21:1Verse-rãmb sã n tong taab seb-yend pʋgẽ, gʋls-bi kãngã n na n zĩnd pipi soabã ne yaoolem soabã sʋka, Yɩɩn. 37:9-1125

  • A Zeezi vẽnega b meng ne b karen-biisã (1-14)

  • A Pɩyɛɛr yeelame t’a nonga a Zeezi (15-19)

    • “Rɩlg mam pe-bi wã” (17)

  • Bũmb ning sẽn na n paam a Zeezi karen-bi-nongrã (20-23)

  • Baasg goama (24, 25)

21  Rẽ poore, a Zeezi le vẽnega* b meng ne karen-biisã Tiberyaad mogrã noore. Ad b vẽnegrã sẽn yɩ to-to:  A Sɩmo-Pɩyɛɛr ne a Toma (b sẽn boond me tɩ Kinkirgã), a Natanayɛll sẽn yit Kana sẽn be Galile wã, a Zebede kom-dibli wã, n paas neb a yiib me sẽn yaa b karen-biis n da be ne taaba.  A Sɩmo-Pɩyɛɛr yeela bãmb yaa: “M dabda zĩm yõgbo.” Tɩ b yeel-a: “Tõnd na n tũu foom.” B yiime n tɩ kẽ koom-koglgã pʋgẽ, la yʋn-kãng tõre, b pa yõk baa fʋɩ ye.  Zĩigã sẽn wa n yẽegdẽ wã, a Zeezi ra yasa mogrã noore. La karen-biisã ra pa mi tɩ yaa a Zeezi ye.  Dẽ, a Zeezi yeela bãmb yaa: “M kamba, yãmb tara bũmb* n na n dɩ sɩda?” Tɩ b leok yaa: “Ayo!”  A Zeezi yeel-b lame: “Lob-y zĩm-gãmbrã koom-koglgã rɩtg sẽnes tɩ y na n paama bũmbu.” Dẽ, bãmb loba zĩm-gãmbrã, la b ra pa tõe n tak-a, zĩmã sẽn yaa wʋsgã yĩnga.  Rẽ la a Zeezi karen-bi-nongrã yeel a Pɩyɛɛr yaa: “Yaa Zu-soabã!” La a Sɩmo-Pɩyɛɛr sẽn wʋm tɩ yaa Zu-soabã, a yeelga* a zugẽ fuugã, bala a ra yaa beelle. Rẽ poore, a yɩkame n lʋɩ mogrã pʋgẽ.  La karen-biis a taabã vuu zĩm-gãmbrã sẽn pid ne zĩmã ne koom-kogl-bilã n wa. Bala, b ra pa zãr ne kʋɩl-koakã ye. Ra yaa na maan metr pis-wɛ.*  B sẽn ta mogrã noore, b yãa bug-saal tɩ zĩm rog a zug n paas buri. 10  A Zeezi yeela bãmb yaa: “Yãk-y zĩmã yãmb sẽn nan yõgã kẽer n wa ne.” 11  Dẽ, a Sɩmo-Pɩyɛɛr kẽe koom-koglgã pʋgẽ, n vuug zĩm-gãmbrã sẽn pid ne zĩm-bɛdã n yiis mogrã noore. Ra yaa bãmb koabg la pis-nu la a tãabo. La baa zĩmã sẽn da waoogã, zĩm-gãmbrã pa pãrg ye. 12  A Zeezi yeel-b lame yaa: “Wa n sok-y y noore.” Karen-biisã ned baa a ye ra pa tar daood n na n sok bãmba: “Yãmb yaa ãnda?” Bala b ra miime tɩ yaa Zu-soabã. 13  A Zeezi dɩka burã n kõ-ba, la b maana woto me ne zĩmã. 14  Rẽ n yɩ naoor a tãab-n-soab a Zeezi sẽn vẽneg b meng ne karen-biisã b vʋʋgrã poore. 15  B sẽn wa n sok b noor n sa wã, a Zeezi soka a Sɩmo-Pɩyɛɛr yaa: “A Zã biig a Sɩmo, fo nonga maam n yɩɩd bõn-kãensã bɩ?” T’a leok n yeele: “N-ye, Zu-soaba. Yãmb miime tɩ mam nonga yãmba.” T’a Zeezi yeel-a: “Rɩlg mam pe-bi wã.” 16  B le sok-a-la naoor a yiib-n-soaba: “A Zã biig a Sɩmo, fo nonga maam bɩ?” T’a leok yaa: “N-ye, Zu-soaba. Yãmb miime tɩ mam nonga yãmba.” T’a Zeezi yeel-a: “Kɩɩm mam pe-bi wã.” 17  B soka yẽ naoor a tãab-n-soab yaa: “A Zã biig a Sɩmo, fo nonga maam bɩ?” B sẽn sok a Pɩyɛɛr naoor a tãab-n-soaba: “Fo nonga maam bɩ?” wã sãama a sũuri. Rẽ la a yeel-b yaa: “Zu-soaba, yãmb mii bũmb fãa. Yãmb miime tɩ mam nonga yãmba.” T’a Zeezi yeel-a: “Rɩlg mam pe-bi wã. 18  Sɩd-sɩda, mam yeta foo tɩ fo sẽn wa n yaa bi-bɩɩgã, fo ra minim n yeelgda fuug f toor n kẽngd zĩig ning f sẽn date. La fo sã n wa kʋʋle, fo na n tẽega f nusã tɩ ned a to yeelg foo fuugu, la a tall-f n kẽng zĩig f sẽn pa rate.” 19  Bãmb yeela woto n na n wilg kũum ning buud a Pɩyɛɛr sẽn na n ki tɩ yɩ Wẽnnaam waoogrã. B sẽn yeel rẽ poore, b paasame: “Kell n tũ maam.” 20  A Pɩyɛɛr wẽnemdame n yã a Zeezi karen-bi-nongrã sẽn pʋgd bãmba. Yaa karen-bi-kãng la sẽn da kɩll poorẽ, a Zeezi yãoogẽ wã zaabr dɩɩbã sasa n soke: “Zu-soaba, yaa ãnd la sẽn na n zãmb yãmbã?” 21  A Pɩyɛɛr sẽn yã-a wã, a soka a Zeezi yaa: “Zu-soaba, la ra-kãngã yẽ?” 22  T’a Zeezi yeel-a: “Mam daab sã n yaa tɩ yẽ pa n tãag mam waoongo, bõe yĩng tɩ fo baood n na n bãng rẽ? Fo we n kell n tũ maam.” 23  Dẽ, kibarã saaga saam-biisã sʋk tɩ karen-bi-kãng pa na n ki ye. La a Zeezi pa yeel a Pɩyɛɛr tɩ karen-biigã pa na n ki ye. La b yeelame: “Mam daab sã n yaa tɩ yẽ pa n tãag mam waoongo, bõe yĩng tɩ fo baood n na n bãng rẽ?” 24  Yaa karen-bi-kãng la sẽn kõt bõn-kãensã kasetã, la sẽn gʋls bõn-kãensa wã. La tõnd miime t’a kasetã yaa sɩda. 25  Sɩd-sɩda, bũmb wʋsg me la a Zeezi maan-yã, tɩ b sã n da na n gʋls b fãa zãnga, m tẽedame tɩ dũniyã pa na n paam weer n deeg seb-pinds nins b sẽn na n gʋlsã ye.

Vẽnegr toor-toore

Bɩ, “puki.”
Bɩ, “zĩm.”
Bɩ, “fo kalle.”
Gɛrk, “na maan kãntɩɩg 200.” Ges-y gom-biis võor bilgrã zĩigẽ.