Galat rãmbã 6:1-18
6 M saam-biisi, baa ned sã n wa rɩk so-wẽng n pa miẽ, bɩ yãmb a neb nins sẽn yaa kiris-neb sẽn bɩ wã* bao n dems-a ne bʋgsem. La bɩ y gũus y mense, yãmb me sẽn tõe n wa paam makrã yĩnga.
2 Bɩ y ket n tʋkd taab zɩɩbo, tɩ rẽ la y na n pids Kiristã tõogã.
3 Bala, ned sã n tagsdẽ t’a yaa bũmb n yaool n pa baa fʋɩ, a belgda a menga.
4 La bɩ ned kam fãa mak a meng tʋʋm n gese, tɩ rẽ la a na n paam bũmb a sẽn tõe n tik n maan sũ-noog a meng yĩng bala, la pa a sẽn na n mak a meng ne ned a to ye.
5 Bala, ned kam fãa na n tʋka a meng zɩɩbo.
6 Sẽn paase, bɩ ned ning b sẽn zãmsd Wẽnnaam gomdã pʋɩ bõn-sõma fãa ne sẽn zãmsd-a yẽ wã.
7 Da belg-y y mens ye. Wẽnnaam pa sẽn na paoog ye. Bũmb ning fãa ned sẽn bʋte, yaa rẽ me la a na n kẽebe.
8 Sẽn bʋt-a a yĩngã nafr yĩng na n kẽeba sãoong a yĩngẽ wã, la sẽn bʋt-a vʋʋsem sõngã yĩng na n kẽeba vɩɩm sẽn ka sɛt vʋʋsem sõng pʋgẽ.
9 Woto wã, bɩ d ra koms raood n bas sẽn yaa sõma maaneg ye. Bala wakatã sã n ta n mik tɩ d pa koms raood n base,* d na n kẽeba bõn-kãens biisi.
10 Woto wã, d sã n paam weer fãa,* bɩ d maan nebã fãa neere, la sẽn yɩɩd fãa, neb nins sẽn kĩ ne tõnd tẽebã pʋgẽ wã.
11 Yaa mam mengã nug n gʋls seb-kãngã n tool yãmba. Ges-y-yã a gʋls-biisã sẽn yaa bɛd to-to.
12 Yaa neb nins fãa sẽn dat n noog nebã sũyã* n modgd yãmb tɩ y kẽ bãongã. B maanda woto, b sẽn pa rat tɩ b nams-b Kirist kũum ra-lukã* yĩngã yĩng bala.
13 Baa neb nins sẽn kɩtd tɩ b kẽesd-b bãongã mens pa tũud Tõogã ye. La b ratame tɩ yãmb kẽ bãongo, tɩ b paam bũmb b sẽn tõe n tik n wuk b mens yãmb yĩngã wɛɛngẽ.
14 La bɩ m da tol n wuk m menga, tɩ sã n pa tõnd Zu-soab a Zeezi Kirist kũum ra-lukã* poorẽ bal ye. Bãmb maasem yĩnga, dũniyã lebga kɩɩng* mam nifẽ, tɩ ma-me lebg kɩɩng dũniyã nifẽ.
15 Bala bãong kõom pa baa fʋɩ, tɩ moonem me pa baa fʋɩ. Yaa nin-paallã Wẽnnaam sẽn naanã n yaa bũmbu.
16 Sã n yaa ne neb nins fãa sẽn kẽnd sõma wa sẽn zems gom-kãnga wã, bɩ laafɩ la nimbãan-zoeer zĩnd b zutu, rat n yeel tɩ Wẽnnaam Israyɛllã zugu.
17 Masã tɛka, bɩ ned baa a ye ra maan bũmb n sãam m sũur ye. Bala mam tara bãn m yĩngã pʋgẽ sẽn wilgd tɩ m yaa a Zeezi yamba.
18 M saam-biisi, yãmb sẽn wilgd tɩ y tara zʋg-sõma wã yĩnga, bɩ tõnd Zu-soab a Zeezi Kirist barkã* zĩnd ne-yã. Ãmiina.
Vẽnegr toor-toore
^ Bɩ, “yãmb a neb nins Wẽnnaam vʋʋsem sõngã sẽn wilgd sorã.”
^ Bɩ, “n yɛ.”
^ Gɛrk, “wakat sẽn yãke.”
^ Bɩ, “sẽn dat n yɩ sõma nif gesg pʋgẽ.”
^ Ges-y gom-biis võor bilgrã zĩigẽ.
^ Ges-y gom-biis võor bilgrã zĩigẽ.
^ Bɩ, “b kʋʋ ra-luk zugu.”
^ Bɩ, “sõmblem d sẽn pa segd ne.”
