4:1Verse-rãmb sã n tong taab seb-yend pʋgẽ, gʋls-bi kãngã n na n zĩnd pipi soabã ne yaoolem soabã sʋka, Yɩɩn. 37:9-1154

  • A Zeezi ne Samari pagã (1-38)

    • Waoog Wẽnnaam “ne sɩɩga, la ne sɩda” (23, 24)

  • Samari neb wʋsg tẽe a Zeezi (39-42)

  • A Zeezi sãooga rĩmã tʋm-tʋmd-kãseng bi-ribla (43-54)

4  Zu-soabã sẽn bãng tɩ Fariziẽ-rãmbã wʋmame tɩ bãmb* paamda karen-biis wʋsgo, la tɩ b lisda neb wʋsg n yɩɩd a Zã wã,  (la pa a Zeezi meng n da lisd nebã ye. Yaa b karen-biisã)  b yii Zide n dɩk sor n na n leb Galile.  La b ra segd n pasga Samari soolmã.  Dẽ, bãmb taa Samari tẽng a ye sẽn boond tɩ Sɩsaar sẽn pẽ pʋʋg ning a Zakoob sẽn da kõ a biig a Zozɛfã.  Sɩd me, a Zakoob bulgã ra bee be. La a Zeezi sẽn da yɛ so-toakã yĩngã, b kell n zĩnda bulgã noore. Ra yaa wakat a yoob-n-soabã sẽnese.*  Samari pag n wa n na n yõng koom, t’a Zeezi yeel-a yaa: “Kõ-m koom tɩ m yũ wɛ.”  (Bala, b karen-biisã ra kẽnga tẽngã pʋgẽ n na n tɩ ra rɩɩbo.)  Rẽ la Samari pagã yeel-b yaa: “Maana wãn tɩ yãmb yaa Zʋɩf n yaool n kot maam koom n na n yũ, baa ne mam sẽn yaa Samari pagã?” (Bala, Zʋɩf-rãmbã ra pa gomd ne Samari nebã ye.) 10  La a Zeezi leokame n yeel-a: “Fo sã n da mi Wẽnnaam kũunã b sẽn kõt zaalmã, la soab ning sẽn yet foo: ‘Kõ-m koom tɩ m yũ’ wã sẽn yaa ned ninga, yaa foo n da na n kos bãmba, la b na n kõo foo vɩɩm koom.” 11  Tɩ pagã yeel-ba: “Soaala, yãmb pa tar lʋʋg meng n na n yõng koom ye. Sẽn paase, bulgã zulmame. Woto wã, yɛ la yãmb na n paam vɩɩm koomã? 12  Yãmb pa yɩɩd tõnd yaab a Zakoob sẽn kõ tõnd bulgã, tɩ bãmb ne b kambã la b rũmsã me yũ a koomã ye. Bɩ bõe?” 13  T’a Zeezi leok n yeel-a: “Ned ning fãa sẽn na n yũ ko-kãngã, ko-yũud na n le yõk-a lame. 14  La ko-yũud pa na n tol n le yõk ned ning sẽn yũud koom ning mam sẽn na n kõ-a wã ye. La koom ning mam sẽn na n kõ-a wã na n lebga ko-bundum n bund yẽ pʋgẽ wã n kõt vɩɩm sẽn ka sɛta.” 15  Pagã yeela bãmb yaa: “Soaala, kõ-y maam ko-kãng tɩ ko-yũud ra le yõk-ma, tɩ m da ket n wat ka me n yõngd koom ye.” 16  Bãmb yeel-a lame: “Kẽng n tɩ bool f sɩdã tɩ y tũ taab n wa ka.” 17  Pagã leokame n yeele: “Mam pa tar sɩd ye.” T’a Zeezi yeel-a yaa: “Fo sẽn yeel tɩ f pa tar sɩdã fo bee bʋʋm. 18  Bala, fo paama sɩdb a nu, la rao ning fo sẽn be ne masã wã pa fo sɩd ye. Dẽnd fo sẽn yeelã yaa sɩda.” 19  Pagã yeela bãmb yaa: “Soaala, mam neeme tɩ yãmb yaa no-rɛɛsa. 20  Tõnd yaab-rãmbã waooga Wẽnnaam tãn-kãngã zugu, la yãmb yetame tɩ yaa Zerizalɛm la zĩig ning nebã sẽn tog n waoog Wẽnnaamã.” 21  T’a Zeezi yeel-a: “Paga, tẽ maam. Wakat n wat tɩ pa na n yɩ tãn-kãngã zugu, wall Zerizalɛm la yãmb na n waoog Ba wã ye. 22  Yãmb waoogda y sẽn pa mi, la tõnd waoogda d sẽn mi. Bala, fãagrã sɩngda ne Zʋɩf-rãmbã. 23  La wakat n wat tɩ wẽn-tũudb hakɩɩkã na n waoog Ba wã ne sɩɩga, la ne sɩda. Wakat kãng pʋd n taame. Sɩd me, yaa neb a woto la Ba wã baood tɩ b waoog bãmba. 24  Wẽnnaam yaa Sɩɩga, tɩ sẽn waoogd-b bãmbã segd n waoog bãmb ne sɩɩga, la ne sɩda.” 25  Pagã yeela bãmb yaa: “Mam miime tɩ Mesi wã b sẽn boond a soab tɩ Kiristã watame. Bãmb sã n wa, b na n togsa tõnd bũmbã fãa vẽenega.” 26  T’a Zeezi yeel-a: “Mam sẽn gomd ne foomã, mam yaa bãmba.” 27  Wakat kãnga, b karen-biisã waame. La b sẽn yã t’a Zeezi gomda ne pagã ling-b lame. Baasgo, b ned baa a ye pa soke: “Bõe la yãmb baooda?” wall “Bõe yĩng tɩ yãmb gomd ne-a?” 28  Dẽ, pagã basa a yʋʋrã n kẽng tẽngã pʋgẽ n tɩ yeel nebã yaa: 29  “Wa n ges-y rao sẽn togs maam bũmb nins fãa mam sẽn maane. Sãnd pa bãmb la Kiristã?” 30  Nebã yii tẽngã n sɩng bãmb nengẽ waoongo. 31  Sẽn deng rẽ, karen-biisã ra bõosda bãmb n yetẽ: “Rabi,* rɩ-y-yã.” 32  La a Zeezi yeel-b lame: “Mam zoe n tara rɩɩbo, la yãmb pa mi rɩ-kãng ye.” 33  Dẽ, karen-biisã goma ne taab n yeele: “Ned baa a ye pa wa kõ bãmb bũmb tɩ b rɩ ye. Bɩ bõe?” 34  A Zeezi yeel-b lame: “Mam dɩɩb yaa m maan sẽn tʋm-a maamã raabo, la m baas b tʋʋmdã. 35  Yãmb pa yet tɩ keta kiis a naas tɩ tigsgã ta sɩda? La mam yeta yãmba: Zẽk-y y nens n ges pʋtã. B pelgame n ta tigsgu. Masã menga, 36  sẽn tigsd-a wã reegda a yaoodo, la a tigsd biis vɩɩm sẽn ka sɛta yĩnga, sẽn na yɩl tɩ sẽn bʋt-a wã ne sẽn tigsd-a wã naag taab n kɩdme. 37  Bala rẽ wɛɛngẽ, yel-bũndã sẽn yeel tɩ ned a ye la bʋta, t’a to yaa tigsdã yaa sɩda. 38  Mam tʋma yãmb tɩ y tigs yãmb sẽn pa tʋm bũmb ning yĩnga. Neb a taab n tʋme, la yãmb dɩta b tʋʋmdã yõodo.” 39  Samari tẽn-kãng nebã wʋsg tẽe a Zeezi, pagã sẽn kõ kasetã yĩnga. A ra yetame: “Bãmb togsa maam bũmb nins fãa mam sẽn maane.” 40  Woto yĩnga, Samari nebã sẽn wa a Zeezi nengẽ wã, b kosa bãmb tɩ b pa ne bãmba. La a Zeezi paa ne bãmb rasem a yiibu. 41  Dẽ, neb sõor sẽn yɩɩd pĩndã n tẽ a Zeezi b goamã yĩnga, 42  n yeel pagã yaa: “Pa fo goamã yĩng bal la tõnd sẽn tẽedã ye. Bala, tõnd meng wʋmame, la d miime tɩ ra-kãngã n sɩd yaa dũniyã fãagdã.” 43  Rasem a yiibã poore, b yii be n na n kẽng Galile. 44  La a Zeezi meng kõo kaset n yeel tɩ no-rɛɛs pa paamd waoogr a meng ba-yir ye. 45  Dẽ, bãmb sẽn ta Galile wã, Galile nebã reega bãmb sõma, b sẽn yã bũmb nins bãmb sẽn maan Zerizalɛm kibsã sasa wã yĩnga. Bala, bãmb me ra kẽnga kibsẽ wã. 46  Rẽ poore, a Zeezi le kẽnga Kana sẽn be Galile soolmẽ wã, zĩig ning b sẽn da kɩt tɩ koom lebg divẽ wã. La rĩmã tʋm-tʋmd-kãseng a ye n da be Kapɛrnawum t’a bi-ribl bẽedẽ. 47  Ra-kãng sẽn wʋm t’a Zeezi yii Zide n wa Galile wã, a kẽnga bãmb nengẽ, n tɩ kos-b tɩ b wa sãoog a biigã, bala, a ra rat n kiime. 48  La a Zeezi yeel-a lame: “Yãmb sã n pa yã yel-soalem la bõn-kãsemse, y pa na n tol n tẽ ye.” 49  Rĩmã tʋm-tʋmd-kãsengã yeela bãmb yaa: “Zu-soaba, wa-y tɩ m bi-bilfã nan pa ki ye.” 50  T’a Zeezi yeel-a: “Kẽnge. Fo biigã yĩnsã sãoogame.” Raoã tẽe a Zeezi sẽn yeel-a bũmb ningã, n looge. 51  A sẽn wa n be sorẽ n kuiisẽ, a tʋm-tʋmdbã seg-a lame n yeel t’a biigã yĩnsã sãoogame.* 52  Dẽ, a sok-b lame n na n bãng wakat ning a sẽn paam laafɩ wã. B leok-a lame n yeele: “Yaa zaamẽ wakat a yopoe-n-soabã* la a yĩn-wɩngrã sig-yã.” 53  Dẽ, ba wã bãngame tɩ yɩɩ wakat kãng bal kɛpɩ la a Zeezi sẽn yeel yẽ: “Fo biigã yĩnsã sãoogame” wã. Rẽ kɩtame tɩ yẽ ne a zakã rãmb fãa tẽ. 54  Rẽ n yɩ naoor a yiib-n-soab a Zeezi sẽn maan yel-solemd b sẽn yi Zide n wa Galile.

Vẽnegr toor-toore

Gɛrk, “a Zeezi.”
Rat n yeel tɩ wĩntoog wakat 12 sẽnese.
Bɩ, “Karen-saamba.”
Bɩ, “vɩɩme.”
Rat n yeel tɩ wĩntoog wakat a 1 sẽnese.