Yɩɩn-sõamyã sebre 107:1-43
107 Pʋʋs-y-yã a Zeova barka, bala a yaa sõma.+A maan-neerã paada wakat fãa.+
2 Bɩ neb nins a Zeova sẽn fãagã yeel woto,rat n yeel tɩ neb nins a sẽn fãag b zabd-n-taasã nusẽ,*+
3 b rãmb nins a sẽn yiis soolem toɛy-toɛyã pʋsẽ n tigmi,+a sẽn yiis yaang la nin-taoore,*goabg la rɩtgã.+
4 B ra yeebda we-raoogẽ wã, we-rasempʋɩɩgẽ wã.B ra pa ne sor sẽn teesd tẽng b sẽn tõe n tɩ zĩnd ye.
5 Kom la ko-yũud n da tar-ba.Yaamsã kɩtame tɩ b* ra rat n sobe.
6 B ra kelemd n boonda a Zeova b toogã pʋgẽ.+A fãag-b-la b yel-pakrã pʋgẽ.+
7 A kɩtame tɩ b tũ so-sõng+sẽn na yɩl n kẽng tẽng b sẽn tõe n tɩ zĩnd a pʋgẽ.+
8 Bɩ nebã pʋʋs a Zeova bark+ a maan-neerã yĩnga,la a tʋʋm-kãsemsã a sẽn tʋmd n sõngd ninsaalbã kambã yĩnga.+
9 Bala a kɩtame tɩ ko-yũud sẽn tar a soabã yũ n tɩge,la a kõ kom sẽn tar a soabã* bõn-sõma tɩ sek-a.+
10 Kẽer da bee lik bida pʋgẽ,n be bãens rotẽ n namsdẽ tɩ b balg-b ne bãense.
11 Yɩɩ b sẽn da tõdg Wẽnnaam gomdã yĩnga.B paooga Sẽn ka-a to wã saglgã.+
12 Dẽ, Wẽnnaam kɩtame tɩ b namse, sẽn na yɩl tɩ b sik b mense.+B lʋɩɩme,* tɩ ned kae n na n sõng-b ye.
13 B boola a Zeova n kos sõngr b toogã pʋgẽ.A fãag-b-la b yel-pakrã pʋgẽ.
14 A yiis-b-la lik bida pʋgẽ,la a kao b sogdsã.+
15 Bɩ nebã pʋʋs a Zeova bark a maan-neerã yĩnga,+la a tʋʋm-kãsemsã a sẽn tʋmd n sõngd ninsaalbã kambã yĩnga.
16 Bala a kaoo zũud kʋɩlensã,la a kao kud-bɩlmã.+
17 B ra yaa yalemba, n paam namsg+b beegrã la b kongrã yĩnga.+
18 Rɩɩb buud fãa yamleoog ra pa le tar-b ye.*B ra kolga kũum rignoyẽ.
19 B ra boonda a Zeova n kot sõngr b toogã pʋgẽ.A ra fãagd-b-la b yel-pakrã pʋgẽ.
20 A ra tʋmda a gomdã n sãoogd-ba,+la a fãagd-b n yiisd bogd nins pʋsẽ b sẽn da bẽd-b n yõgã.
21 Bɩ nebã pʋʋs a Zeova bark a maan-neerã yĩnga,la a tʋʋm-kãsemsã a sẽn tʋmd n sõngd ninsaalbã kambã yĩnga.
22 Bɩ b kõ bark pʋʋsg maando,+la b moon a tʋʋmã ne sũ-noog kaasgo.
23 Neb nins sẽn kẽed koom-kogend n togd sor mogrã zugã,sẽn tʋmd-b b tʋʋmã ko-kãsemsã zutã+
24 yãa a Zeova tʋʋmã,la a tʋʋm-kãsemsã zĩ-zulumsẽ wã.+
25 B yãa a sẽn gom tɩ sob-kãseng sɩng fugbu,+n zẽkd mogrã ko-pɛmã.
26 Koom-kogendã rãmb zẽkdame n tat saasã,la b lebgd n sigd zĩ-zulumsẽ wã.
B raoodã* satame, yel-beedã sẽn yɛgd-bã yĩnga.
27 B nensã yilimdame tɩ b tuumd wa neb sẽn yũ rãam n su.B minimã fãa lebgda zaalem.+
28 Rẽ poore, b kelemd n boola a Zeova b toogã pʋgẽ,+t’a fãag-b b yel-pakrã pʋgẽ.
29 A kɩtdame tɩ sob-kãsengã yõke,tɩ mogrã ko-pɛmã pa sɩddd.+
30 Ko-pɛmã sã n wa kell n pa sɩɩ, koom-kogendã rãmb kɩdemda sũ-noogo,tɩ Wẽnnaam tall-b n kẽng koom-kogend yalsg zĩig ning b sẽn da ratã.
31 Bɩ nebã pʋʋs a Zeova bark a maan-neerã yĩnga,la a tʋʋm-kãsemsã a sẽn tʋmd n sõngd ninsaalbã kambã yĩnga.+
32 Bɩ b pẽg-a nin-buiidã tiging pʋgẽ.+Bɩ b pẽg-a kãsem-dãmbã tigsgẽ.*
33 A kɩtdame tɩ kʋɩlsã lebg we-rasempʋɩɩga,tɩ ko-bunds zĩisã lebg tẽn-koɛɛnga,+
34 la a kɩtdẽ tɩ tẽng sẽn sakd kood lebg zĩ-vɩʋʋg sẽn yaa yamsem,+neb nins sẽn be be wã wẽnemã yĩnga.
35 A kɩtdame tɩ we-rasempʋɩɩgã lebg bãgs sẽn tar tãnwĩisi,tɩ tẽn-koɛɛngã lebg ko-bunds zĩisi.+
36 A kɩtdame tɩ komã sẽn namsd b rãmbã zĩnd be,+sẽn na yɩl tɩ b tilg tẽng b sẽn tõe n zĩnd a pʋgẽ.+
37 B bʋda pʋt la b sel viyn tɩɩse,+tɩ womd biis wʋsgo.+
38 Wẽnnaam ningd-b-la barka, tɩ b fɩɩgd wʋsgo.A pa basd tɩ b niisã sõor boog ye.+
39 La b sõorã le wat n boogame, tɩ b paam paoogre,b sẽn paam weoogr ne yel-beed la sũ-sãang yĩnga.
40 Wẽnnaam ningda nin-kãsemsã yãnde,la a kɩtdẽ tɩ b yeebd zĩ-vɩɩd sẽn pa tar soay pʋsẽ.+
41 La a kogenda naong rãmb* tɩ b pa weoogd-b ye.+A kɩtdame tɩ b zagsã rãmb fɩɩgd wa rũms sẽn be bãgr pʋgẽ.
42 Nin-tɩrsã yãta rẽ n kɩdem sũ-noogo.+La nin-wẽnsã fãa mumda b noyã.+
43 Ned ning fãa sẽn tar yam na n gesa bõn-kãensã,+n maag a yĩng n tags a Zeova maan-neerã tʋʋm yelle.+
Vẽnegr toor-toore
^ Bɩ, “pãngẽ.”
^ Bɩ, “wĩndgã sẽn yitẽ, la wĩndgã sẽn kẽedẽ.”
^ Bɩ, “b sɩɩsã.”
^ Bɩ, “sɩɩg ning kom sẽn tarã.”
^ Bɩ, “lakame.”
^ Bɩ, “B sɩɩsã kisga rɩɩb buud fãa.”
^ Bɩ, “B sɩɩsã.”
^ Ebre, “zaoogẽ.”
^ Bɩ, “a zẽkda naong rãmbã yĩngri,” rat n yeel t’a kɩtame tɩ ned pa tõe n paam-b ye.
