Yɩɩn-sõamyã sebre 90:1-17
A Moyiiz sẽn yaa Wẽnnaam daoã+ pʋʋsgo.
90 Zeova, yãmb yɩɩ tõnd soondg zĩig*+ zãmaan woo zãmaana.
2 Nand tɩ tãensã zĩndi,wall nand tɩ yãmb naan dũniyã ne tẽn-gãongã,+hal wakat sẽn ka sɩngr n tɩ ta wakat sẽn ka saabo,* yãmb yaa Wẽnnaam.+
3 Yãmb kɩtdame tɩ ninsaal sẽn yaa kiidã lebd tomẽ.Yãmb yetame: “Yãmb a ninsaalb kamba, leb-y tomẽ wã.”+
4 Bala yãmb nifẽ, yʋʋm tusr yaa wa zaamẽ daarã sẽn loogã.+B yaa wa wakat a wãn bala.*
5 Yãmb kɩtdame tɩ ninsaalbã loogdẽ.+ B lebgda wa gõeem bala.Yibeoogo, b yaa wa mood sẽn tobde.+
6 Yibeoogo, b ningda puud la b palemdẽ.La zaabre, b zelgdame n kʋɩ.+
7 Bala yãmb sũ-puugrã rɩɩ tõndo.+Yãmb sũ-puugrã sẽn yaa kãsengã kẽesa tõnd rabeem wʋsgo.
8 Yãmb ninga tõnd beegr toor-toorã yãmb taoore.*+Yãmb nengã vẽenem kɩtame tɩ tõnd yel-solgdsã puki.+
9 Tõnd dayã loogda* yãmb sũ-puugrã sẽn yaa kãsengã yĩnga.Tõnd yʋʋmã loogda wa walengo.*
10 Tõnd vɩɩmã woglem yaa yʋʋm pis-yopoe,wall yʋʋm pis-nii+ ne ned sẽn tar keelem sõma.*
La a pida ne zu-loees la sũ-sãamse.A loogda tao-tao, tɩ tõnd me loogdẽ.+
11 Ãnda n tõe n mak yãmb sũ-puugrã n bãng a pãngã?
Yãmb sũ-puugrã yaa kãseng wa b sẽn segd n zoe yãmb to-to wã.+
12 Zãms-y tõnd d sẽn tõe n sõd d rayã to-to,+sẽn na yɩl tɩ d tõog n paam sũur sẽn tar yam.
13 Zeova, lebg-y n wa-y-yã!+ Yel-kãngã na n kaoosame n ta dabʋre?+
Zoe-y y tʋm-tʋmdbã nimbãanega.+
14 Bɩ y kɩt tɩ y maan-neerã+ sek tõnd yibeoogo,sẽn na yɩl tɩ d tõog n kaas ne sũ-noog la d kɩdem+ d vɩɩmã tõre.
15 Kɩt-y tɩ d kɩdem wa sẽn zems ray nins yãmb sẽn nams tõndã sõore,+wa sẽn zems yʋʋm wʋsgã tõnd sẽn paam toogã.+
16 Bɩ yãmb tʋm-tʋmdbã yã yãmb tʋʋmã,la bɩ b kambã yã yãmb ziirã.+
17 Bɩ tõnd Wẽnnaam a Zeova lohormã zĩnd tõnd zutu.Bɩ y kɩt tɩ d nusã tʋʋm yãk nenga.*
Kɩt-y tɩ d nusã tʋʋm yãk nenga.*+
Vẽnegr toor-toore
^ Bɩ, “yir.”
^ Bɩ, “zãmaan woo zãmaana.”
^ Bɩ, “yʋngã wakat a wãn bala.”
^ Bɩ, “Yãmb mii tõnd beegr toor-toorã.”
^ Bɩ, “Tõnd vɩɩmã loogda.”
^ Bɩ, “siri.”
^ Bɩ, “ned sẽn tar pãng wʋsg yĩnga.”
^ Bɩ, “lugl kãn-kãe.”
^ Bɩ, “lugl kãn-kãe.”
