Yɩɩn-sõamyã sebre 89:1-52
A Zeera yageng a Etan maskɩlle.*+
89 Mam na n yɩɩlame n gom a Zeova sẽn wilgd maan-neer to-to wã yell wakat fãa yĩnga.
M na n talla m noorã n kɩt tɩ zãmaan toɛy-toɛyã fãa bãng yãmb kɩs-sɩdã.
2 Bala mam yeelame: “Maan-neer na n paamda pãng* wakat fãa.+Yãmb lugla y kɩs-sɩdã kãn-kãe saasẽ.”
3 Wẽnnaam yeelame: “Mam maana kaool ne m sẽn yãk a soabã.+Mam wẽename n yeel m tʋm-tʋmd a Davɩɩd+ yaa:
4 ‘Mam na n kɩtame tɩ f yagensã+ pa wakat fãa yĩnga.Mam na n kɩtame tɩ f naamã geer paam pãng wakat fãa.’”+ (Sela)
5 Zeova, saasã pẽgda yãmb tʋʋm-kãsemsã.Saasã pẽgda yãmb kɩs-sɩdã nin-sõamyã* wã tiging pʋgẽ.
6 Bala ãnda n be saasẽ tɩ b tõe n dɩk-a n mak ne a Zeova?+
Wẽnnaam kom-dibli wã+ sʋka, bʋg n yaa wa a Zeova?
7 Nin-sõamyã wã+ tigsg pʋgẽ, b zoeta Wẽnnaam.A yaa kãsenga, tɩ sẽn gũbg-b yẽ wã zoet-a la b waoogd-a.+
8 Wẽnnaam a Zeova sẽn yaa tãb-biis naaba,ãnda n yaa pãng soab wa yãmb a Zah?+
Yãmb kɩs-sɩdã gũbga yãmba.+
9 Yãmb rɩta naam mogrã sẽn maand bʋʋrã zugu.+A ko-pɛmã sã n wa zẽke, yãmb kɩtdame tɩ b sigi.+
10 Yãmb tõoga Rahaab+ soolmã n kɩt t’a lebg wa ned b sẽn kʋ.+
Ne yãmb kangã sẽn tar pãngã, yãmb sãeega y bɛɛbã.+
11 Saasã yaa yãmb n so, tɩ tẽngã me yaa yãmb n so.+Tẽn-gãongã ne bũmb nins sẽn be a zugã+ yaa yãmb n naane.
12 Dũniyã rɩtg ne a goabg yaa yãmb n naane.Taboor+ ne Hɛrmo+ pẽgda yãmb yʋʋrã ne sũ-noogo.
13 Yãmb kangã tara pãng wʋsgo.+Yãmb nugã tara pãnga.+Yãmb nug-rɩtgã zẽka yĩngri.+
14 Yãmb naamã geer yẽbga tɩrlem ne zemsg zugu.+Maan-neer la kɩs-sɩd yasa yãmb taoore.+
15 Sũ-noog rãmb la neb nins sẽn mi sũ-noog kaasgã.+
Zeova, b kẽnda yãmb nengã vẽenemẽ.
16 B kɩdemda sũ-noog yãmb yʋʋrã pʋgẽ daarã tõre.Yãmb tɩrlmã yĩnga, b paamda waoogre.
17 Bala yãmb yaa b ziir la b pãnga.+Yãmb sũur sẽn noom ne tõndã yĩnga, tõnd pãngã* paasdame.+
18 Bala tõnd gãongã yaa a Zeova n so.Tõnd rĩmã yaa Israyɛll Sõng soabã n so.+
19 Wakat kãnga, yãmb goma ne sẽn maand-b sɩd ne yãmbã vẽnegr pʋgẽ, n yeele:
“M kõo gãndaoog pãnga.+Mam zẽka ned m sẽn yãk nin-buiidã sʋka.+
20 Mam yãa m tʋm-tʋmd a Davɩɩde.+Mam zae-a-la ne m ka-sõngã.+
21 Mam nugã na n teel-a lame.+Mam kangã na n kõ-a-la pãnga.
22 Bɛ baa a ye pa na n kɩt t’a yao fadg* ye.Tʋʋm-wẽns-maand baa a ye pa na n weoog-a ye.+
23 Mam na n beesa a zabd-n-taasã a taoore,+la m kʋ neb nins sẽn kis-a wã.+
24 Mam kɩs-sɩdã ne m maan-neerã bee ne-a.+Mam yʋʋrã maasem yĩnga, a pãngã* na n paasdame.
25 Mam na n ninga a nugã mogrã zugu,la m ning a nug-rɩtgã kʋɩlsã zutu.+
26 A na n zẽka a koɛɛg n bool maam n yeele: ‘Yãmb yaa mam Ba,mam Wẽnnaam, la m fãagr Pĩig kugri.’+
27 Mam na n kɩtame t’a lebg bi-kãsenga,+rat n yeel tɩ rĩm ning sẽn yɩɩd tẽngã rĩm-dãmb a taabã.+
28 Mam na n kell n maan-a-la neer wakat fãa yĩnga.+Kaool ning mam sẽn maan ne-a wã pa na n tol n vaal ye.+
29 Mam na n kɩtame t’a yagensã pa wakat fãa yĩnga,la m kɩt t’a naamã geer kaoos wa saasã.+
30 A yagensã sã n bas mam tõogã,n pa kẽn wa sẽn zems mam noyã,*
31 b sã n kɩɩs mam tõodã,la b pa sak mam noyã,
32 mam na n sɩbg-b-la ne rasaar+ b kɩɩsgã* yĩnga,la m pãb-b ne kalwaas b beegrã yĩnga.
33 La mam pa na n tol n bas n pa maan a Davɩɩd neere,+wall m pa pids m pʋlengã ye.
34 Mam pa na n kɩɩs m kaoolã,+wall m toeem bũmb ning mam no-bɩmsã sẽn yeelã ye.+
35 Mam wẽena m sõmblmã pʋgẽ vugr wakat fãa yĩnga.Mam pa na n yag a Davɩɩd ziri ye.+
36 A yagensã na n kaoosa wakat fãa yĩnga.+A naamã geer na n kaoosa mam taoor wa wĩntoogã.+
37 A geerã na n lugla kãn-kãe wakat fãa yĩng wa kiuugãsẽn yaa kaset soab sẽn maand sɩd sa-gãnẽ wã.” (Sela)
38 Baasgo, yãmb mengã zãgs-a lame, la y raag-a n base.+Yãmb sũurã yika wʋsg ne yãmb sẽn yãk* a soabã.
39 Yãmb basa kaool ning yãmb sẽn maan ne y tʋm-tʋmdã.Yãmb loba a maanfã tẽnga, n sãam-a.
40 Yãmb luba a lalsã sẽn me ne kugã fãa.Yãmb sãama a lalsã tɩ b lebg raboogo.
41 Neb nins fãa sẽn tũud be wã zɛɛ a paoongã.A yagsã tʋʋd-a lame.+
42 Yãmb kɩtame t’a zabd-n-taasã tõoge.*+Yãmb kɩtame t’a bɛɛbã fãa kɩdemd sũ-noogo.
43 Yãmb kɩtame me t’a leb poorẽ ne a sʋʋgã.Yãmb kɩtame t’a kong zabrã.
44 Yãmb kɩtame t’a ziirã sa,la y lob a naamã geer tẽnga.
45 Yãmb booga a bi-bɩɩlem wakatẽ dayã sõore.Yãmb kɩtame t’a paam yãnd wʋsgo. (Sela)
46 Zeova, yãmb na n solga y nengã n ta rabʋre? Na n yɩɩ wakat fãa yĩng bɩ?+
Yãmb sũurã sẽn puugã na n kell n dɩɩ wa bugum bɩ?
47 Tẽeg-y mam yõorã sẽn yaa koɛɛg to-to wã yelle!+
Yɩɩ zaalem yĩng la yãmb sẽn naan ninsaalbã fãa wã bɩ?
48 Nin-bʋg n tõe n vɩɩmd n pa tol n ki?+
A tõe n yiisa a meng* Yaoogã* pãngẽ sɩda? (Sela)
49 Zeova, yãmb pĩnd maan-neer tʋʋmã bee yɛ?Maan-neer ning wɛɛngẽ yãmb sẽn gom ne a Davɩɩde, n wẽen y kɩs-sɩdã pʋgẽ wã bee yɛ?+
50 Zeova, tẽeg-y tʋy nins b sẽn tʋ yãmb tʋm-tʋmdbã yelle.Tẽeg-y tɩ mam segd n tõoga toog nin-buiidã fãa tʋyã yĩnga.
51 Zeova, tẽeg-y yãmb bɛɛbã tʋyã yelle.Tẽeg-y b sẽn tʋʋd yãmb sẽn yãk* a soabã to-to, a sẽn kẽngẽ fãa wã.
52 Bɩ a Zeova paam pẽgr wakat fãa yĩnga. Ãmiina. Ãmiina.+
Vẽnegr toor-toore
^ Ges-y gom-biis võor bilgrã zĩigẽ.
^ Bɩ, “kaoosa.”
^ Bɩ, “malɛg-sõamyã.”
^ Ebre, “yɩɩllã.”
^ Fadg yaa lampo buudu.
^ Ebre, “yɩɩllã.”
^ Bɩ, “bʋ-kaoor toor-toorã.”
^ Bɩ, “tõdgrã.”
^ Ebre, “zae.” Ges-y gom-biis võor bilgrã zĩigẽ.
^ Ebre, “zẽka a zabd-n-taasã nug-rɩtgo.”
^ Bɩ, “a sɩɩgã.”
^ Ges-y gom-biis võor bilgrã zĩigẽ.
^ Ebre, “zae.” Ges-y gom-biis võor bilgrã zĩigẽ.
