, la rap a yoobã sẽn zãad sãang zab-teedã makda ãnd dãmba?

D bãngame masã tɩ b makda saasẽ pãens-rãmb sẽn da na n sãam Zerizalɛm, la sẽn na n sãam a Sʋɩtãan dũniyã Armagedõ zabrã sasa. Rao ning sẽn zãad bũmb sẽn tar n gʋlsdẽ wã makda a Zeezi. To-kãsengã sasa, a Zeezi na n geelga sẽn na n põs-bã wa piisi, tɩ yɩ wa a sẽn ning-b bãnde.—w16-MM 1/6 s.n. 16-17.

Bõe n da tõe n kɩt tɩ Biiblã pa be rũndã-rũndã?

1) Yɩɩ papiris la gãnd zug la b sɩng Biiblã gʋlsgo, tɩ rẽ ra tõe n kɩt t’a pa ketẽ ye. 2) Politikã neb sãnda ne tũudum taoor dãmb me n bao n na n kɩt t’a menem fasɩ. 3) Kẽer me bao n na n toeema a goamã.—w16-MM 1/7 s.n. a 4-7.

Bõe la kiris-ned tõe n maane, n da gĩd a vɩɩmã ne bũmb wʋsgo?

Bao-y n bãng-y sẽn sɩd yaa tɩlɛ ne-yã. Ra n da-y bũmb sẽn pa tɩlɛ ye. Mag-y n ges-y ligd ning y sẽn tõe n yiis semen fãa wall kiuug fãa tɩ zems y tõogo. Kõ-y teed nins y sẽn pa le ratã, wall y koose. Yao-y y samã tao-tao. Tags-y n ges-y y sẽn tõe n maan to-to n boog sẽk ning y tʋʋmdã sẽn dɩkdã. Mag-y y sẽn tõe n maan to-to n paas y koe-moonegã.—w16-MM 1/7 s.n. 12.

Biiblã wilgdame tɩ bõe n tar yõod n yɩɩd sãnem bɩ wanzuri?

Zoob 28:12, 15 wilgdame tɩ yam ning sẽn yit Wẽnnaam nengẽ wã tara yõod n yɩɩd sãnem bɩ wanzuri. Y sẽn baood yam-kãngã, bɩ y ket n bɩɩsd sik-m-menga, la y paasd y tẽebã pãnga.—w16-MM 1/8 s.n. 18-19.

Saam-biig sã n dat n bas a toɛɛnga, sakdame bɩ?

Zĩis kẽere, kiris-ned sã n bas a toɛɛnga, n maneg tɩ sakd gesgo, pa wẽng ye. A sã n moond koɛɛgã, pa tiisd nebã ye. La kẽer yãka yam n pa basdẽ ye. (1 Kor. 8:9) Zĩis a taab me, nebã getame tɩ koe-moond sã n bas a toɛɛnga, pa zems ye.—w16-MM 1/9 s.n. 21.

Bõe yĩng t’a Zeezi bɛɛbã wẽ no-koeemd ne-a, nusã pɛgsg wɛɛngẽ?

A Moyiiz tõogã ra wilga bũmb toor-toor sẽn tõe n kɩt tɩ ned lebg rẽgdo. Wala makre, rao sã n bẽed a taoorẽ, pag sã n yã a pekre, ned sã n bẽed wãoodo, la ned sã n sɩɩs ninsaal wall rũng sẽn ki. La zʋɩf-rãmbã karen-saam-dãmb b sẽn boond tɩ rabẽ-rãmbã wa n paasa noy a taaba. Rẽ n wa ne no-koɛɛmã.—w16-MM 1/8 s.n. 30.

Bõe n wilgd tɩ ned sẽn tar yam yaa toor ne ned sẽn tar bãngre, la ned sẽn tõe n wʋm bũmb võore?

Ned sẽn tar bãngr yaa ned sẽn mi bũmb ka tɛka. Ned sẽn tõe n wʋm bũmb võor yaa ned sẽn tõe n fees yell n bãng a vɩʋʋgo. La ned sẽn tar yam yaa ned sẽn tar bãngre, n tõe n wʋm bũmb võor me, la sẽn tõe n kɩt tɩ rẽ sõng-a t’a sẽn maand fãa tall nafa.—w16-MM 1/10 s.n. 18.