Galat rãmbã 5:1-26
5 Yaa lohorem a woto yĩng la Kirist sẽn kɩt tɩ d paam d mensã. Woto wã, bɩ y yals kãn-kãe la y ra bas tɩ b le kẽes-y yembd pʋgẽ ye.
2 Ade! Maam a Poll yeta yãmb tɩ y sã n kɩt tɩ b kẽes-y bãongo, Kirist pa na n tall yõod ne yãmb baa bilf ye.
3 Mam le yeta ned ning fãa sẽn kẽed bãong tɩ yaa tɩlɛ ne-a t’a sak Tõogã tõre.
4 Yãmb a neb nins sẽn maood n dat tɩ Wẽnnaam yeel tɩ y yaa tɩrs tõogã maasem yĩngã welga ne Kiristã. Yãmb yiisa y mens bãmb barkã* pʋgẽ.
5 Sã n yaa ne tõndo, d gũudame n na n wa lebg tɩrs Wẽnnaam nifẽ. La na n tũu ne vʋʋsem sõngã la ne tõnd tẽebã bala.
6 Bala Kirist Zeezi pʋgẽ, bãong kõom wall moonem pa tar yõod baa bilf ye. La yaa tẽeb sẽn womd biis nonglem maasem yĩngã n tar yõodo.
7 Yãmb da zoeta sõma. Ãnda n gɩdg yãmb tɩ y ra kell n sak sɩdã?
8 Tags-kãngã buud pa yit Soab ning sẽn boond yãmbã nengẽ ye.
9 Rabɩll bilf wukda zom-nagdgã tõre.
10 Mam kɩsa sɩd tɩ yãmb a neb nins sẽn be Zu-soabã pʋgẽ wã pa na n tall tagsg a to ye. La ned ning sẽn namsd yãmbã, baa a sẽn yaa ned ning fãa, a na n paama sɩbgr ning a sẽn segd ne wã.
11 M saam-biisi, sã n yaa ne maam, mam sã n ket n moonda bãongã kõom, bõe yĩng tɩ b ket n namsd maam? Mam sã n ket n moonda bãongã kõom, dẽnd kũum ra-lukã* pa le yaa bũmb sẽn kɩtd tɩ ned lak n lʋɩ ye.
12 Mam nongẽ-la neb nins sẽn baood n gaam yãmbã ned kam fãa sẽn na n tolg n fiuug* a raoolmã.
13 M saam-biisi, b boola yãmb lohorem pʋgẽ. La y pa segd n kɩt tɩ lohorem-kãng lebg weer y sẽn paam n na n pʋg yĩngã ratem ye. Bɩ y bas tɩ nonglmã kɩt tɩ y tʋm wa yembs taab yĩnga.
14 Bala Tõogã fãa pidsa* noor a yembr pʋgẽ sẽn yete: “Fo tog n nonga f to wa f menga.”
15 La yãmb sã n dũmd taab la y wãbd taaba, bɩ y gũus tɩ y tõe n wa sãama taaba.
16 La mam yetame tɩ y kẽn wa vʋʋsem sõngã sẽn wilgd yãmb sor to-to wã, tɩ rẽ la y pa na n sak yĩngã ratem baa bilfu.
17 Bala yĩngã ratmã yĩnga, a kɩɩsda vʋʋsem sõngã, tɩ vʋʋsem sõngã me kɩɩsd-a. Bõn-kãensã kɩɩsda taaba, hal tɩ y pa maand bũmb nins y sẽn datã ye.
18 Sẽn paase, sã n yaa vʋʋsem sõngã n wilgd yãmb sore, tõogã pa so yãmb ye.
19 La yĩngã tʋʋm yaa vẽenese: B yaa yoobo,* rẽgdo, nin-yoolem,*
20 bõn-naands pʋʋsgo, zĩn-dãmb yɛl maanego, beem, zaba, sũ-kiiri, sũ-yikri, no-koɛɛma, welsgo, ninsaalb pʋgbo,*
21 to bũmb tʋlgre, rã-tɩgre, reem-yoodo, la bũmb a taab sẽn wõnd bõn-kãensã. Mam pĩnd n keoogda yãmb bõn-kãensã wɛɛngẽ wa mam sẽn da zoe n keoog yãmbã. Neb nins sẽn maand bõn-kãensa wã pa na n paam Wẽnnaam Rĩungã ye.
22 La vʋʋsem sõngã biis yaa nonglem, sũ-noogo, laafɩ, sũ-mare, maan-neere, sõmblem, tẽebo,
23 sũ-bʋgsem, la yõk-m-menga. Tõog ka be n kɩɩsd bõn-kãensã ye.
24 Sẽn paase, neb nins sẽn yaa Kirist Zeezi rẽndã naaga yĩngã ne a tʋlsmã la a ratmã n ka ra-lukã zugu.
25 Tõnd sã n basame tɩ vʋʋsem sõngã so tõnd vɩɩmã, bɩ d kell n kẽn sõma me wa vʋʋsem sõngã sẽn wilgd tõnd sor to-to wã.
26 Bɩ d ra lebg wuk-m-mens rãmba, n wagsd taab la d maand sũ-kiir ne taab ye.
Vẽnegr toor-toore
^ Bɩ, “sõmblem d sẽn pa segd ne.”
^ Ges-y gom-biis võor bilgrã zĩigẽ.
^ Bɩ, “kɩsg b mense,” tɩ rẽ kɩt tɩ b pa le tõe n tũ tõog ning b sẽn dat tɩ nebã tũ wã ye.
^ Pa rẽ bɩ, “kʋmsa.”
^ Gɛrk, porneya. Ges-y gom-biis võor bilgrã zĩigẽ.
^ Bɩ, “ned sẽn tʋmd tʋʋm-wẽns n pa zoet yãnde.” Ges-y gom-biis võor bilgrã zĩigẽ.
^ Rat n yeel tɩ tũudmã wɛɛngẽ.
