Yɩɩn-sõamyã sebre 47:1-9
Yɩɩlã taoor soab yĩnga. A Koore+ kom-dibli wã yɩɩlle.
47 Yãmb a buud toɛy-toɛyã fãa neba, wẽ-y nug-pogse.
Kils-y Wẽnnaam a tõogrã yĩnga, la y kaas ne sũ-noogo.
2 Bala a Zeova sẽn yaa Sẽn-ka-to wã segda ne zoees la waoogre.+Yẽ n yaa Rĩm-kãseng n so dũniyã fãa.+
3 A kɩtdame tɩ tõnd soogd buud toɛy-toɛya.A kɩtdame tɩ tõnd tõogd soolem toɛy-toɛya.+
4 Yẽ n yãkd tõnd rogem-pʋɩɩrã n kõt tõndo.+Yaa bũmb ning a Zakoob sẽn yaa ned ning a sẽn nongã sũur sẽn noom ne wã.+ (Sela)
5 B ra kaasda ne sũ-noog tɩ Wẽnnaam dʋʋda.B ra peebda baorg* t’a Zeova rʋʋda.
6 Yɩɩl-y n pẽg-y Wẽnnaam. Yɩɩl-y pẽgr yɩɩla.
Yɩɩl-y n pẽg-y tõnd Rĩmã. Yɩɩl-y pẽgr yɩɩla.
7 Bala Wẽnnaam n yaa dũniyã fãa Rĩma.+Yɩɩl-y pẽgr yɩɩla, la y wilg tɩ y tara yam.
8 Wẽnnaam lebga Rĩm n so buud toɛy-toɛyã.+
Wẽnnaam zĩi a geerã sẽn yaa sõngã zugu.
9 Buud toɛy-toɛyã taoor dãmb tigmane a Abrahaam Wẽnnaamã nebã.
Bala yaa Wẽnnaam n so dũniyã nanambsã.*
A paama pẽgr wʋsgo.+
