Mark 8:1Verse-rãmb sã n tong taab seb-yend pʋgẽ, gʋls-bi kãngã n na n zĩnd pipi soabã ne yaoolem soabã sʋka, Yɩɩn. 37:9-1138

  • A Zeezi rɩlgda rap 4 000 (1-9)

  • Nebã kota yel-solemde (10-13)

  • Fariziẽ-rãmbã la a Erood rabɩllã (14-21)

  • B sãooga zoang Betsayida (22-26)

  • A Pɩyɛɛr wilga Kiristã sẽn yaa ned ninga (27-30)

  • A Zeezi pĩnd n togsame tɩ b na n kʋ-b lame (31-33)

  • Yɩ karen-biig hakɩɩk sẽn dat n yɛɛlga (34-38)

8  Neb kʋʋng n le wa n tigim taab bãmb nengẽ, tɩ rɩɩb kae b sẽn na n dɩ ye. Dẽ, bãmb boola karen-biisã n yeel-ba:  “Kʋʋngã nimbãaneg tara maam, bala yaa rasem a tã masã la b be ne maam, la b pa tar rɩɩb n na n dɩ ye.  Mam sã n kuils-b ne kom, b na n soba sorã zugu. Sẽn paase, kẽer yita zĩ-zãrsẽ.”  La b karen-biisã leok-b lame yaa: “Yɛ la tõnd na n paam bur weoogẽ ka tɩ sek nin-kãensã?”  Dẽ, a Zeezi sok-b lame: “Bur a wãn la yãmb tara?” Tɩ b leok n yeele: “Bãmb b yopoe.”  Bãmb yeela kʋʋngã tɩ b zĩnd tẽnga. Rẽ poore, b rɩka bur a yopoe wã n pʋʋs Wẽnnaam barka, la b kao n kõ b karen-biisã sẽn na yɩl tɩ b pʋɩ. B reegame n pʋɩ kʋʋngã.  Karen-biisã ra tara zĩm-bõones a wãn me. A Zeezi ninga zĩmã barka, n yeel-b tɩ b pʋɩ rẽ me.  Dẽ, b rɩɩme n tɩge, la b tigs gɩrsã sẽn kellã n pids ya-bɛd a yopoe.  Yɩɩ na maan rap tus a naase. Rẽ poore, a Zeezi kuils-b lame. 10  Tao-tao bala, b kẽe koom-koglgã ne b karen-biisã n kẽng Dalmanuta soolmẽ wã. 11  Be, Fariziẽ-rãmbã waa a Zeezi nengẽ n sɩng no-koeemd ne bãmba. Sẽn na yɩl n mak-ba, b kos-b lame tɩ b maan yel-solemd sẽn yit saasẽ. 12  Rẽ sãama a Zeezi sũur wʋsg tɩ b yeele: “Bõe yĩng tɩ zãmaan-kãngã nebã rat n yã yel-solemde? Sɩd-sɩda, mam yetame tɩ zãmaan-kãngã nebã pa na n yã yel-solemd a to ye.” 13  Rẽ poore, bãmb bas-b lame n le kẽ koom-koglgã n kẽng mogrã rʋʋnde. 14  La karen-biisã yĩmame n pa zã bur ye. B ra pa tar baa fʋɩ koom-koglgã pʋgẽ n zʋʋg bur-yɛng bala. 15  A Zeezi keoog-b lame n yeele: “Puk-y y nini, la y gũus ne Fariziẽ-rãmbã rabɩllã, la a Erood rabɩllã.” 16  Dẽ, bãmb sɩngame n zabd taaba, bãmb ned baa a ye sẽn pa zã burã yĩnga. 17  A Zeezi sẽn bãng rẽ wã, b yeel-b lame: “Bõe yĩng tɩ yãmb zabd taab y sẽn pa tar burã yĩnga? Yãmb ket n pa wʋmd võor la? Yãmb yamã ket n pa lik la? 18  ‘Baa yãmb sẽn tar ninã, y pa ne la? Baa y sẽn tar tʋbã, y pa wʋmd la?’ Yãmb tẽra 19  mam sẽn wa n kao bur a nu wã n kõ rap tus a nu wã, yãmb wʋka gɩrsã n pids yaas a wãna?” Tɩ b leok yaa: “Piig la a yiibu.” 20  “Mam sẽn wa n kao bur a yopoe wã n kõ rap tus a naasã, yãmb tigsa gɩrsã n pids ya-bɛd a wãna?” Tɩ b yeele: “A yopoe.” 21  Rẽ la a Zeezi sok-ba: “Yãmb ket n pa wʋmd võor la?” 22  Bãmb taa Betsayida. Be, neb n tall rao sẽn yaa zoang n wa bãmb nengẽ, n kos bãmb tɩ b sɩɩs-a ne b nugu. 23  La a Zeezi gãda zoangã nug n tall-a n yi tẽngã kɩrenga. B ninga kolkood a ninẽ wã, n tik-a ne b nusi, n yaool n sok-a: “Fo nee bũmb bɩ?” 24  Raoã gesame, n yeele: “Mam nee neba. B wõnda tɩɩse, la b kẽndame.” 25  Bãmb le sɩɩsa raoã ninã ne b nusi, la raoã yãa vẽenega. A ninã pukame, t’a ne bũmb fãa sõma. 26  Dẽ, bãmb kuils-a lame n yeel-a yaa: “Da lebg n kẽ tẽngã pʋgẽ ye.” 27  A Zeezi ne b karen-biisã yii be, n dabd Filip Sezaare tẽn-bõonesẽ wã. Sorã zugu, b soka b karen-biisã yaa: “Nebã yetame tɩ mam yaa ãnda?” 28  Tɩ b leok-b n yeele: “A Zãmbatiisi, la kẽer yetame t’a Eli, tɩ sãnda yetẽ tɩ no-rɛɛsdbã nin-⁠yende.” 29  La a Zeezi sok-b lame: “La yãmba, y yetame tɩ mam yaa ãnda?” T’a Pɩyɛɛr leok yaa: “Yãmb yaa Kiristã.” 30  Rẽ la a Zeezi yeel-b tɩ b ra saag n togs ned baa a ye bãmb sẽn yaa ned ningã ye. 31  Sẽn paase, bãmb sɩngame n wilgd-b tɩ ninsaal Biigã segd n paama namsg wʋsgo, tɩ kãsem-dãmbã ne maan-kʋʋdbã taoor dãmb la gʋlsdbã na n zãgsa bãmba, tɩ b na n kʋʋ bãmba, la tɩ rasem a tãab-n-soabã daare, b na n vʋʋgame. 32  B pʋd n goma ne-b rẽ yell vẽenega. La a Pɩyɛɛr peega bãmb n yi kɛɛng n gom bãmba. 33  Rẽ la a Zeezi wẽneg n ges b karen-biisã, la b zab a Pɩyɛɛr n yeele: “Leb mam poorẽ, Sʋɩtãana! Bala, fo tagsa wã pa Wẽnnaam tagsa ye. Yaa ninsaalb tagsa.” 34  Bãmb boola kʋʋngã ne b karen-biisã n yeel-ba: “Ned sã n dat n tũ maam, bɩ a kɩɩs a mengã raabo, la a rɩk a kũum ra-luk* n pʋg maam wakat fãa. 35  Bala, ned ning sẽn dat n kogl a vɩɩm* na n bõn-a lame, la ned ning sẽn bõn a vɩɩm* mam yĩng la koe-noogã yĩnga, a na n le paam-a lame. 36  Sɩd-sɩda, ned sã n paam dũniyã tõr n yaool n bõn a vɩɩm,* a yõod bee yɛ? 37  Wall bõe la ned tõe n dɩk n kõ tɩ led a vɩɩmã* zĩiga? 38  Bala ned sã n zoe yãnd n pa rat tɩ zãmaan-kãngã nebã sẽn yaa yoaadb* la yel-wẽn-maandbã bãng tɩ yẽ yaa mam karen-biiga, la t’a tẽeda mam goamã, ninsaal Biigã me sã n wa wa ne b Ba wã ziir la ne b malɛg-sõamyã wã, b na n zoee yãnd ne yeel t’a yaa b karen-biiga.”

Vẽnegr toor-toore

Ges-y gom-biis võor bilgrã zĩigẽ.
Bɩ, “sɩɩga.”
Bɩ, “sɩɩga.”
Bɩ, “sɩɩga.”
Bɩ, “sɩɩga.”
Bɩ, “wẽn-kɩɩsdba.”