Matiye 23:1Verse-rãmb sã n tong taab seb-yend pʋgẽ, gʋls-bi kãngã n na n zĩnd pipi soabã ne yaoolem soabã sʋka, Yɩɩn. 37:9-1139
-
Da rɩk-y gʋlsdbã ne Fariziẽ-rãmbã togs-n-taar ye (1-12)
-
Gʋlsdbã ne Fariziẽ-rãmbã na n paama toodo (13-36)
-
A Zeezi yãbda Zerizalɛm yĩnga (37-39)
23 Dẽ, a Zeezi goma ne kʋʋngã la ne b karen-biisã n yeele:
2 “Gʋlsdbã ne Fariziẽ-rãmbã zĩnda a Moyiiz zaoorẽ.
3 Woto wã, bɩ y sak bũmb nins fãa b sẽn yet yãmbã la y tũ, la y ra maan wa bãmb ye. Bala, b gomdame la b pa tũud bũmb nins b sẽn yetã ye.
4 Bãmb sẽbda zɩɩb sẽn yaa zɩsd n palgd nebã bãgdo, la b mens yaool n pa rat n sɩɩs-b ne b nug-bil ye.
5 Bũmb nins fãa b sẽn maandã, b maanda nebã gesg yĩnga. Bala, b maanda tʋgd nins b sẽn ningd Gʋls-sõamyã goamã tɩ yaa yalemse, n sẽbd rẽ n tẽed tɩ kogend-b lame, la b maand b futã noy zerdã wogdo.
6 Bãmb nonga naam zĩis tigã zĩisẽ, la taoor zĩis* karen-dotẽ wã.
7 B ratame tɩ nebã pʋʋsd bãmb raasã pʋsẽ, la b boond-b tɩ Rabi.*
8 La sã n yaa ne yãmba, ra sak-y tɩ ned bool yãmb tɩ Rabi* ye. Bala, nin-yɛng bal n yaa yãmb Karen-saamba, tɩ yãmb fãa yaa saam-biisi.
9 Sẽn paase, ra bool-y ned baa a ye tẽngã zug tɩ y ba ye. Bala, yãmb Ba yaa a yembre, Soab ning sẽn be saasẽ wã.
10 Ra sak-y me tɩ b bool yãmb tɩ taoor dãmba, bala, yãmb Taoor soab yaa a yembre: Yaa Kiristã.
11 La ned ning sẽn yaa kãseng n yɩɩd yãmb sʋkã segd n yɩɩ yãmb tʋm-tʋmda.
12 Ned ning sẽn zẽkd a menga, b na n sik-a lame, la ned ning sẽn sikd a menga, b na n zẽk-a lame.
13 “Yãmb a gʋlsdbã ne Fariziẽ-rãmbã sẽn yaa pʋ-lik rãmbã, yãmb na n paama toogo! Yãmb sẽn pag saasẽ Rĩungã nebã taoorã yĩnga. Bala, yãmb mensã pa kẽede, la y pa basd neb nins sẽn datã tɩ b kẽ ye.
14 *——
15 “Yãmb a gʋlsdbã ne Fariziẽ-rãmbã sẽn yaa pʋ-lik rãmbã, yãmb na n paama toogo! Bala, yãmb togda sor n dʋʋgd mogr la y saagd zĩig fãa sẽn na yɩl n paam ned sẽn na n tuub n sak* yãmb karengã. La y sã n paam ned a woto, y maandame t’a zems ne Zeyɛn* n yɩɩd yãmb mensã naoor a yiibu.
16 “Yãmb sẽn yaa taoor lʋɩtb sẽn yaa zoensã, y na n paama toogo. Yãmb yetame: ‘Ned sã n wẽen ne wẽnd-doogã, pa yell ye. La ned sã n wẽen ne sãnemã sẽn be wẽnd-doogẽ wã, a segd n pidsa a wẽenegã.’
17 Yam-koees rãmb la zoense! Sɩd-sɩda, bʋg n tar yõod n yɩɩda? Sãnemã bɩ, bɩ wẽnd-doogã sẽn kɩt tɩ sãnemã lebg sõngã?
18 Yãmb yetame me: ‘Ned sã n wẽen ne tẽn-kugrã, pa yell ye. La ned sã n wẽen ne kũunã sẽn be tẽn-kugrã zugã, a segd n pidsa a wẽenegã.’
19 Zoense! Sɩd-sɩda, bʋg n tar yõod n yɩɩda? Kũunã bɩ, bɩ tẽn-kugrã sẽn kɩt tɩ kũunã lebg sõngã?
20 Woto wã, ned sã n wẽen ne tẽn-kugrã, a wẽenda ne tẽn-kugrã la ne bũmb nins fãa sẽn be a zugã me.
21 La ned sã n wẽen ne wẽnd-doogã, a wẽenda ne wẽnd-doogã la ne Soab ning sẽn be a pʋgẽ wã me.
22 Sẽn paase, ned sã n wẽen ne saasã, a wẽenda ne Wẽnnaam geerã la ne Soab ning sẽn zao a zugã me.
23 “Yãmb a gʋlsdbã ne Fariziẽ-rãmbã sẽn yaa pʋ-lik rãmbã, yãmb na n paama toogo! Bala yãmb kõta mante, anɛt la kumẽ piig-pʋɩɩre, la yãmb pa sakd Tõogã bũmb nins sẽn tar yõod n yɩɩdã, sẽn yaa tɩrlem, nimbãan-zoeer la kɩs-sɩdã ye. Yaa tɩlɛ tɩ y maan bõn-kãensã, la y pa segd n bas bũmb a taabã me ye.
24 Taoor lʋɩtb sẽn yaa zoense, yãmb yoogda rũmpigli, n yaool n vend yʋgemde!
25 “Yãmb a gʋlsdbã ne Fariziẽ-rãmbã sẽn yaa pʋ-lik rãmbã, yãmb na n paama toogo! Bala, yãmb nedgda laasã poɛyã, la b pʋsã pida ne yão-beed* la yĩngã ratem sakre.
26 Fariziẽ sẽn yaa zoanga, reng n nedg laasã pʋse, tɩ b poɛyã me yɩ yɩlma.
27 “Yãmb a gʋlsdbã ne Fariziẽ-rãmbã sẽn yaa pʋ-lik rãmbã, yãmb na n paama toogo! Bala, yãmb wõnda yaad b sẽn bol ne goor tɩ b yaa peelse. B yɩngã sɩd bee neere, la b pʋsã pida ne neb sẽn ki kõaba, la rẽgd buud fãa.
28 Woto me, nif gesgẽ yãmb wõnda nin-tɩrse, la yãmb pʋsã pida ne pʋ-lik la tʋʋm-wẽnse.
29 “Yãmb a gʋlsdbã ne Fariziẽ-rãmbã sẽn yaa pʋ-lik rãmbã, yãmb na n paama toogo! Bala, yãmb meta no-rɛɛsdbã yaado, la y nagsd nin-tɩrsã yaad
30 n yetẽ: ‘Tõnd sã n da zĩnd d yaab-rãmbã wakate, d ra pa na n naag-b n daag no-rɛɛsdbã zɩɩm ye.’
31 Woto, yãmb mensã kõta kaset tɩ y yaa neb nins sẽn kʋ no-rɛɛsdbã yagense.
32 Rẽ wã, bɩ y baas tʋʋm nins y yaab-rãmbã sẽn sɩngã.
33 “Wiis la wag-toos* yagense, yãmb na n yɩɩ wãn n põs Zeyɛn* bʋʋdã?
34 Yaa woto yĩng la mam tʋmd no-rɛɛsdb ne yam dãmb la karen-saam-dãmb yãmb nengẽ. Yãmb na n kʋʋ kẽere, n ka sãnda ra-lugs zutu, la y pãb kẽer me ne kalwaas y karen-dotẽ, n nams-b tẽng-tẽnga,
35 sẽn na yɩl tɩ nin-tɩrsã fãa zɩɩm sẽn daag tẽngã zugã zĩnd yãmb zutu. Sẽn sɩng ne nin-tɩrg a Abɛll zɩɩmã, n tãag a Baraki biig a Zakari yãmb sẽn kʋ Wẽnnaam doogã ne tẽn-kugrã sʋkã zɩɩm.
36 Sɩd-sɩda, mam yeta yãmb tɩ bõn-kãensã fãa na n waa zãmaan-kãngã zugu.
37 “Zerizalɛm, Zerizalɛm, fo sẽn kʋʋd no-rɛɛsdbã, la f lobd neb nins b sẽn tʋm fo nengẽ wã ne kuga, naoor wʋsg la mam sẽn bao n na n tigim fo kambã wa no-yãang sẽn tigimd a no-bi a pɩgs tẽngrã! La yãmb pa tʋlg rẽ ye.
38 Ade! B basa yãmb roogã ne-yã.*
39 Bala, mam yeta yãmb tɩ masã tɛka, y pa na n le yã maam, hal n tãag y sẽn na n yeel tɩ ‘Bark bee ned ning sẽn wat ne a Zeova* yʋʋrã zugu!’ ”
Vẽnegr toor-toore
^ Bɩ, “zĩ-sõamyã.”
^ Bɩ, “Karen-saamba.”
^ Bɩ, “Karen-saamba.”
^ Ges-y tẽngr vẽnegr ning sẽn be Matiye 17:21 wã.
^ Bɩ, “n tuubi.”
^ Ges-y gom-biis võor bilgrã zĩigẽ.
^ Bɩ, “fãabo.”
^ Gɛrk, “põeyã.”
^ Ges-y gom-biis võor bilgrã zĩigẽ.
^ Pa rẽ bɩ, “b basa yãmb ne ro-vɩʋʋgo.”
^ Ges-y gom-biis võor bilgrã zĩigẽ.
