Zã 1:1Verse-rãmb sã n tong taab seb-yend pʋgẽ, gʋls-bi kãngã n na n zĩnd pipi soabã ne yaoolem soabã sʋka, Yɩɩn. 37:9-1151
-
Gomdã lebga neda (1-18)
-
Kaset ning a Zãmbatiis sẽn kõ wã (19-28)
-
A Zeezi n yaa Wẽnnaam Pe-bilã (29-34)
-
A Zeezi pipi karen-biisã (35-42)
-
A Filip ne a Natanayɛlle (43-51)
1 Sɩngrẽ wã, Gomdã ra beeme, la Gomdã ra bee ne Wẽnnaam, la Gomdã ra yaa wa Wẽnnaam.
2 Bãmb ra bee ne Wẽnnaam sɩngrẽ wã.
3 Tũu ne bãmb maasem tɩ bũmba fãa wa beẽ. La bõn-yɛng meng pa be tɩ pa tũ ne bãmb ye.
Bũmb ning sẽn wa
4 bãmb maasem yĩngã yaa vɩɩm, la vɩɩmã ra yaa ninsaalbã vẽenem.
5 La vẽenemã yãgda lik pʋgẽ, la likã pa tõog-a ye.
6 Rao a ye Wẽnnaam sẽn tʋm t’a gom b yʋʋr yĩng n wa. A yʋʋr la a Zã.
7 Nin-kãng waame n yaa kaset soaba, n na n kõ vẽenemã kaseto, sẽn na yɩl tɩ ne yẽ maasem bɩ neb buud fãa tõe n tẽ.
8 Pa yẽ n da yaa vẽenemã ye. La a ra segd n kõo vẽenemã kaseto.
9 Wakat ning vẽenem sɩd-sɩdã sẽn vẽnegd ned buud fãa wã sẽn tog n wa dũniyã zugã ra kolgame.
10 Bãmb da bee dũniyã zugu, la baa sẽn tũ ne bãmb maasem tɩ dũniyã wa beẽ wã, dũniyã pa bãng bãmb ye.
11 Bãmb waa b meng tẽngẽ, la bãmb meng nebã pa reeg bãmb ye.
12 Baa ne rẽ, b paka sor tɩ neb nins fãa sẽn deeg bãmbã na n lebg Wẽnnaam kamba, b sẽn da wilgd tɩ b tẽeda bãmb yʋʋrã yĩnga.
13 La nin-kãens rogmã pa tũ ne ninsaalba,* wall ne ninsaal raabo,* pa rẽ bɩ ne rao raab ye. Yaa Wẽnnaam n dog-ba.
14 Woto, Gomdã lebga ned* n zĩnd tõnd sʋka, la tõnd yãa bãmb ziirã, ziir sẽn wõnd ziir bi-ribl sẽn-ka-to sẽn deeg a ba nengẽ. La bãmb ra pida ne Wẽnnaam barka,* la ne sɩda.
15 (A Zã kõo kaset n gom bãmb yelle. A zẽka a koɛɛg n yeele: “Bãmb la ned ning yell mam sẽn gom n yeele: ‘Soab ning sẽn na n pʋgl maamã lʋɩɩ mam taoore, bala b renga maam n beẽ.’ ”)
16 Bãmb sẽn da pid ne Wẽnnaam barkã* yĩnga, tõnd da paamda Wẽnnaam bark* wakat fãa.
17 Sẽn yɩ ne a Moyiiz la Wẽnnaam tũnug n kõ Tõogã yĩnga, tũu ne a Zeezi Kirist tɩ Wẽnnaam barkã* la sɩdã wa.
18 Ned baa a ye zɩ n yã Wẽnnaam ye. Yaa Bi-ribl sẽn-ka-to wã sẽn wõnd Wẽnnaamã, n be Ba wã sɛɛgẽ wã* n wilg tõnd Wẽnnaam sẽn yaa a soaba.
19 Zʋɩf-rãmbã tʋma maan-kʋʋdb ne Levi neb tɩ b yi Zerizalɛm n wa sok a Zã yaa: “Fo yaa ãnda?”
20 A leoka sokrã vẽeneg n yeele: “Mam pa Kiristã ye.”
21 Rẽ la b sok-a: “La fo yaa ãnda? A Eli bɩ?” T’a leok yaa: “Mam pa a Eli ye.” “Fo yaa No-rɛɛsã bɩ?” La a leokame yaa: “Ayo!”
22 Dẽ, b yeel-a lame: “Fo yaa ãnda? Togs tõnd tɩ d tõog n tɩ leok sẽn tʋm-b tõndã. Bõe la fo yet f mengã zugu?”
23 T’a yeele: “Mam yaa ned ning sẽn zẽkd a koɛɛg weoogẽ wã n yetẽ: ‘Rems-y-yã a Zeova* so-bukã tɩ yɩ tɩrga,’ wa no-rɛɛs a Ezayi sẽn da togsã.”
24 La neb nins b sẽn da tʋmã ra yaa Fariziẽ-rãmba.
25 Rẽ n so tɩ b sok-a yaa: “La bõe yĩng tɩ fo lisd nebã, n yaool n pa Kiristã wall a Eli bɩ No-rɛɛsã?”
26 T’a Zã leok-b yaa: “Mam lisda nebã koomẽ. La ned n be yãmb sʋk tɩ yãmb pa mi-a ye.
27 Nin-kãng soab wata mam poore, la mam pa zems tɩ lok a neoodr loɛtg ye.”
28 Bõn-kãens zĩnda Betani, Zʋrdẽ kʋɩlgã rʋʋnde, zĩig ning a Zã sẽn da lisd nebã.
29 Vẽkembeoogã, a Zã yãa a Zeezi sẽn tees yẽ n watẽ t’a yeele: “Ad Wẽnnaam Pe-bilã sẽn yiisd dũniyã yel-wẽndã!
30 Yaa bãmb yell la mam sẽn da gom n yeele: ‘Mam loogr poore, ned sẽn lʋɩ mam taoor n wate, bala b renga maam n beẽ.’
31 Baa mam mengã ra pa mi-b ye. La mam sẽn wa n lisd nebã koomẽ wã, yaa sẽn na yɩl tɩ Israyɛll nebã bãng bãmb sẽn yaa a soabã.”
32 Sẽn paase, a Zã kõo kaset n yeele: “Mam yãa vʋʋsem sõngã sẽn yi saasẽ n sigd wa marwalle, n pa bãmb zugu.
33 Baa mam mengã ra pa mi-b ye. La Soab ning sẽn tʋm maam tɩ m lis nebã koomẽ wã yeela maam: ‘Fo sẽn na n yã tɩ vʋʋsem sõngã sig ned ning zug n pa wã, yaa yẽ soab la sẽn lisd nebã vʋʋsem sõng pʋgẽ wã.’
34 La mam yãa rẽ, n kõ kaset tɩ bãmb la Wẽnnaam Biigã.”
35 Vẽkembeoogã yɛsa, a Zã ra yasa ne a karen-biis a yiibu,
36 n yã a Zeezi sẽn kẽnd t’a yeele: “Ad Wẽnnaam Pe-bilã!”
37 Karen-biis a yiibã sẽn wʋm a gomdã, b pʋga a Zeezi.
38 Dẽ, a Zeezi sẽn wẽnemd n yã tɩ b pʋgda bãmbã, b sok-b lame: “Bõe la yãmb baooda?” Tɩ b yeel-ba: “Rabi (rat n yeel tɩ “Karen-saamba”), yãmb zĩigã bee yɛ?”
39 T’a Zeezi yeel-ba: “Wa-y tɩ y na bãnge.” Dẽ, b pʋga bãmba, n tɩ bãng b sẽn be zĩig ningã. La b paa ne bãmb daar-n-kãnga. Ra yaa wakat piig soabã sẽnese.*
40 A Ãndere sẽn yaa a Sɩmo-Pɩyɛɛr ba-biigã ra yaa neb a yiib nins sẽn wʋm a Zã goamã n pʋg a Zeezi wã nin-yende.
41 A reng n tɩ yãa a ba-biig a Sɩmo n yeel-a: “Tõnd yãa Mesi wã” (sẽn dat n yeel tɩ “Kiristã”),
42 la a tall-a n kẽng a Zeezi nengẽ. A Zeezi sẽn ges-a wã, b yeelame: “Fo yaa a Zã biig a Sɩmo. B na n boola foo t’a Sefas” (Gɛrke: A Pɩyɛɛr*).
43 Vẽkembeoogã, a Zeezi da rat n yii be n kẽng Galile. Dẽ, b sega a Filip n yeel-a yaa: “Tũ maam.”
44 La a Filip ra yita Betsayida sẽn yaa tẽng ning a Ãndere ne a Pɩyɛɛr me sẽn da yitã.
45 A Filip yãa a Natanayɛll n yeel-a yaa: “Tõnd yãa a Moyiiz sẽn gom a soab ning yell Tõogã pʋgẽ, tɩ No-rɛɛsdbã me gʋls n gom a yellã: Yaa Nazarɛt rao a Zeezi sẽn yaa a Zozɛf biigã.”
46 La a Natanayɛll yeel-a lame: “Bõn-sõng tõe n yii Nazarɛt sɩda?” T’a Filip yeel-a: “Wa ges f toore.”
47 A Zeezi yãa a Natanayɛll sẽn tees bãmb n watẽ, n gom a yell n yeele: “Ad Israyɛll ned meng-menga, zãmb sẽn pa be a pʋgẽ.”
48 A Natanayɛll soka bãmb yaa: “Maana wãn tɩ yãmb mi maam?” T’a Zeezi leok-a yaa: “Nand t’a Filip bool foo, fo sẽn wa n be kankangã tẽngrã, mam yãa foom.”
49 A Natanayɛll leokame n yeele: “Rabi,* yãmb la Wẽnnaam Biigã, n yaa Israyɛll Rĩma.”
50 T’a Zeezi yeel-a: “Mam sẽn yeel foo tɩ m yã-f-la kankangã tẽngrã yĩng la fo sẽn tẽedã bɩ? Fo na n yãa bõn-kãsems sẽn yɩɩd rẽ.”
51 Rẽ poore, b yeel-a lame yaa: “Sɩd-sɩda, mam yeta yãmb fãa tɩ y na n yãa saasã sẽn pake, tɩ Wẽnnaam malɛgsã rʋʋd la b sigd n wat ninsaal Biigã nengẽ.”
Vẽnegr toor-toore
^ Gɛrk, “zɩɩm.”
^ Gɛrk, “yĩn-nems raabo.”
^ Gɛrk, “yĩn-nemse.”
^ Bɩ, “sõmblem d sẽn pa segd ne.”
^ Bɩ, “sõmblem d sẽn pa segd ne.”
^ Bɩ, “sõmblem d sẽn pa segd ne.”
^ Bɩ, “sõmblem d sẽn pa segd ne.”
^ Bɩ, “n be Ba wã yãoogẽ.” Rat n yeel tɩ lohorem zĩigẽ.
^ Ges-y gom-biis võor bilgrã zĩigẽ.
^ Rat n yeel tɩ zaabr wakat a 4 sẽnese.
^ “Sefas” la “Pɩyɛɛr” rat n yeelame tɩ “kugri.”
^ Bɩ, “Karen-saamba.”
