Zã sebre 4:1-54
4 Zu-soab a Zeezi sẽn bãng tɩ Fariziyẽ-rãmbã wʋmame t’a paamda karen-biis wʋsgo, la t’a lisda+ neb wʋsg n yɩɩd a Zã wã,
2 (la pa a Zeezi meng n da lisd nebã ye. Yaa a karen-biisã.)
3 a yii Zide n dɩk sor n na n le leb Galile.
4 La a ra segd n pasga Samari soolmã.
5 Dẽ, a taa Samari tẽng a ye sẽn boond tɩ Sɩsaar sẽn pẽ pʋʋg ning a Zakoob sẽn da kõ a biig a Zozɛfã.+
6 A Zakoob bulgã ra bee be.+ La a Zeezi sẽn da yɛ so-toakã yĩngã a ra zĩi bulgã noore. Ra yaa wĩntoog wakat piig la a yiibã sẽnese.*
7 Samari pag n wa n na n yõng koom, t’a Zeezi yeel-a yaa: “M bõos koom n yũ.”
8 (Bala a karen-biisã ra kẽnga tẽngã pʋgẽ n na n tɩ ra rɩɩbo.)
9 Rẽ la Samari pagã sok-a yaa: “Maana wãn tɩ yãmb yaa Zʋɩf n yaool n kot maam koom n na n yũ, baa ne mam sẽn yaa Samari pagã?” (Bala Zʋɩf-rãmbã ra pa gomd ne Samari nebã ye.)+
10 La a Zeezi leokame n yeel-a: “Fo sã n da mi Wẽnnaam kũunã a sẽn kõt zaalmã,+ la soab ning sẽn yet foo: ‘M bõos koom n yũ’ wã sẽn yaa ned ninga, yaa foo n da na n kos-a, la a na n kõo foo vɩɩm koom.”+
11 Tɩ pagã yeel-a: “Soaala, yãmb pa tar lʋʋg meng n na n yõng koom, tɩ bulgã me zulmẽ. Woto wã, yɛ la yãmb na n paam vɩɩm koomã?
12 Yãmb pa yɩɩd tõnd yaab a Zakoob sẽn kõ tõnd bulgã, tɩ yẽ ne a kambã la a rũmsã me yũ a koomã ye. Bɩ bõe?”
13 T’a Zeezi leok-a yaa: “Ned ning fãa sẽn na n yũ ko-kãngã, ko-yũud na n le yõk-a lame.
14 La ko-yũud pa na n tol n le yõk ned ning sẽn yũud koom ning mam sẽn na n kõ-a wã ye.+ Koom ning mam sẽn na n kõ-a wã na n lebga ko-bundg n bund yẽ pʋgẽ wã n kõt vɩɩm sẽn ka sɛta.”+
15 Pagã yeel-a lame yaa: “Soaala, kõ-y maam ko-kãng tɩ ko-yũud ra le yõk-ma, tɩ m da ket n wat ka me n yõngd koom ye.”
16 A yeel-a lame: “Kẽng n tɩ bool f sɩdã, la f lebg n wa.”
17 Pagã leokame n yeele: “Mam pa tar sɩd ye.” T’a Zeezi yeel-a yaa: “Fo sẽn yeel tɩ f pa tar sɩdã fo bee bʋʋm.
18 Bala fo paama sɩdb a nu, la rao ning fo sẽn be ne masã wã pa fo sɩd ye. Dẽnd fo sẽn yeelã yaa sɩda.”
19 Pagã yeel-a lame yaa: “Soaala, mam neeme tɩ yãmb yaa no-rɛɛsa.+
20 Tõnd yaab-rãmbã ra waoogda Wẽnnaam tãn-kãngã zugu, la yãmb yetame tɩ yaa Zerizalɛm la zĩig ning nebã sẽn tog n waoog Wẽnnaamã.”+
21 T’a Zeezi yeel-a: “Paga, tẽ maam. Wakat n wat tɩ pa na n yɩ tãn-kãngã zugu, wall Zerizalɛm la yãmb na n waoog Ba wã ye.
22 Yãmb waoogda y sẽn pa mi,+ la tõnd waoogda d sẽn mi. Bala fãagrã sɩngda ne Zʋɩf-rãmbã.+
23 La wakat n wat tɩ wẽn-tũudb hakɩɩkã na n waoog Ba wã ne vʋʋsem sõngã sõngre, la ne sɩda. Wakat kãng pʋd n taame. Bala sɩd-sɩda, yaa neb a woto la Ba wã baood tɩ b waoog-a.+
24 Wẽnnaam yaa Vʋʋsem,*+ tɩ sẽn waoogd-b yẽ wã segd n waoog-a ne vʋʋsem sõngã sõngre, la ne sɩda.”+
25 Pagã yeel-a lame yaa: “Mam miime tɩ Mesi wã b sẽn boond a soab tɩ Kiristã watame. Yẽ soabã sã n wa, a na n togsa tõnd bũmba fãa vẽenega.”
26 T’a Zeezi yeel-a: “Mam sẽn gomd ne foomã, mam yaa yẽnda.”+
27 Sasa kãnga, a karen-biisã waame. La b sẽn yã t’a Zeezi gomda ne pagã ling-b lame. Baasgo, b ned baa a ye pa soke: “Bõe la yãmb baooda?” wall “bõe yĩng tɩ yãmb gomd ne pagã?”
28 Dẽ, pagã basa a yʋʋrã n kẽng tẽngã pʋgẽ n tɩ yeel nebã yaa:
29 “Wa n ges-y rao sẽn togs maam bũmb nins fãa mam sẽn maanã. Sãnd pa yẽ la Kiristã?”
30 Nebã yii tẽngã pʋgẽ n wat a nengẽ.
31 Nand tɩ b wa wã, karen-biisã ra pẽdgd-a lame n yetẽ: “Rabi,*+ rɩ-y-yã.”
32 La a Zeezi yeel-b lame: “Mam tara rɩɩb n na n dɩ, la yãmb pa mi rɩ-kãng ye.”
33 Dẽ, karen-biisã goma ne taab n yeele: “Ned baa a ye pa wa kõ-a bũmb t’a rɩ ye. Bɩ bõe?”
34 T’a Zeezi yeel-ba: “Mam dɩɩb yaa m maan sẽn tʋm-a maamã raabo,+ la m baas a tʋʋmdã.+
35 Yãmb pa yet tɩ keta kiis a naas tɩ tigsgã ta sɩda? La mam yeta yãmba: Zẽk-y y nens n ges pʋtã. B pelgame n ta tigsgu.+ Masã menga,
36 sẽn tigsd-a wã reegda a yaoodo, la a tigsd biis vɩɩm sẽn ka sɛtã yĩnga, sẽn na yɩl tɩ sẽn bʋt-a wã ne sẽn tigsd-a wã naag taab n kɩdme.+
37 Rẽ wɛɛngẽ, yel-bũndã sẽn yeel tɩ ned a ye la bʋta, t’a to yaa tigsdã yaa sɩda.
38 Mam tʋma yãmb tɩ y tigs yãmb sẽn pa tʋm bũmb ning yĩnga. Neb a taab n tʋme, la yãmb dɩta b tʋʋmdã yõodo.”
39 Samari tẽn-kãng nebã wʋsg tẽe a Zeezi, pagã sẽn kõ kasetã yĩnga. A ra yetame: “A togsa maam bũmb nins fãa mam sẽn maanã.”+
40 Rẽ n so tɩ Samari nebã sẽn wa a Zeezi nengẽ wã, b kos-a lame t’a pa ne bãmba. La a paa ne bãmb rasem a yiibu.
41 Rẽ kɩtame tɩ neb sõor sẽn yɩɩd pĩndã tẽ a Zeezi a goamã yĩnga,
42 n yeel pagã yaa: “Pa fo goamã yĩng bal la tõnd sẽn tẽedã ye. Bala tõnd meng wʋmame, la d miime tɩ ra-kãngã n sɩd yaa dũniyã fãagdã.”+
43 Rasem a yiibã loogr poore, a yii be n na n kẽng Galile.
44 La a Zeezi meng kõo kaset n yeel tɩ no-rɛɛs pa paamd waoogr a meng ba-yir ye.+
45 Dẽ, a sẽn ta Galile wã, Galile nebã reeg-a-la sõma, b sẽn yã bũmb nins fãa a sẽn maan Zerizalɛm tigrã sasa wã+ yĩnga. Bala bãmb me ra kẽnga tigrẽ wã.+
46 Rẽ poore, a Zeezi le kẽnga Kana sẽn be Galile soolmẽ wã, zĩig ning a sẽn da kɩt tɩ koom lebg divẽ wã.+ La rĩmã tʋm-tʋmd-kãseng a ye n da be Kapɛrnawum t’a bi-ribl bẽedẽ.
47 Ra-kãng sẽn wʋm t’a Zeezi yii Zide n wa Galile wã, a kẽnga a nengẽ, n tɩ kos-a t’a wa sãoog a biigã, bala a ra rat n kiime.
48 La a Zeezi yeel-a lame: “Sã n pa yãmb yãa bãn la yel-soalma, y pa na n tol n tẽ ye.”+
49 Rĩmã tʋm-tʋmd-kãsengã yeel-a lame yaa: “Zu-soaba, wa-y tɩ m bi-bilfã nan pa ki ye.”
50 T’a Zeezi yeel-a: “Kẽnge. Fo biigã yĩnsã sãoogame.”*+ Raoã tẽe a Zeezi sẽn yeel-a bũmb ningã, n looge.
51 A sẽn wa n be sorẽ n kuiisẽ, a tʋm-tʋmdbã seg-a lame n yeel t’a biigã yĩnsã sãoogame.*
52 Dẽ, a sok-b lame n na n bãng wakat ning a sẽn paam laafɩ wã, tɩ b yeele: “Yaa zaamẽ wĩntoog wakat a ye wã sẽnes* la a yĩn-wɩngrã sig-yã.”
53 Dẽ, ba wã bãngame tɩ yɩɩ sasa kãng bal kɛpɩ la a Zeezi sẽn yeel yẽ: “Fo biigã yĩnsã sãoogame”+ wã. Rẽ kɩtame tɩ yẽ ne a zakã rãmb fãa tẽ.
54 Rẽ n yɩ naoor a yiib-n-soab a Zeezi sẽn maan yel-solemd+ a sẽn yi Zide n wa Galile.
Vẽnegr toor-toore
^ Gɛrk, “wakat a yoob-n-soabã sẽnese.”
^ Gɛrkã pʋgẽ, b yeelame bal tɩ Wẽnnaam yaa pneuma. Ges-y gom-biis võor bilgrã zĩigẽ, zĩig ning b sẽn gʋls tɩ “Vʋʋsem.”
^ Bɩ, “Karen-saamba.”
^ Gɛrk, “biigã vɩɩme.”
^ Gɛrk, “biigã vɩɩme.”
^ Gɛrk, “wakat a yopoe-n-soabã.”
