19:1Verse-rãmb sã n tong taab seb-yend pʋgẽ, gʋls-bi kãngã n na n zĩnd pipi soabã ne yaoolem soabã sʋka, Yɩɩn. 37:9-1142

  • “Mam Rĩungã pa dũni-kãngã rẽnd ye” (1-7)

  • A Pɩlat le soka a Zeezi sogsgo (8-16a)

  • B kaa a Zeezi ra-luk zug Golgota (16b-24)

  • A Zeezi rɩka b ma wã n gũnug ne a Zã (25-27)

  • A Zeezi kũumã (28-37)

  • A Zeezi mumbã (38-42)

19  Rẽ poore, a Pɩlat kɩtame tɩ b tall a Zeezi n tɩ pãb ne kalwaase.  La sodaasã kala gõos n maan maanf n fõgen bãmb zugã, la b yeelg-b fu-miuug-miuugu.  B ra kolgda bãmb n yetẽ: “Tõnd pʋʋsda yãmba, Zʋɩf-rãmbã Rĩma!” B ra pãbda bãmb pɛgs me.  A Pɩlat le yiime n yeel-b yaa: “Ade! Mam yita ne-a yɩng sẽn na yɩl tɩ y bãng tɩ mam pa yã bũmb a sẽn maan tɩ sek taal ningr ye.”  Dẽ, a Zeezi yiime n fõg maanfã sẽn maan ne gõosã, la b yer fu-miuug-miuugã. La a Pɩlat yeela nebã yaa: “Ad raoã!”  La maan-kʋʋdbã taoor dãmb ne gũudbã sẽn yã bãmbã, b zẽka b koees n yeele: “Ka-y-yã-a ra-luk zugu! Ka-y-yã-a ra-luk zugu!”* T’a Pɩlat yeel-b yaa: “Bɩ yãmb mensã reeg-a n tɩ kʋ,* bala, mam pa yã baa fʋɩ a sẽn maan tɩ sek taal ningr ye.”  Zʋɩf-rãmbã leok-a lame n yeele: “Tõnd tara tõogo. La sã n yaa ne tõogã, a toga ne kũum. Bala, yẽ yeelame t’a yaa Wẽnnaam biiga.”  La a Pɩlat sẽn wʋm bũmb ning b sẽn da yetã, a maneg n yɛɛsame  n lebg n kẽ guvɛrneerã zakẽ n sok a Zeezi yaa: “Fo yita yɛɛnẽ?” La a Zeezi pa leok-a ye. 10  Dẽ, a Pɩlat yeela bãmba: “Fo zãgsame tɩ f kõn gom ne maam la? Fo pa mi tɩ mam tara tõog n tõe n bas foo, la m tar tõog n tõe n kʋ-f la?”* 11  T’a Zeezi leok-a yaa: “Yãmb da pa na n tall tõog baa bilf mam zugu, Wẽnnaam sã n da pa kõ yãmb ye. Yaa rẽ yĩng la sẽn ning-a maam yãmb nugẽ wã yel-wẽnd sẽn yaa kãseng n yɩɩdã.” 12  Rẽ kɩtame t’a Pɩlat kell n bao weer n na n bas bãmba. La Zʋɩf-rãmbã zẽka b koees n yeele: “Yãmb sã n bas ra-kãngã, yãmb pa a Sezaar zoa ye. Ned ning fãa sẽn yet tɩ yẽ yaa rĩm kɩɩsda* a Sezaare.” 13  A Pɩlat sẽn wʋm gom-kãens poore a talla a Zeezi n yi, la a tɩ zĩnd bʋʋd kaoob geer zugu. B ra boonda geerã sẽn be zĩig ningã tɩ Zĩig kug sẽn gãnege, la ne Ebre yaa Gabata. 14  La ra yaa Pakã Seglg daare, tɩ ra yaa wakat a yoob-n-soabã sẽnese.* A Pɩlat yeela Zʋɩf-rãmbã yaa: “Ad y rĩmã!” 15  La b zẽka b koees n yeele: “Kʋ-y-yã-a! Kʋ-y-yã-a! Ka-y-yã-a ra-luk zugu!”* T’a Pɩlat sok-b yaa: “M kʋ yãmb rĩmã?” Tɩ maan-kʋʋdbã taoor dãmb yeele: “Tõnd pa tar dĩm n zʋʋg a Sezaar ye.” 16  Dẽ, a kõ-b-la a Zeezi tɩ b na n tɩ kʋ ra-lukã zugu. Woto, b talla bãmb n looge. 17  A Zeezi tʋka kũum da-lukã* b toor n yi n na n kẽng zĩig ning b sẽn boond tɩ Zu-wang zĩigã, tɩ ne Ebre yaa Golgota wã. 18  Be, b kaa a Zeezi ra-lukã zugu, la b ka rap a yiib me n yɛgl bãmba, a ye bãmb rɩtg t’a to wã bãmb goabga, tɩ bãmb mengã be tẽn-sʋka. 19  Sẽn paase, a Pɩlat gʋlsa gʋlsem ra-peok zug n ning kũum da-lukã* zugu. Gʋlsmã ra yetame: “Nazarɛt rao a Zeezi, Zʋɩf-rãmbã Rĩmã.” 20  Zʋɩf-rãmbã wʋsg karma gʋlsmã, bala zĩig ning b sẽn ka a Zeezi ra-lukã zugã ra pa zãr ne galʋ-tẽngã ye. Sẽn paase, gʋlsmã ra yaa ne Ebre, ne Latẽ, la ne Gɛrke. 21  La Zʋɩf-rãmbã maan-kʋʋdb taoor dãmbã yeela a Pɩlat yaa: “Da gʋls-y tɩ ‘Zʋɩf-rãmbã Rĩmã’ ye. Gʋls-y t’a yeelame: ‘Mam yaa Zʋɩf-rãmbã Rĩma.’ ” 22  T’a Pɩlat leok n yeele: “Mam sẽn gʋlsã, mam gʋlsame.” 23  La sodaasã sẽn wa n ka a Zeezi ra-lukã zug n sa wã, b rɩka b zugẽ futã n pʋɩ zĩis a naase, tɩ sodaag fãa rɩk a yembre. La b rɩka tẽngr fuugã me. La tẽngr fuugã ra pa tar sẽnesem ye. B wʋg-a-la yĩngr n tãag tẽngre. 24  Rẽ n so tɩ b sõs ne taab n yeel yaa: “Bɩ d ra pãrg-a ye. D maan poeer a zugu, n bãng ned ning sẽn na n soog-a wã.” Yɩɩ woto tɩ Gʋls-sõamyã sẽn yeelã pidsi: “B pʋɩɩ taab mam futã, la b maan poeer mam fu-yorgã zugu.” Woto, sodaasã sɩd maana bõn-kãense. 25  La a Zeezi ma wã ne b ma wã ma-bi-poakã, la a Kolopaas pag a Maari n paas a Maari sẽn yit Magdala wã ra yasa kũum ra-lukã* sɛɛgẽ. 26  Dẽ, a Zeezi sẽn yã b ma wã la b karen-bi-nongrã sẽn yas yambẽ wã, b yeela b ma wã yaa: “Paga, ad f biiga!” 27  Rẽ poore, b yeela karen-biigã yaa: “Ad f ma!” La wakat kãng tɛka, karen-biigã peeg-a lame n kuil a meng yiri. 28  Rẽ poore, a Zeezi sẽn bãng tɩ bũmb fãa pidsame wã, sẽn na yɩl tɩ Gʋls-sõamyã sẽn yeelã pidsi, b yeelame: “Ko-yũud n tar maam.” 29  Yʋʋr n da tẽg be n pid ne divẽ sẽn yaa miisga. Dẽ, b rɩka bũmb sẽn fõogd koom n los divẽ-miisgẽ wã, n sẽbg izop* raoog n zẽk n kolg bãmb noorã. 30  A Zeezi sẽn lemb divẽ-miisgã poore, b yeelame: “A pidsame!” la b sulg b zug n be kũumẽ. 31  Sẽn da yaa Seglg daarã, sẽn na yɩl tɩ kũ-rãmbã ra pa kũum ra-lugsã zut Vʋʋsg daarã, (bala, Vʋʋsg da-kãng ra yaa ra-kãsenga) Zʋɩf-rãmbã kosa a Pɩlat t’a kɩt tɩ b kao b sẽn ka b rãmbã karse, la a kɩt tɩ b sik b kũumã. 32  Dẽ, sodaasã waame n kao pipi soabã karse, la b kao a to wã me sẽn da be ra-lukã zug n yɛg a Zeezi wã karse. 33  La b sẽn ta a Zeezi nengẽ wã b mikame tɩ b zoe n kiime, tɩ b pa kao b karsã ye. 34  La sodaasã nin-yend kõsa b lʋgrã ne kãnde. Zĩig pʋgẽ, zɩɩm ne koom n yi. 35  La yaa ned ning sẽn yã rẽ wã n kõ kaset kãngã, la a kasetã yaa sɩda. La nin-kãng miime t’a sẽn yeel bũmb ninsã yaa sɩda, la a yeela bõn-kãens sẽn na yɩl tɩ yãmb me tẽ. 36  Sɩd-sɩda, bõn-kãens maaname sẽn na yɩl tɩ Gʋls-sõamyã sẽn yeelã pidsi. A ra yeelame: “B kõbr baa a ye pa na n kaoog ye.” 37  Gʋls-sõamyã gomd a to me yeelame: “B na n gesa b sẽn kõs a soabã.” 38  Bõn-kãens poore, Arimate rao a Zozɛf tɩ kosa a Pɩlat a sã n tõe n sika a Zeezi kũumã n tall n looge. A ra yaa a Zeezi karen-biiga, la a sẽn zoet Zʋɩf-rãmbã yĩnga, a pa maan tɩ nebã bãng ye. A Pɩlat kõ-a-la sor t’a wa sik kũumã n tall n looge. 39  A Nikodɛm me sẽn yaa rao ning sẽn da wa a Zeezi nengẽ ne yʋngã waa ne miir sẽn kalem ne alowɛs t’a zɩslmã zems kilo pis-tã.* 40  La b rɩka a Zeezi kũumã n vil ne lẽ pɛɛla, n ning kaam toor-toor sẽn tar yũ-noogo, wa sẽn zems ne Zʋɩf-rãmbã sẽn minim n maand b ned mumb yĩngã. 41  La tɩ-sull n da pẽ zĩig ning b sẽn kʋ* a Zeezi wã, tɩ yao-paall da be tɩ-sullẽ wã tɩ b zɩ n mum ned a pʋgẽ ye. 42  Sẽn da yaa Zʋɩf-rãmbã Seglg daar tɩ yaoogã me be yambẽ wã yĩnga, b muma a Zeezi be.

Vẽnegr toor-toore

Bɩ, “Kʋ-y-yã-a ra-luk zugu! Kʋ-y-yã-a ra-luk zugu!”
Bɩ, “n tɩ kʋ-a ra-lukã zugu.”
Bɩ, “n kʋ yãmb ra-lukã zug la?”
Bɩ, “paoogda.”
Rat n yeel tɩ wĩntoog wakat 12 sẽnese.
Bɩ, “Kʋ-y-yã-a ra-luk zugu!”
Ges-y gom-biis võor bilgrã zĩigẽ.
Ges-y gom-biis võor bilgrã zĩigẽ.
Ges-y gom-biis võor bilgrã zĩigẽ.
Ges-y gom-biis võor bilgrã zĩigẽ.
Rat n yeel tɩ Rom dãmbã lɩɩvr koabga.
Bɩ, “b sẽn kʋ ra-lukã zugã.”