Tɩt 3:1-15
3 Ket n tẽegd-b tɩ b sakd nanambsã ne pãn-soaadbã, tɩ b segl n sa tʋʋm-sõng buud fãa yĩnga,
2 tɩ b ra gom ned baa a ye wẽnga, tɩ b ra yɩ zab-zabdba, tɩ b ra yɩ neb sẽn yaa dem-deme, la bɩ b yɩ neb sẽn tar bʋgsem wʋsg ne nebã fãa.
3 Bala tõnd me ra yaa neb sẽn pa tar yam, kɩɩsdba, neb b sẽn menese, n da yaa tʋlsem toor-toor la yõ-noogrã yembse, neb sẽn da tʋmd tʋʋm-wẽns la sẽn da yaa sũ-ki-neba, neb sẽn da yaa wẽns wʋsgo, la neb sẽn da kis taaba.
4 La Wẽnnaam sẽn yaa tõnd Fãagdã sõmblmã ne b sẽn nong ninsaalbã ne nonglem ningã sẽn wa n pukã,
5 b fãaga tõndo, la pa tũ ne tɩrlem tʋʋm d sẽn tʋm ye. Tũu ne bãmb mengã nimbãan-zoeerã. B fãaga tõnd ne koom soob ning sẽn kɩt tɩ d paam vɩɩmã maasem, la ne b sẽn kɩt tɩ d lebg nin-paals vʋʋsem sõngã maasmã yĩnga.
6 B pʋdga vʋʋsem sõng kãng tõnd zut wʋsgo, a Zeezi Kirist sẽn yaa tõnd Fãagdã maasem yĩnga,
7 sẽn na yɩl tɩ d sẽn paam tɩ b yeel tɩ d yaa tɩrs bãmb barkã* maasem yĩngã poore, d tõe n lebg neb sẽn saagd n na n wa paam vɩɩm sẽn ka sɛtã tɩ yɩ d pʋɩɩre.
8 Gom-kãensã yaa sɩda, la mam datame tɩ f ket n gomd bõn-kãens yell wʋsgo, sẽn na yɩl tɩ neb nins sẽn tẽ Wẽnnaamã tõog n ning tʋʋm-sõma maaneg b yamẽ wakat fãa. Bõn-kãensã yaa sõma n nafd neda.
9 La bɩ f ra kẽes f toog no-koɛɛm sẽn yaa yalemd pʋsẽ, la yaab-rãmb rot yɛlẽ, la Tõogã poorẽ kɩɩs-taab la a zab pʋsẽ ye. Bala b pa nafd neda, la b yaa bõn-vɩɩd me.
10 Ned sã n zãmsd nebã zãmsg sẽn pa sɩd tɩ fo sagl-a* naoor a yiib t’a pa kelge, bɩ f lak f meng ne-a,
11 n miẽ tɩ ned a woto lak n basa so-tɩrgã, t’a maanda yel-wẽna, la t’a ninga taal a meng zugu.
12 Mam sã n wa tʋm a Artemas wall a Tisik fo nengẽ, bɩ f maan f sẽn tõe fãa n wa paam maam Nikopoliisi, bala mam yãka yam n na n zĩnd be waoodã wakate.
13 Modg n sõng a Zenaas sẽn yaa ned sẽn mi Tõogã sõma wã, n paas a Apolos sẽn na yɩl tɩ bũmb da paoog-b b so-toakã sasa ye.
14 La bɩ tõnd tẽed-n-taasã me zãms tʋʋm-sõma tʋmb wakat fãa, tɩ yell sã n wa rat manegr tao-tao bɩ b sõnge, sẽn na yɩl n da yɩ neb sẽn pa womd biis ye.
15 Neb nins fãa sẽn be ne maamã toonda foom b pʋʋsem. Pʋʋs neb nins sẽn be tẽebã pʋgẽ n nong tõnd wʋsgã n kõ-ma.
Bɩ Wẽnnaam barkã* zĩnd ne yãmb fãa.
Vẽnegr toor-toore
^ Bɩ, “sõmblem d sẽn pa segd ne.”
^ Bɩ, “keoog-a.”
^ Bɩ, “sõmblem d sẽn pa segd ne.”
