Matiye 8:1Verse-rãmb sã n tong taab seb-yend pʋgẽ, gʋls-bi kãngã n na n zĩnd pipi soabã ne yaoolem soabã sʋka, Yɩɩn. 37:9-1134

  • Wãoor n paam sãoogre (1-4)

  • Soda-naab sẽn tall tẽebo (5-13)

  • A Zeezi sãoogda neb wʋsg Kapɛrnawum (14-17)

  • D sẽn segd n tũ a Zeezi to-to (18-22)

  • A Zeezi kɩtame tɩ sob-kãseng yõke (23-27)

  • A Zeezi kɩtame tɩ zĩn-dãmb tɩ kẽ kurkuya (28-34)

8  Bãmb sẽn sig tãngã zugu, neb kʋʋng n pʋg bãmba.  La wãoor n wa n wõgemd bãmb taoor n yeele: “Zu-soaba, yãmb sã n dat bala, y tõe n kɩtame tɩ m lebg yɩlemde.”  Dẽ, bãmb tẽega b nug n sɩɩs-a n yeele: “M datame! Bɩ f lebg yɩlemde.” Zĩig pʋgẽ, a wãoodã sãoogame t’a lebg yɩlemde.  Rẽ poore, a Zeezi yeel-a lame: “Ra saag n togs ned ye. Kẽng n tɩ wilg f meng maan-kʋʋdã, la f kõ bũmb ning a Moyiiz sẽn wilgã tɩ yɩ kaset bãmb yĩnga.”  Bãmb sẽn kẽ Kapɛrnawum, soda-naab n wa bãmb nengẽ n kos bãmb  n yeel yaa: “M Soaala, mam tʋm-tʋmd n gãe yir ne bã-kɛgenga, n pa tõe n yik ye.”  Bãmb yeela yẽnda: “M sã n ta be, m na n sãoog-a lame.”  La soda-naabã leoka bãmba: “M Soaala, mam pa zems tɩ y wa mam zakẽ ye. Yãmb we n yeel bũmb bal tɩ mam tʋm-tʋmdã na n paama laafɩ.  Bala, neb n so ma-me, tɩ mam tar sodaas m sẽn so. La m sã n yeel a ye: ‘Kẽnge!’ a kẽngdame, la m yeel a to: ‘Wa!’ a watame. La m sã n yeel m tʋm-tʋmdã tɩ: ‘Maan woto!’ a maanda rẽ.” 10  A Zeezi sẽn wʋm gom-kãensã, linga bãmb wʋsg tɩ b yeel neb nins sẽn pʋgd bãmbã yaa: “Mam yeta yãmb sɩd tɩ Israyɛll soolmẽ wã, m pa yã ned tẽeb sẽn yaa kãseng woto ye. 11  La mam yeta yãmb tɩ neb wʋsg na n yii poorẽ la taoore, n wa zĩnd taablẽ ne a Abrahaam, a Izaak la a Zakoob saasẽ Rĩungã pʋgẽ. 12  La b na n loba Rĩungã kamb yɩng likã pʋgẽ. Yaa be la b na n yãb la b wãb b yẽnã.” 13  Rẽ poore, a Zeezi yeela soda-naabã yaa: “Kẽnge. Bɩ f kosgã reege, fo sẽn wilg tɩ f tara tẽebã yĩnga.” Wakat kãng bala, tʋm-tʋmdã bãag sãoogame. 14  La a Zeezi kẽnga a Pɩyɛɛr zakẽ wã, n tɩ mik t’a Pɩyɛɛr deem-poakã gãe ne bãag t’a yĩnsã wɩnge. 15  Bãmb sɩɩsa a nugu, la a yĩnsã sẽn da wɩngã sigame, t’a yik n sɩng b yell gesgo. 16  La zaabrã sẽn wa n ta, nebã talla neb wʋsg zĩn-dãmb sẽn tar n wa bãmb nengẽ, la b riga zĩn-dãmbã ne b noor gomd bala, la b sãoog neb nins fãa sẽn bẽedã, 17  sẽn na yɩl tɩ Wẽnnaam sẽn kɩt tɩ no-rɛɛs a Ezayi yeel bũmb ningã pidsi. A ra yeelame: “Bãmb meng deega tõnd bãase, la b tʋk tõnd toodo.” 18  A Zeezi sẽn yã tɩ neb kʋʋng n gũbg bãmbã, b yeela b karen-biisã tɩ b wa tɩ b kẽng mogrã rʋʋnde. 19  La gʋlsd a ye n kolg bãmb n yeele: “Karen-saamba, mam na n tũu yãmb n kẽng zĩig ning fãa y sẽn na n kẽnge.” 20  La a Zeezi leok-a lame yaa: “Waas* tara bogdo, tɩ yĩngr bõn-yɩgdɩ wã me tar tʋgdo, la ninsaal Biigã pa tar zĩig b sẽn na n gãneg b zug ye.” 21  Rẽ la b karen-biig a to yeel-b yaa: “Zu-soaba, kõ-y maam sor tɩ m deng n kẽng n tɩ mum m ba wã.” 22  T’a Zeezi yeel-a: “Kell n tũ maam, la f bas kũ-rãmbã tɩ b mum b kũum.” 23  La b sẽn kẽ koom-koglg pʋgẽ, b karen-biisã tũu bãmba. 24  La haya! Sob-kãseng n yik mogrã zugu, tɩ ko-pɛmã zẽkd koomã tɩ kẽed koglgã pʋgẽ. La a Zeezi ra gõeeme. 25  B kolgame n nek bãmb n yeele: “Zu-soaba, fãag-y-do. Tõnd na n kiime!” 26  La b yeel-b lame: “Yãmb a tẽeb bilf rãmba, bõe yĩng tɩ yãmb yɛɛsd* woto?” Rẽ poore, b yikame n tãs sobgã ne mogrã, la zĩigã lebga sɩddd. 27  Rẽ linga rapã wʋsgo, tɩ b yeele: “Nin-kãngã yaa bõe neda? Baa sobgã ne mogrã sakda bãmba.” 28  B sẽn ta mogrã rʋʋnd Gadara nebã soolmẽ, rap a yiib zĩn-dãmb sẽn tar yii yaadẽ wã n seg bãmba. B ra yaa nin-toos wʋsgo, hal tɩ ned baa a ye ra pa tõe n paam daood n tũ so-kãng ye. 29  La b ra kelemdame n yetẽ: “Wẽnnaam Biiga, bõe la yãmb dat ne tõndo? Yãmb waame n na n nams tõnd tɩ wakatã nan pa ta la?” 30  La sẽn da vẽsg ne be bilfu, kurkuy wʋsg n da be be n dɩtẽ. 31  Zĩn-dãmbã sɩnga a Zeezi bõosgo, n yeel yaa: “Yãmb sã n na n dig tõnd bɩ y kɩt tɩ d tɩ kẽ kurkuyã.” 32  La bãmb yeelame: “Kẽng-y-yã!” Dẽ, zĩn-dãmbã yiime n tɩ kẽ kurkuyã. La kurkuyã fãa zoeeme n ta koakã, n yi sigdgẽ* wã n lʋɩ mogrã pʋgẽ n ki koomẽ wã. 33  Sẽn da gũud-b kurkuyã zoeeme n kẽng tẽngã pʋgẽ, n tɩ togs kibarã fãa, baa bũmb ning sẽn paam neb nins zĩn-dãmbã sẽn da tarã. 34  La tẽngã neb fãa yiime n na n seg a Zeezi. B sẽn yã bãmba, b kos-b lame tɩ b yi bãmb soolmẽ wã.

Vẽnegr toor-toore

Yaa we-rũng sẽn wõnd baaga, la a bedrmã pa ta baag ye.
Bɩ, “pɛleng yɩke.”
Bɩ, “ko-koak sẽn yaa selle.”