Matiye 17:1Verse-rãmb sã n tong taab seb-yend pʋgẽ, gʋls-bi kãngã n na n zĩnd pipi soabã ne yaoolem soabã sʋka, Yɩɩn. 37:9-1127

  • A Zeezi tedgrã (1-13)

  • Tẽeb sẽn zem mutard bila (14-21)

  • A Zeezi le togsame tɩ b na n kʋʋ bãmba (22, 23)

  • B yaoo yõor-yaood ne ligd-koɛɛng sẽn yi zĩnf noorẽ (24-27)

17  Rasem a yoob poore, a Zeezi peega a Pɩyɛɛre, a Zak ne a ba-biig a Zã, n dʋ tãn-lug-lug zugu.  La a Zeezi tedga bãmb taoore, tɩ b nengã yãgd wa wĩntoogã, tɩ b zugẽ futã lebg peels faddd.*  La gese! A Moyiiz ne a Eli vẽnega b mens ne bãmba, n sõsd ne a Zeezi.  Dẽ, a Pɩyɛɛr yeela a Zeezi yaa: “Zu-soaba, tõnd sẽn be ka wã yaa bõn-sõngo. Y sã n data, m na n tilga fu-rot a tãab ka. A ye yãmb yĩnga, a to wã a Moyiiz yĩnga, la a ye me a Eli yĩnga.”  A Pɩyɛɛr sẽn wa n ket n gomdã, sawadg sẽn pɩnd n bui bãmba. La koɛɛg n yi sawadgẽ wã n yeele: “Yãoã yaa mam Bi-ribla, mam sẽn nong a soabã. A taa mam yam. Kelg-y-yã-a.”  Karen-biisã sẽn wʋm dẽ wã, b yɛɛsa wʋsg n lʋɩ n fõgen b nens tẽnga.  Dẽ, a Zeezi kolgame n sɩɩs bãmb n yeele: “Yik-y-yã. Ra zoe-y rabeem ye.”  La b sẽn zẽk b nense, b pa yã ned a to n zʋʋg a Zeezi ye.  B sẽn wa n sigd tãngã zugã a Zeezi yeel-b lame yaa: “Da togs-y ned baa a ye bũmb ning yãmb sẽn yã wã, hal tɩ ninsaal Biigã wa vʋʋg n yi kũ-rãmb sʋka.” 10  La karen-biisã soka bãmba: “La bõe yĩng tɩ gʋlsdbã yetẽ t’a Eli segd n deng n waame?” 11  Bãmb leokame n yeele: “A Eli sɩd watame n na n lebs n maneg bũmb fãa. 12  La mam yeta yãmb t’a Eli zoe n waame tɩ b pa bãng-a ye. La b maan-a-la bũmb ning fãa b sẽn date. Woto me, ninsaal Biigã na n namsa b nusẽ.” 13  Dẽ, karen-biisã bãngame tɩ yaa a Zãmbatiis yell la a Zeezi sẽn da gomd ne-bã. 14  Bãmb sẽn wa n kolgd kʋʋngã, rao n pẽneg a Zeezi n yĩgimd bãmb taoor n yeele: 15  “Zu-soaba, zoe-y m biigã nimbãanega, bala kisĩnkiir n tar-a t’a namsd wʋsgo. A mi n lʋɩɩ bugmẽ, la a mi n lʋɩ koomẽ me. 16  Mam tall-a lame n wa yãmb karen-biisã nengẽ, la b pa tõog n sãoog-a ye.” 17  A Zeezi leokame n yeele: “Zãmaan neb sẽn ka tẽeb la sẽn yaa nin-wẽnse, mam segd n paa ne yãmb n kaoos wakat a wãna? Mam segd n maana sũ-mar ne yãmb n kaoos wakat a wãna? Tall-y-yã-a n wa ka.” 18  Rẽ poore, a Zeezi tãsa zĩnã, la a yiime n bas biigã t’a sãoog wakat kãng bala. 19  Dẽ, karen-biisã waa a Zeezi nengẽ neb a taab sẽn pa pẽ yambẽ wakate, n sok bãmb yaa: “Bõe yĩng tɩ tõnd pa tõog n dig zĩnã?” 20  La bãmb leokame n yeele: “Yaa yãmb tẽebã sẽn paoodã yĩnga. Mam yeta yãmb sɩd tɩ yãmb sã n tar tẽeb sẽn zem mutard bila,* y na n yeela tãn-kãngã, ‘Serg ka n leb ka,’ la a na serge. Bũmb kõn zĩnd yãmb sẽn pa na n tõog n maan ye.” 21  *—⁠—⁠ 22  Bãmb sẽn wa n tigim taab Galile, a Zeezi yeela b karen-biisã yaa: “B na n zãmba ninsaal Biigã n ning-b nebã nusẽ, 23  la b na n kʋʋ bãmb tɩ rasem a tãab-n-soabã daar bɩ b vʋʋge.” La rẽ sãama karen-biisã sũy wʋsgo. 24  Bãmb sẽn ta Kapɛrnawum, neb nins sẽn deesd darkem* a yiibã lampo wã kolga a Pɩyɛɛr n soke: “Yãmb karen-saambã yaooda darkem a yiibã lampo wã bɩ?” 25  T’a leok tɩ “n-yẽe.” La a sẽn wa n kẽ roogẽ wã bala, a Zeezi sok-a lame yaa: “Sɩmo, fo tagsg yaa bõe ne yãoã? Dũniyã rĩm-dãmb reesda lampo wã bɩ yõor-yaoodã ãnd dãmb nusẽ? B kambã nusẽ bɩ, bɩ sãambã nusẽ?” 26  A sẽn leok tɩ “sãambã nusẽ” wã, a Zeezi yeel-a lame: “Rẽnd sɩd-sɩda, kambã pa yaood ye. 27  La sẽn na yɩl tɩ bãmb da wa lake, kẽng mogrẽ wã n tɩ lob lɛooga. Yaag zĩnf ning f sẽn na n yõk pipi wã noor tɩ f na n yãa wanzuri ligd-koɛɛnga.* Yãk n tɩ kõ bãmb maam ne foom yĩnga.”

Vẽnegr toor-toore

Gɛrk, “lebg peels wa vẽenem.”
Mutard bil wõnda siin-bila.
Biiblã seb-kʋdã b sẽn gʋls ne nusã kẽer pʋsẽ, vɛrse-kãngã ka be ye. Rẽnd yaa vẽeneg t’a goamã pa naag Wẽnnaam sẽn vẽneg-b rãmbã ye.
Ges-y gom-biis võor bilgrã zĩigẽ.
Gɛrk, “statɛɛr ligd-koɛɛnga,” tõe tɩ yaa tetradarkem.