Ezayi sebre 57:1-21
57 Nin-tɩrg kiidame,la ned baa a ye toog kae ye.
Kũum dɩkda sẽn maand-b sɩdã,+tɩ ned baa a ye pa mi tɩ yel-beedn loog ne nin-tɩrg ye.
2 Yẽ paamda bãane.
Neb nins fãa sẽn kẽnd ne pʋ-peelmã vʋʋsda b gãasẽ.*
3 “La yãmba, pag sẽn yaa tɩɩm soab kom-dibli,rao sẽn yood la pʋg-yoodr kamba,kolg-y-yã:
4 Ãnd la yãmb sẽn laadã?
Ãnd la yãmb sẽn yaag y noorã yaleng la y wõogd y zɩlmã n laadẽ wã?
Yãmb pa beegr kamba,zãmb kamba,+
5 b rãmb nins yoob ratem sẽn dɩt wa bugum tɩ-bɛd sʋka,+la tɩ-bedr sẽn tar vãad wʋsg fãa tẽngrã,+la b rãmb nins sẽn kʋʋd kamb lond* pʋsẽ+la pĩis pẽgsẽ wã sɩda?
6 Fo pʋɩɩr yaa longã* kug-saalã.+
N-ye, bãmb la fo pʋɩɩre.
La bãmb zut me, fo pʋdgda divẽ n maand maoongo, la f kõt-b kũuni.+
Mam sũur na yɩ noog ne bõn-kãensã sɩda?
7 Fo segla f gãagã tãng sẽn zãnt n yaa lug-lug zugu,+la fo rʋʋ be n na n maan maoongo.+
8 Fo kʋɩlengã ne a lugã poore, fo lugla bũmb tẽegr yĩnga.
Fo basa maam n yees f futu.Fo rʋʋme n yalg f gãagã zĩiga.
Fo maana kaool ne bãmba.
Fo ra nong n gãee ne bãmba,+la fo gesa bãmb raoolmã kuii.*
9 Fo kẽnga a Melɛk* nengẽ ne kaam,la ne parfẽ-rãmb wʋsgo.
Fo tʋma f koe-taasdbã zĩ-zãrgẽ,hal tɩ kɩt tɩ fo sig Yaoogẽ.*
10 Fo namsa f meng n tũ f soayã sẽn yaa wʋsgã,la fo pa yeel tɩ ka neng ye.
Fo lebs n paama pãnga,
rẽ n so tɩ f pa koms raood n bas ye.*
11 Ãnd soab la fo zoe la f yɛɛse,tɩ kɩt tɩ f sɩng ziri yagbo?+
Fo pa tẽeg mam yell ye.+
Baa fʋɩ pa kẽ fo sũurẽ ye.+
Mam pa sĩnd m noor n pa gom* sɩda?+
Rẽ n so tɩ fo pa zoe maam ye.
12 Mam na n kɩtame tɩ b bãng fo ‘tɩrlmã’+ ne f tʋʋmã,+la b pa na n naf foo ye.+
13 Fo sã n wa kelem n kos sõngre,fo bõn-naandsã sẽn yaa wʋsgã pa na n sõng-f ye.+
Sobg n na n dɩk b fãa n looge,pems-zaalg n na n fʋʋs-b tɩ b meneme.La ned ning sẽn solgd mam nengẽ wã na n sooga tẽngã,la a soog mam tãn-sõngã.+
14 B na n yeelame yaa: ‘Tuk-y-yã, tuk-y sore! Kõog-y sorã!+
Yãk-y bũmb ning fãa sẽn be m nin-buiidã sor zug n tõe n kɩt tɩ ned lakã.’”
15 Bala ad soab ning sẽn zãnt la sẽn zẽke,n vɩ wakat sẽn kõn sa+ t’a yʋʋr yaa sõngã+ sẽn yeele:
“Mam bee* zĩig sẽn zãnt la sẽn yaa sõng pʋgẽ,+la m bee ne neb nins sũy sẽn sãam la sẽn yaa sik-m-mens rãmbã me,sẽn na yɩl n lebs n kõ sik-m-mens rãmbã pãnga,la m keng neb nins sũy sẽn sãamã raoodo.+
16 Mam pa na n zab ne bãmb wakat fãa yĩnga,wall m puug m sũur wakat fãa ye.+Bala sã n pa rẽ, ãdem-biig pãng ra na n saa mam yĩnga,+hal baa bõn-naands nins sẽn vʋʋsd ne yõorã mam sẽn naanã menga.
17 Mam sũur da puugame, a sẽn da maand yel-wẽnd n baood zãmb paoongã yĩnga.+Rẽ n so tɩ mam wẽ-a, n solg m neng ne-a, la m puug m sũurã.
La yẽ kell n yɩɩ tõtre,+ n da ket n tũud a sũurã raabo.
18 Mam yãa a soayã.La mam na n sãoog-a lame,+ n wilg-a sore.+Mam na n lebs n bels-a lame,+ la m bels a neb nins sẽn be sũ-sãang pʋgẽ wã.+
19 A Zeova yeelame yaa: Mam kɩtdame tɩ pẽgr goam* zĩndi.
B na n kõo ned ning sẽn be zĩ-zãrgẽ wã la a soab ning sẽn pẽ wã laafɩ sẽn pa sate.+Mam na n sãoog-a lame.”
20 “La nin-wẽnsã yaa wa mogrã sẽn gudgd n pa tõe n yals sɩɩ,t’a koomã kãagd rẽgd la bɛgd n yiisdẽ wã.
21 Mam Wẽnnaamã yeelame yaa: ‘Bãan kae nin-wẽnsã yĩng ye.’”+
Vẽnegr toor-toore
^ Rat n yeel tɩ b yaadẽ.
^ Bɩ, “kosood.”
^ Bɩ, “kosoogã.”
^ Tõe tɩ yaa bõn-naandsã pʋʋsg yell la b sẽn gomdã.
^ Pa rẽ bɩ, “rĩmã.”
^ Ges-y gom-biis võor bilgrã zĩigẽ.
^ Ebre, “pa yɛ ye.”
^ Bɩ, “n solg yɛlã.”
^ Bɩ, “vɩɩ.”
^ Ebre, “no-bɩms biis.”
