Yɩɩn-sõamyã sebre 35:1-28
A Davɩɩd yɩɩlle.
35 Zeova, sõng-y maam tɩ m paam bʋʋm m zabd-n-taasã taoore.+Zab-y ne neb nins sẽn zabd ne maamã.+
2 Rɩk-y y gãn-bilã* ne y gãn-bedrã,+n yik n zab n sõng maam.+
3 Zẽk-y y kãndã ne y zabr larã* n zab ne sẽn digd-b maamã.+
Yeel-y maam* yaa: “Mam yaa fo fãagda.”+
4 Bɩ neb nins sẽn baood maam n na n kʋ wã* paam yãnd la paoogre.+
Bɩ neb nins sẽn magd n na n kʋ maamã tar n leb poorẽ ne yãnde.
5 Bɩ b lebg wa wudg sobg sẽn dɩke.Bɩ a Zeova malɛkã rig-b tɩ b looge.+
6 A Zeova malɛkã sã n wa rigd-ba,bɩ b sorã lebg lik la salse.
7 Bala b solga bẽdg n na n bẽd maam zaalem.B tuu bok n na n yõk maam* zaalem yĩnga.
8 Bɩ yel-beed tiig n paam-ba.Bɩ bẽdg ning bãmb sẽn solgã yõk-ba.Bɩ b lʋɩ bẽdgã pʋgẽ, n sãame.+
9 La mam* na n kɩdma sũ-noog a Zeova yĩnga.*Mam na n nooga m sũur a sẽn fãag maamã yĩnga.
10 Mam kõabã fãa na n yeelame yaa:
“Zeova, ãnda n yaa wa yãmba?
Yãmb fãagda sẽn pa tar-a sõangdã neb nins pãng sẽn yɩɩd-a wã nusẽ.+Yãmb fãagda sẽn pa tar-a sõangdã la naong soabã neb nins sẽn fãad bãmbã nusẽ.”+
11 Kaset rãmb sẽn tar yam-wẽns n wa.+B sokda maam bũmb toor-toor mam sẽn pa mi.
12 B lebsa maam wẽng neer yĩnga,+n kɩt tɩ m* sũur sãam wʋsgo.
13 La bãmb sẽn wa n lʋɩ bãagã, mam yeelga boto.Mam* loee noor n nams m menga.Mam sẽn wa n mik tɩ m pʋʋsgã pa reegã,
14 mam da kẽnda wa m yãbda m zoa wall m ba-biig kʋʋre.Mam da sura ne sũ-sãang wa ned sẽn yãbd a ma kʋʋre.
15 La mam sẽn wa n lʋɩ wã,* b kɩdmame la b tigim taaba.B tigma taab n na n soos n kʋ maam.B tɛɛ maam n tõse, n pa sĩnd ye.
16 Wẽn-kɩɩsdbã laada maam la b paoogd maam.*B wãbda b yẽnã, b sũy sẽn yik ne maamã yĩnga.+
17 Zeova, yãmb na n getame bal hal tɩ ta dabʋre?+
Fãag-y maam* ne neb nins sẽn zabd ne maamã.+Fãag-y mam vɩɩmã sẽn tar yõod wʋsgã* gɩgem-poalã nusẽ.+
18 Woto, mam na n pʋʋsa yãmb bark tigin-kãsengã pʋgẽ.+Mam na n pẽga yãmb kʋʋngã sʋka.
19 Ra bas-y tɩ neb nins sẽn yaa mam bɛɛb zaalem yĩngã la maam ye.Ra bas-y tɩ sẽn kis-b maam zaalem yĩngã+ wẽgs b ninã ne pʋ-toog ye.+
20 Bala b pa gomd laafɩ goam ye.B pʋd n maanda sɩlem n na n zãmb tẽngã neb nins sẽn nong laafɩ wã.+
21 B yaaga b noor yaleng n dõt maam,n yetẽ: “N-faa! N-faa! Tõnd ninã yãa rẽ.”
22 Zeova, yãmb yãa bõn-kãnga. Ra kell-y n sĩnd-y ye.+
Zeova, ra pa-y yɩɩg n bas maam ye.+
23 Nek-y-yã, la y yik n sõng maam.Mam Wẽnnaam a Zeova, sõng-y-m tɩ m paam bʋʋm m bʋʋdã wakate.
24 Mam Wẽnnaam a Zeova, kao-y mam bʋʋd wa sẽn zems yãmb tɩrlmã.+Ra bas-y tɩ b la maam ye.
25 Bɩ b ra tol n yeel b sũurẽ yaa: “N-faa! Tõnd paama d sẽn da ratã.”*
Bɩ b ra tol n yeel yaa: “Tõnd sãam-a lame.”+
26 Bɩ b fãa paam yãnd la paoogre,rat n yeel tɩ neb nins sẽn laad maam m yel-beedã yĩngã.
Bɩ neb nins sẽn wukd b mens mam yĩngã paam yãnd la paoogre.
27 La bɩ neb nins sũur sẽn noom ne mam tɩrlmã kaas ne sũ-noogo.Bɩ b yet wakat fãa yaa:
“Bɩ a Zeova paam waoogre. Yẽ n yaa soab ning sũur sẽn noom ne a tʋm-tʋmdã bãanã.”+
28 Dẽ, mam zɩlemdã na n moona yãmb tɩrlmã,+la a pẽg yãmb daarã tõre.+
Vẽnegr toor-toore
^ Yaa sẽn tãood-b tãbdã n da wae n zãad gãn-bila.
^ Bɩ “lar sẽn tar noy a yiibã.”
^ Bɩ, “mam sɩɩgã.”
^ Bɩ, “sẽn gẽesd mam sɩɩgã.”
^ Bɩ, “mam sɩɩgã.”
^ Bɩ, “mam sɩɩgã.”
^ Ebre, “kɩdma sũ-noog a Zeova pʋgẽ.”
^ Bɩ, “mam sɩɩgã.”
^ Bɩ, “mam sɩɩgã.”
^ Bɩ, “lakã.”
^ Pa rẽ bɩ, “Wẽn-kɩɩsdbã yaanda maam bur yĩnga.”
^ Bɩ, “mam sɩɩgã.”
^ Ebre, “mam fãa-fãa wã.” Rat n yeel t’a sɩɩgã bɩ a vɩɩmã.
^ Bɩ, “N-faa! Tõnd sɩɩgã.”
