Luk 4:1Verse-rãmb sã n tong taab seb-yend pʋgẽ, gʋls-bi kãngã n na n zĩnd pipi soabã ne yaoolem soabã sʋka, Yɩɩn. 37:9-1144
-
Sʋɩtãanã makda a Zeezi (1-13)
-
A Zeezi sɩnga mooneg Galile (14, 15)
-
B pa kelg a Zeezi Nazarɛt ye (16-30)
-
A Zeezi kẽnga Kapɛrnawum karen-doogẽ wã (31-37)
-
B sãooga a Sɩmo reem-poakã ne neb a taaba (38-41)
-
Kʋʋng n yã a Zeezi zĩig neb sẽn pa beẽ (42-44)
4 Dẽ, a Zeezi sẽn pid ne vʋʋsem sõngã yii Zʋrdẽ kʋɩlgẽ wã, la vʋʋsem sõngã tall-b lame n kẽng weoogẽ wã
2 tɩ b pa be rasem pis-naase, tɩ Sʋɩtãanã* ra makd-ba. Bãmb pa rɩ baa fʋɩ ra-kãens ye. La ra-kãens loogr poore, kom n yõk-ba.
3 Rẽ la Sʋɩtãanã* yeel-b yaa: “Fo sã n yaa Wẽnnaam bi-ribl bɩ f yeel kug-kãngã t’a lebg buri.”
4 La a Zeezi leok-a lame yaa: “B gʋlsame: ‘Ninsaal pa tog n vɩ ne rɩɩb bal ye.’ ”
5 Dẽ, Sʋɩtãanã* tall-b lame n dʋ tãng zugu, n wilg-b dũniyã soolem toɛy-toɛyã fãa nif kamsg pʋgẽ.
6 La a yeel-ba: “Mam na n kõo foo soolem-kãensã fãa ne b ziirã, bala, b kõ-b-la maam, tɩ ma-me kõt ned ning m sẽn date.
7 Woto wã, fo sã n wõgemd n waoog maam, b fãa na n lebga fo rẽnda.”
8 La a Zeezi leok-a lame n yeele: “B gʋlsame: ‘Yaa fo Wẽnnaam a Zeova* bal la f segd n waooge, la yaa bãmb b ye bal la f segd n sak ne f sũur fãa.’ ”
9 Dẽ, Sʋɩtãanã talla bãmb n kẽng Zerizalɛm n tɩ rʋʋs-b wẽnd-doogã zugu,* n yeel bãmb yaa: “Fo sã n yaa Wẽnnaam bi-ribla, bɩ f bas f meng n yi ka n lʋɩ,
10 bala, b gʋlsame: ‘Bãmb na n kõo b malɛgsã noor tɩ b gũ foom,’
11 la ‘malɛgsã na n koka foom ne b nusi, tɩ f naoor da wa lak kugr ye.’ ”
12 T’a Zeezi leok-a yaa: “B yeelame: ‘Da mak a Zeova* fo Wẽnnaamã ye.’ ”
13 Dẽ, Sʋɩtãanã* sẽn mak bãmb n sa, a loogame n bas bãmba. La a ra ket n baooda weer n na n le mak-ba.
14 La a Zeezi sẽn pid ne vʋʋsem sõngã lebg n leba Galile. La b tʋʋm-sõma wã kibar saaga tẽn-kɩremsã fãa.
15 Bãmb sɩngame n zãmsd nebã karen-dotẽ wã me, tɩ nebã fãa ra pẽgd bãmba.
16 Rẽ poore, b kẽnga Nazarɛt sẽn yaa tẽng ning pʋgẽ b sẽn wub bãmbã. B tɩ kẽe karen-doogẽ wã wa b sẽn minim n maand Vʋʋsg daar fãa wã. B wa n yikame n na n karme,
17 tɩ b kõ bãmb no-rɛɛs a Ezayi seb-pindmã, tɩ b lak seb-pindmã n yã zĩig ning b sẽn gʋlse:
18 “A Zeova* vʋʋsem sõngã bee mam zugu. Bala, b yãka maam tɩ m moon koe-noog naong rãmbã. B tʋma maam tɩ m togs yembsã tɩ b na n paama b mense, la zoensã tɩ b nin na n pugsame, la tɩ m kɩt tɩ sẽn namsd-bã paam lohorem n looge,
19 la m moon a Zeova* bark yʋʋmdã.”
20 Rẽ poore, b pila seb-pindmã n lebs tʋm-tʋmdã, la b zĩndi. La nebã fãa sẽn da be karen-doogẽ wã ra geta bãmb kuii.
21 Rẽ la b sɩng goama, n yeel-ba: “Rũndã, Gʋls-sõamyã gom-kãensã yãmb sẽn kelg mas-masã wã pidsame.”
22 B fãa sɩngame n gomd n pẽgd bãmba. Gom-nood nins sẽn da yit bãmb noorẽ wã me ling-b lame tɩ b yetẽ: “Pa a Zozɛf biigã la?”
23 Rẽ la a Zeezi yeel-b yaa: “Sãmbg kae tɩ y na n wẽe maam yel-bũn-kãnga: ‘Tɩpa, sãoog f menga. Bɩ y maan bũmb nins d sẽn wʋm tɩ y maana Kapɛrnawummã ka me sẽn yaa y meng tẽngã.’ ”
24 Rẽ poore, a Zeezi yeelame: “Sɩd-sɩda, mam yeta yãmb tɩ no-rɛɛs kae b sẽn nand a meng tẽngẽ ye.
25 La mam yeta yãmb sɩd tɩ pʋg-kõap wʋsg ra bee Israyɛll a Eli wakatẽ wã, saagã sẽn wa n maan yʋʋm a tã la kiis a yoob n pa ni, tɩ kom-kãseng kẽ soolmã fãa wã.
26 La b pa tʋm a Eli pʋg-kãens baa a ye nengẽ, sã n pa pʋg-kõor a ye sẽn da be Sarfate, Sɩdõ soolmẽ wã nengẽ ye.
27 Sẽn paase, wãoob wʋsg ra bee Israyɛll no-rɛɛs a Eliize wakatẽ wã. La b baa a ye pa paam sãoogr* tɩ sã n pa Siiri rao a Naama bala.”
28 La neb nins fãa sẽn wʋm gom-kãensã karen-doogã pʋgẽ wã sũy puuga wʋsgo,
29 tɩ b yik n veo bãmb n yi tẽngã. B tall-b lame n tɩ rʋ tãng ning zug b sẽn me b tẽngã, n dat n tus-b n lubi.
30 La a Zeezi pasga b sʋkã n looge.
31 Dẽ, bãmb lebg n kẽnga Kapɛrnawum sẽn yaa Galile tẽngã. La bãmb ra zãmsda nebã Vʋʋsg daar fãa.
32 Nebã sũy yɩɩ noog wʋsg ne b sẽn da zãmsd-b to-to wã. Bala, b ra gomda ne tõogo.
33 La karen-doogẽ wã, rao n da be be tɩ zĩn tar-a. A zẽka a koɛɛg n yeele:
34 “Nazarɛt rao a Zeezi, bõe la yãmb dat ne tõndo? Yãmb waame n na n sãam tõnd la? Mam mii yãmb sẽn yaa ned ningã vẽenega. Yãmb yaa Wẽnnaam Sõng Soabã.”
35 La a Zeezi tãsa zĩnã n yeele: “Sĩndi, la f yi n bas-a.” Dẽ, zĩnã kɩtame tɩ raoã lʋɩ nebã sʋka, la a yi n bas-a n pa pogl-a ye.
36 Rẽ linga nebã fãa wʋsgo, tɩ b sɩng n yet taaba: “Yaa koe-bʋg buud la woto? Bala b tara tõog la pãnga, n tãsd zĩn-dãmb tɩ b yita!”
37 Dẽ, b kibarã ra ket n saagda tẽn-kɩremsã ween-vɩɩsã fãa.
38 B sẽn yi karen-doogẽ wã, b tɩ kẽe a Sɩmo zakẽ wã. La a Sɩmo reem-poakã ra bẽedame t’a yĩnsã wɩng wʋsgo, tɩ b kos a Zeezi tɩ b sõng-a.
39 La bãmb sulga a zugẽ n tãs yĩn-wɩngrã, la a yĩnsã sẽn da wɩngã sigame. Zĩig pʋgẽ, a yikame n sɩng b yell gesgo.
40 La wĩndgã sẽn wa n kẽedẽ wã, neb nins fãa sẽn da tar neb sẽn bẽed bãas buud toor-toor tall-b lame n wa a Zeezi nengẽ. Bãmb tika b ned kam fãa ne b nusi, n maag-ba.
41 Zĩn-dãmb me n da yit n basd neb wʋsgo, la b zẽkd b koees n yetẽ: “Yãmb yaa Wẽnnaam Biiga.” La a Zeezi ra tãsd-b lame, n pa basd-b tɩ b gom ye. Bala, b ra miime tɩ bãmb la Kiristã.
42 La yibeoogã pĩnda, a Zeezi yiime n kẽng zĩig neb sẽn ka be. La kʋʋngã sɩnga bãmb gẽesgo,* n wa zĩig ning bãmb sẽn da be wã. B ra modgdame n dat tɩ b pa ne bãmba.
43 La bãmb yeel-b lame: “Mam segd n moona Wẽnnaam Rĩungã koe-noogã tẽns a taab pʋsẽ me. Bala, yaa bõn-kãng yĩng la b tʋm maam.”
44 Dẽ, bãmb tɩ moona Zide karen-dotẽ wã.
Vẽnegr toor-toore
^ Gɛrk, “diabolos” sẽn dat n togs tɩ “munaafɩɩka.”
^ Gɛrk, “diabolos” sẽn dat n togs tɩ “munaafɩɩka.”
^ Gɛrk, “diabolos” sẽn dat n togs tɩ “munaafɩɩka.”
^ Ges-y gom-biis võor bilgrã zĩigẽ.
^ Bɩ, “kogrẽ wã, zĩig ning sẽn yaa lug-lug n yɩɩdã.”
^ Ges-y gom-biis võor bilgrã zĩigẽ.
^ Gɛrk, “diabolos” sẽn dat n togs tɩ “munaafɩɩka.”
^ Ges-y gom-biis võor bilgrã zĩigẽ.
^ Ges-y gom-biis võor bilgrã zĩigẽ.
^ Bɩ, “yɩlgre.”
^ Bɩ, “bao ne sũur fãa.”
