Tɩt 2:1-15
2 La sã n yaa ne foo, bɩ f kell n gom goam sẽn zems ne zãmsg ning sẽn nafdã.*
2 Bɩ nin-kẽembã maand gũusg bũmb fãa pʋgẽ, n yɩ neb sẽn zems ne waoogre, neb yam sẽn vẽenẽ, neb tẽeb sẽn tar pãnga, neb sẽn tar nonglem wʋsgo, la neb sẽn maand sũ-mar sõma.
3 Woto me, bɩ pʋg-yãansã yɩ neb sẽn tar yel-manesem sẽn wilgd tɩ b yaa wẽn-zoɛtba, n pa tẽn-kãn-neba, n pa neb sẽn yaa divẽ* yembse, la sẽn zãmsd nebã sẽn yaa sõma,
4 sẽn na yɩl n tõog n sagl* pagb nins yʋʋm sẽn pa vẽsgã tɩ b nong b sɩdbã, n nong b kambã,
5 tɩ b yɩ neb yam sẽn vẽenẽ, sẽn yaa yɩlma, n get b zags yell sõma,* n yɩ pʋg-sõamyã, pagb sẽn sulgd b mens n sakd b sɩdba, sẽn na yɩl tɩ ned ra wa sãbs Wẽnnaam goamã ye.
6 Woto me, kell n sagl kom-bɩɩsã tɩ b yɩ neb yam sẽn vẽenẽ,
7 la bɩ fo mengã yɩ mak-sõng tʋʋm-sõma wɛɛngẽ ne manesem buud fãa. Zãms nebã bũmb nins sẽn yaa sɩdã ne f sũur fãa,
8 n tũnugd ne goam nins sẽn nafdã* ned sẽn pa tõe n wɩdã, sẽn na yɩl tɩ kɩɩsdbã paam yãnde, n pa tar bũmb b sẽn tõe n tik n gom tõnd wẽng ye.
9 Bɩ yembsã sulg b mens n sak b zu-soben-dãmbã bũmb fãa pʋgẽ, n maand b sẽn tõe fãa n na n noog b sũuri, n pa lemsd-ba,
10 n pa zuud-ba, la b wilgdẽ tɩ b yaa neb b sẽn tõe n kɩs sɩd zãnga, n kɩt tɩ Wẽnnaam sẽn yaa tõnd Fãagdã zãmsgã paam waoogr bũmb fãa pʋgẽ.
11 Bala, Wẽnnaam barkã* pukame, n wat ne fãagr nebã buud fãa yĩnga.
12 A zãmsda tõnd tɩ d zãag d mens ne wẽn-kɩɩsgo, la ne dũniyã bõn-wẽnsã tʋlgre, la tɩ d vɩɩmd ne yam sẽn vẽenẽ, ne tɩrlem la ne wẽn-sakr dũni-kãngã* nebã sʋka,
13 n gũud bũmb nins d sẽn saagd n na n wa paam tɩ kõt-d sũ-noogã, la d gũud Wẽnnaam sẽn yaa kãsengã ne tõnd Fãagd a Zeezi Kirist pukrã sẽn tar ziirã.
14 Kiristã kõo b meng tõnd yĩng n na n fãag tõnd ne tʋʋm-wẽns buud fãa, la sẽn na yɩl n yɩlg tõnd tɩ d yɩ bãmb meng neb sẽn tʋmd tʋʋm-sõma ne yẽesem.
15 Bɩ f kell n gom bõn-kãensã yelle, n sagend* nebã la f wilgd-b b kongre, f sẽn tar sor n tõe n maan dẽ wã yĩnga. Ra bas tɩ ned baa a ye paoog foom ye.
Vẽnegr toor-toore
^ Bɩ, “sẽn yaa sõma.”
^ Bɩ, “rãam.”
^ Bɩ, “tẽege, zãmse.”
^ Bɩ, “n tʋmd b zagsẽ.”
^ Bɩ, “sẽn yaa sõma.”
^ Bɩ, “sõmblem d sẽn pa segd ne.”
^ Ges-y gom-biis võor bilgrã zĩigẽ.
^ Bɩ, “kengd nebã raoodo.”
