2 Tesalonik rãmbã 1:1-12
1 Maam a Poll ne a Sɩlvẽ* la a Tɩmote n gʋls seb-kãngã n tool Tesalonik nebã tigingã sẽn be Wẽnnaam sẽn yaa Ba wã pʋgẽ, la Zu-soab a Zeezi Kirist pʋgẽ wã:
2 Bɩ bark* la laafɩ sẽn yit Wẽnnaam sẽn yaa tõnd Ba wã nengẽ, la Zu-soab a Zeezi Kirist nengẽ zĩnd ne yãmba.
3 M saam-biisi, yaa tɩlɛ tɩ tõnd pʋʋsd Wẽnnaam bark wakat fãa yãmb yĩnga. Rẽ segdame, bala yãmb tẽebã pãng paasda wʋsgo, tɩ yãmb ned kam fãa nonglem ne a taabã me paasdẽ.
4 Yaa rẽ n so tɩ tõnd pẽgd yãmb Wẽnnaam tigimsã sʋka, bala baa yãmb sẽn paamd namsg la y segd zu-loees* tɩ namsd-y-yã,* y tõogda toogo, la y tar tẽebo.
5 Bõn-kãensã fãa yaa kaset tɩ Wẽnnaam kaoa bʋʋdã tɩrga, la rẽ na n kɩtame tɩ b geelg tɩ yãmb zemsa ne Wẽnnaam Rĩungã pʋgẽ kõom, Rĩung ning yĩng yãmb sẽn namsdã.
6 Wẽnnaam sẽn yaa tɩrlem soabã yĩnga, b na n sɩbga neb nins sẽn kɩt tɩ yãmb namsdẽ wã.
7 La yãmb a neb nins b sẽn namsdã, b na n kɩtame tɩ y lagem ne tõnd n paam yolsgo, wakat ning Zu-soab a Zeezi sẽn na n puk saasẽ ne b malɛgsã sẽn tar pãngã.
8 Yaa wakat ning b sẽn na n puk bug-witim pʋgẽ n sɩbg neb nins sẽn pa mi Wẽnnaam, la neb nins sẽn pa sakd tõnd Zu-soab a Zeezi koe-noogã.
9 Tõnd Zu-soabã na n kaoo nin-kãens bʋʋdo. B sɩbgrã na n yɩɩ sãoong wakat fãa yĩnga, sẽn na yɩl tɩ Zu-soabã ra le yã bãmba, wall b sõng-b ne b pãn-kãsengã ye.
10 Tõnd Zu-soabã sã n wa wa n na n naag b nin-sõamyã wã n paam ziiri, neb nins fãa sẽn tẽed bãmbã na n gesa bãmb ne sũ-noogo. Yãmb sẽn tẽ bũmb nins tõnd sẽn togs yãmbã yĩnga, yãmb me na n zĩnda nin-kãens sʋka.
11 Yaa rẽ yĩng la tõnd sẽn pʋʋsd Wẽnnaam wakat fãa yãmb yĩnga, n kotẽ tɩ Wẽnnaam geelg-y tɩ y yaa neb sẽn zems ne b boolgã, tɩ b tall b pãngã n maan bõn-sõma nins fãa b sẽn dat n maan yãmbã, la b kɩt tɩ tʋʋm nins yãmb sẽn tʋmd tẽeb yĩngã pidi.
12 Yaa sẽn na yɩl tɩ tõnd Zu-soab a Zeezi yʋʋrã paam pẽgr yãmb pʋsẽ, tɩ yãmb me paam pẽgr bãmb pʋgẽ wa sẽn zems tõnd Wẽnnaamã barkã,* la Zu-soab a Zeezi Kirist barkã.*
Vẽnegr toor-toore
^ B sẽn boond me t’a Sɩlaasã.
^ Bɩ, “sõmblem d sẽn pa segd ne.”
^ Bɩ, “toodo.”
^ Bɩ, “tɩ y tõogd toogo.”
^ Bɩ, “sõmblem d sẽn pa segd ne.”
^ Bɩ, “sõmblem d sẽn pa segd ne.”
