Yɩɩn-sõamyã sebre 71:1-24
71 Zeova, yaa yãmb nengẽ la mam soond-yã.
Bɩ m da tol n paam yãnd ye.+
2 Fãag-y maam la y kɩt tɩ m põse, yãmb tɩrlmã yĩnga.
Kɩll-y y tʋbr n kelg* maam, la y fãag-ma.+
3 Yɩ-y mam soondg zĩig sẽn be pĩig kugr zugu,zĩig m sẽn tõe n kẽngd wakat fãa.
Kõ-y noor tɩ b fãag maam,bala yãmb yaa mam pĩig la m pãng zĩiga.+
4 Mam Wẽnnaam, fãag-y maam nin-wẽngã nusẽ,+sẽn namsd-a nebã zaalem yĩngã nusẽ.
5 Bala Zu-soab sẽn ka to a Zeova, yaa yãmb la mam teeg-yã.Mam kɩsa yãmb sɩd hal m bi-bɩɩlmẽ.+
6 Mam teega yãmb hal m dogmã tɛka.Yɩɩ yãmb n yiis maam m ma wã pʋgẽ.+
Mam pẽgda yãmb wakat fãa.
7 Mam lebga wa yel-solemd neb wʋsg nifẽ,la yãmb yaa mam soondg zĩig sẽn tar pãnga.
8 Mam noorã pida ne yãmb pẽgre.+Mam gomda yãmb ziirã yell daarã tõre.
9 Ra bas-y maam m kʋʋlem wakat ye.+Ra n daag-y-m n base, m pãngã sã n wa sa ye.+
10 Mam bɛɛbã gomda mam yell wẽnga.Neb nins sẽn baood n na n yãk mam yõorã* seta taab+
11 n yetẽ: “Wẽnnaam raag-a lame n base.
Rig-y-yã-a n tɩ yõke, bala ned kae n na n fãag-a ye.”+
12 Mam Wẽnnaam, ra kell-y n zãag-y ne maam ye.
Mam Wẽnnaam, wa n sõng-y maam tao-tao.+
13 Bɩ neb nins sẽn kɩɩsd maamã*paam yãnd la b sãame.+
Bɩ neb nins sẽn baood tɩ yel-beed paam maamãpaam yãnd la paoogr wʋsgo.+
14 La sã n yaa ne maam, m na n kell n gũume.M na n maneg n pẽga yãmba.
15 Mam noorã na n goma yãmb tɩrlmã yelle.+Daarã tõre, mam noorã na n goma bũmb nins yãmb sẽn maand n wat ne fãagrã yelle,baa b sẽn yaa wʋsg hal tɩ m pa tõe n sõd n sa wã.+
16 Zu-soab sẽn ka to a Zeova,mam na n waame, n gom yãmb tʋʋm-kãsemsã yelle.Mam na n goma yãmb tɩrlmã yelle, yãmb y ye tãa tɩrlmã yelle.
17 Mam Wẽnnaam, yãmb sɩng n zãmsda maam hal m yãadmẽ,+la hal n tãag masã, mam moonda yãmb tʋʋm-kãsemsã n pa basdẽ ye.+
18 Mam Wẽnnaam, baa mam sã n wa kʋʋl tɩ m zug pelge, bɩ y ra raag-m n bas ye.+
Bɩ y bas tɩ m gom yãmb pãngã* yell ne zãmaan ning sẽn pʋgdã,la yãmb pãn-kãsengã yell ne zãmaan nins sẽn watã fãa.+
19 Mam Wẽnnaam, yãmb tɩrlmã tata zĩ-zãntsẽ.+Yãmb maana bõn-kãsemse.Mam Wẽnnaam, ãnda n yaa wa yãmba?+
20 Baa yãmb sẽn kɩt tɩ mam paam zu-loees la yel-beed wʋsgã,+lebs-y n kõ-y maam pãnga.Yiis-y maam tẽngã zĩ-zulumsẽ wã.*+
21 Bɩ y paas mam ziirã.Kogl-y maam la y bels-ma.
22 Dẽ, mam Wẽnnaam, mam na n yɩɩl n pẽga yãmb ne yʋʋm-teed sẽn tar rissi,yãmb kɩs-sɩdã yĩnga.+
Israyɛll Sõng soaba,mam na n yɩɩl n pẽga yãmb ne pɛndga.
23 Mam no-bɩmsã na n kaasa ne sũ-noog mam sẽn wat n yɩɩnd n pẽgd yãmbã,+bala yãmb fãaga mam vɩɩmã.*+
24 Mam zɩlemdã na n goma* yãmb tɩrlmã yell daarã tõre,+bala neb nins sẽn baood n sãam maamã na n paama yãnd la paoogre.+
Vẽnegr toor-toore
^ Bɩ, “Sulg-y n kelg-y.”
^ Bɩ, “sẽn baood mam sɩɩgã.”
^ Bɩ, “mam sɩɩgã.”
^ Ebre, “kangã.”
^ Bɩ, “ko-zulumsẽ wã.”
^ Bɩ, “mam sɩɩgã.”
^ Bɩ, “tagsa.”
