Yɩɩn-sõamyã sebre 78:1-72
A Azaf Maskɩlle.*+
78 Mam nin-buiidu, kelg-y mam tõogã.*Kɩll-y y tʋbr n kelg mam noorã goamã.
2 Mam na n yaaga m noor n wẽ yel-bũndi.
Mam na n togsa pĩnd wẽndẽ goam b sẽn gom ne pagdo.+
3 Bũmb nins tõnd sẽn wʋm la d miẽ wã,sẽn yaa bũmb nins tõnd ba-rãmbã sẽn togs-dã,+
4 tõnd pa na n solg b yagensã rẽ ye.Tõnd na n togsa zãmaan ning sẽn watã+a Zeova tʋʋmã sẽn sek pẽgrã, la a pãngã,+rat n yeel tɩ bõn-kãsems nins a sẽn maanã.+
5 A kõo a Zakoob yagensã noore,la a lugl tõog Israyɛlle.A yeela tõnd yaab-rãmbãtɩ b wilg b kambã bõn-kãense,+
6 sẽn na yɩl tɩ zãmaan ning sẽn na n pʋglã,kamb nins sẽn nan na n dogã tõog n bãng rẽ.+
Bãmb me segd n wa togsa b kambã bõn-kãense.+
7 Woto, bãmb na n teega Wẽnnaam.
B pa na n yĩm Wẽnnaam tʋʋmã ye.+B na n tũu a noyã.+
8 B pa na n yɩ wa b yaab-rãmbã ye.B yaab-rãmbã ra yaa neb sũy sẽn riglme, tõatba,+neb yam sẽn yuusdi,*+la sẽn pa maand sɩd ne Wẽnnaam ye.
9 Efrayim nebã ra boba tãbdo,la b lebg n zoee zabrã daare.
10 B pa sak Wẽnnaam kaoolã ye.+B zãgsame me tɩ b kõn tũ a tõogã ye.+
11 Sẽn paase, b yĩma bũmb nins Wẽnnaam sẽn maanã,+tʋʋm-kãsems nins a sẽn wilg-bã.+
12 A maana bõn-kãsems b yaab-rãmbã nifẽ,+Zowan soolmã sẽn be Ezɩptã.+
13 A welga mogrã n kɩt tɩ b pasg n looge.A kɩtame tɩ koomã zẽk yĩngr wa lalga.+
14 A ra yãagd-b-la sawadg pʋgẽ wĩndga,la a ra yãagd-b bugum pʋgẽ yʋngã tõre.+
15 A kɩtame tɩ pĩig kug pus we-raoogẽ wã.A kɩtame tɩ b yũ koom n tɩge, wa b sẽn yũ ko-zulumsã koom.+
16 A kɩtame tɩ koom yi pĩig pʋgẽ,la a kɩt tɩ ko-rãmb zoe wa kʋɩlg koom.+
17 La b kell n maana yel-wẽnd n beeg Sẽn ka-a to wã,b sẽn kɩɩs-a we-rasempʋɩɩgẽ wã yĩnga.+
18 B maka Wẽnnaam b sũyã pʋsẽ,+n kos rɩɩb b sẽn da rat ne b sũy fãa.*
19 Dẽ, b goma Wẽnnaam wẽnga,n yeele: “Wẽnnaam tõe n kõo tõnd rɩɩb we-raoogẽ wã sɩda?”+
20 A wẽe pĩig kugri,tɩ koom bul n yi a pʋgẽ n zoe wʋsgo.+
“A tõe n kõo tõnd rɩɩb* me,wall a kõ a nin-buiidã nemd sɩda?”+
21 A Zeova sẽn wʋm b goamã, a sũurã yika wʋsgo.+Bugum+ n sig a Zakoob yagensã zutu.A sũurã puuga ne Israyɛlle,+
22 bala b pa tẽ Wẽnnaam ye.+B pa kɩs sɩd ne tõog ning Wẽnnaam sẽn tar n tõe n fãag-bã ye.
23 Dẽ, Wẽnnaam kõo sawatã sẽn be yĩngrã noore,la a pags saasã kʋɩlensã.
24 A kɩtame tɩ saagã niid mann sẽn na yɩl tɩ b rɩ.A kõ-b-la saasẽ koodo.+
25 Ninsaalbã rɩɩ pãens rãmb* rɩɩbo.*+Wẽnnaam kõo bãmb rɩɩb tɩ sek-ba.+
26 A kɩtame tɩ yaang sobgã fug saasẽ,la a kɩt tɩ goabg sobgã fug ne yẽ pãngã maasem.+
27 A kɩtame tɩ nemd sig b zut wa tom.Yaa bõn-yɩgdɩ sẽn yaa wʋsg wa mogrã noor bĩisrã.
28 A kɩtame tɩ b rʋʋg b* sik-zĩigẽ wã,n gũbg b fu-rotã fãa.
29 Nin-buiidã rɩɩme tɩ loog-ba.A kõ-b-la bũmb ning b sẽn da ratã.+
30 La nand tɩ b rɩ tɩ b yamleoogã yi,rɩɩbã sẽn wa n ket b noyẽ wã,
31 Wẽnnaam sũur puuga wʋsg ne bãmba.+
A kʋʋ b neb nins sẽn tar pãng n yɩɩdã.+A kʋʋ Israyɛll kom-bɩɩsã.
32 Baa ne rẽ, b maneg n beegame,+n pa tẽ a tʋʋm-kãsemsã ye.+
33 Dẽ, a kɩtame tɩ b rayã sa wa pemsem bala,+la a kɩt tɩ yel-beed paam-b zĩig pʋgẽ tɩ b ki.
34 La Wẽnnaam sã n wa sɩng b kʋʋbo, b baood-a lame.+B lebgd n gẽesa Wẽnnaam,
35 n tẽegdẽ tɩ Wẽnnaam yɩɩ bãmb Pĩig kugri,+la tɩ Wẽnnaam sẽn ka to wã yɩɩ bãmb Fãagda.*+
36 B makame n na n belg Wẽnnaam ne b noore,la b yag-a ziri ne b zɩlma wã.
37 Bãmb yamã ra yuusda ne Wẽnnaam.+B ra pa maand sɩd ne a kaoolã ye.+
38 La Wẽnnaam yaa nimbãan-zoɛta.+A kõt-b-la sugr b beegrã yĩnga,* n pa sãamd-b ye.+
A yõka a meng naoor wʋsgo,+n pa sik a sũ-puugrã fãa b zut ye.
39 Bala Wẽnnaam tẽegame tɩ b yaa yĩn-nems bala.+B yaa wa pemsem sẽn loogd n pa lebgd n watẽ ye.*
40 B kɩɩsa Wẽnnaam naoor wʋsg we-raoogẽ wã,+n kɩt t’a sũurã sãam wʋsg we-rasempʋɩɩgẽ wã.+
41 B maka Wẽnnaam n yɩlme,+la b kɩt tɩ Israyɛll Sõng soabã sũur sãam wʋsgo.
42 B pa tẽeg Wẽnnaam pãngã* yell ye.B pa tẽeg daar ning a sẽn fãag bãmb b zabd-n-taasã nusẽ wã,+
43 a sẽn maan bãn to-to Ezɩptã,+a sẽn maan yel-soalem Zowan soolmẽ wã,
44 la a sẽn kɩt tɩ Nill kʋɩlgã ko-soayã lebg zɩɩm+tɩ b ra pa tõe n yũ b kʋɩlsã koomã ye.
45 A tʋma kɛɛda wʋsg tɩ b tɩ wãb-ba,+la a kɩt tɩ loms sãam-ba.+
46 A rɩka b koodã n kõ sʋy sẽn dɩt wʋsgo,la a rɩk b sẽn tʋm n paam bũmb ninsã n kõ kalwaare.+
47 A kɩtame tɩ sapɩlem sãam b viyn tɩɩsã,+la a kɩt tɩ sapɩlem-bɛd sãam b wom-seesã.*
48 A kɩtame tɩ sapɩlem pãb b rũms nins b sẽn tar n tʋmdẽ wã,+la a kɩt tɩ saag tãs* b rũms a taabã.
49 A kɩtame t’a sũ-kãbrã,la a sũ-puugrã sig b zutu, la a kɩt tɩ b paam sũ-sãamse.A kɩtame tɩ malɛgs wʋsg wa ne yel-beedo.
50 A sika a sũ-puugrã b zutu.
A pa kɩt tɩ b* põs kũum ye.A kɩtame tɩ bã-loangdg yõk bãmba.*
51 Sẽn na n baase, a kʋʋ Ezɩpt kom-dẽemsã fãa,+Kam buudã fu-rotã pʋsẽ pipi kambã.*
52 Rẽ poore, a yiisa a nin-buiidã tɩ b loog wa piisi,+la a wilg-b sor wa rũms we-raoogẽ wã.
53 A tall-b lame n loog ne bãane,tɩ b pa tol n yɛɛs ye.+Mogrã luda b bɛɛbã.+
54 La a tall-b lame n kẽng a soolmã sẽn yaa sõngã pʋgẽ,+soolem-kãng sẽn yaa tãens a nug-rɩtgã sẽn deegã pʋgẽ.+
55 A riga buud toɛy-toɛy b taoore.+A talla wĩ-makdg n pʋɩ soolmã n kõ-ba.+A zĩniga Israyɛll buudã b zagsẽ wã.+
56 La b kell n maka Wẽnnaam sẽn ka to wã, la b kɩɩs-a.+B pa sak n tũ a noyã ye.+
57 Sẽn paase, b bʋdgame, n lebg zãmb dãmb wa b yaab-rãmbã.+
B ra yaa neb b sẽn pa tõe n teege, wa tãp sẽn loke.+
58 B kell n waooga wẽn-faad zĩ-zãntsẽ*+ wã n beeg Wẽnnaam.B puuga a sũur wʋsg ne b bõn-naandsã.*+
59 Wẽnnaam wʋmame. A sũurã yika wʋsgo,+t’a raag Israyɛll n bas zãnga.
60 A wa n kong n basa sɛk-roogã sẽn da be Sɩlo wã,+fu-roog ning pʋgẽ a sẽn da be nebã sʋkã.+
61 A basame tɩ b tall bũmb ning sẽn makd a pãngã n kẽng yembdo.A basa a ziirã zabd-n-taagã nugẽ.+
62 A basame tɩ b kʋ a nin-buiidã ne sʋʋse.+A sũur puuga wʋsg ne a pʋɩɩrã.
63 Bugum dɩɩ a kom-bɩɩsã.B pa yɩɩl kãadem yɩɩl a pʋg-sadb sẽn pa mi raoã yĩng ye.*
64 B kʋʋ a maan-kʋʋdbã ne sʋʋse,+tɩ b pʋg-kõapã pa yãb ye.+
65 Rẽ poore, a Zeova neka wa a ra gõeeme,+wa gãndaoog+ sẽn yũ divẽ n gũs n neke.
66 A riga a zabd-n-taasã tɩ b lebg n zoe.+A kɩtame tɩ b paam paoogr wakat fãa yĩnga.
67 A raaga a Zozɛf fu-roogã n base.A pa yãk Efrayim buudã ye.
68 La a yãka Zida buudã.+A yãka Siyõ tãngã a sẽn nongã.+
69 A kɩtame t’a roogã na n kaoos wa saasã,*+wa tẽngã a sẽn lugl wakat fãa yĩngã.+
70 A yãka a tʋm-tʋmd a Davɩɩde.+A yãk-a-la a sẽn wa n be piisã yãgẽ wã,+
71 a sẽn wa n get pe-yãans sẽn yẽsemd b kamb yellã,n kɩt t’a lebg a Zakoob yagensã sẽn yaa a nin-buiidã pe-kɩɩma,+Israyɛll sẽn yaa a pʋɩɩrã pe-kɩɩma.+
72 A kɩɩm-b-la ne burkĩndi,+la a lʋɩ b taoor ne yam.+
Vẽnegr toor-toore
^ Ges-y gom-biis võor bilgrã zĩigẽ.
^ Bɩ, “zãmsgã.”
^ Ebre, “sẽn pa segle.”
^ Bɩ, “rɩɩb b sɩɩsã yĩnga.”
^ Ebre, “bur.”
^ Bɩ, “malɛgs.”
^ Ebre, “buri.”
^ Ebre, “a.” Tõe n yɩɩ Wẽnnaam wall Israyɛll nebã.
^ Bɩ, “Sũ-roakda.”
^ Ebre, “luta b beegrã.”
^ Pa rẽ bɩ, “B vʋʋsmã loogdame n pa lebgd n watẽ ye.”
^ Ebre, “nugã.”
^ Yaa tɩɩg sẽn wõnd kankanga.
^ Pa rẽ bɩ, “yĩn-wɩngr yõk.”
^ Bɩ, “b sɩɩgã.”
^ Ebre, “b vɩɩmã.”
^ Bɩ, “Kam buudã neb pãngã sɩngre.”
^ Ges-y gom-biis võor bilgrã zĩigẽ.
^ Bɩ, “B kɩtame tɩ sũ-kiir yõk-a, b bõn-naandsã maasem yĩnga.”
^ Ebre, “b pa pẽg a pʋg-sadb sẽn pa mi raoã ye.”
^ Ebre, “A mee a roogã wa zĩ-zãntsã.”
