2 Tɩmote 2:1-26
2 Woto wã, m biiga, bɩ f ket n paamd pãng Wẽnnaam barkã* sẽn be Kirist Zeezi pʋgẽ wã maasem yĩnga.
2 La sã n yaa ne bũmb nins fo sẽn wʋm mam nengẽ tɩ neb wʋsg kõ bõn-kãens kasetã wɛɛngẽ, bɩ f rɩk-b n zãms rap sẽn maand sɩda, tɩ bãmb me paam minim n tõog n zãms neb a taaba.
3 Fo sẽn yaa Kirist Zeezi soda-sõngã yĩnga, bɩ f sak namsgo.
4 Ned kae sẽn na n be sodaar la a kẽesd a toog* vɩ-kãngã leebgã yɛlẽ,* a sẽn dat n ta ned ning sẽn dɩk-a sodaarã yam yĩng ye.
5 La baa zoees* sasa, b pa kõt zoɛt baa a ye maanf tɩ sã n pa mik t’a zoeeme tɩ zems zoeesã noyã ye.
6 Ka-koaad ning sẽn tʋmd wʋsgã n segd n yɩ pipi n dɩ a pʋʋgã biisi.
7 Tags bũmb nins mam sẽn yet foomã yell wakat fãa. Zu-soabã na n kɩtame tɩ fo wʋm bũmb fãa võore.*
8 Tẽeg tɩ b vʋʋga a Zeezi Kirist n yiis kũ-rãmb sʋka, la tɩ b ra yaa a Davɩɩd yageng wa koe-noog ning mam sẽn moondã sẽn yetã.
9 Yaa koe-no-kãng yĩng la mam sẽn namsde, tɩ b pag maam bãens roog wa bi-bɛɛgã. Baasgo, b pa balg Wẽnnaam gomdã ye.
10 Yaa rẽ yĩng la mam sẽn ket n tõogd toog bũmb fãa pʋgẽ nin-tũusdsã yĩnga, sẽn na yɩl tɩ bãmb me paam fãagr ning sẽn tũud ne Kirist Zeezi wã, la b paam ziir sẽn pa sate.
11 Ad gomd sẽn yaa sɩda: Yaa vẽeneg tɩ tõnd sã n naag bãmb n ki, d na n naaga bãmb me n vɩɩmde.
12 Tõnd sã n kell n tõog toogo, d na n naaga bãmb me n yɩ rĩm-dãmb n dɩ naam. La tõnd sã n kɩɩs tɩ d pa mi bãmba, bãmb me na n kɩɩsame tɩ b pa mi tõnd ye.
13 Tõnd sã n pa maan sɩda, bãmb na n kell n maana sɩda, bala b pa tõe n kɩɩs b mengã raab ye.
14 Ket n tẽegd-b bõn-kãensã, la f yet-b* Wẽnnaam taoor tɩ b ra wẽ no-koɛɛm gom-biis poorẽ ye. Rẽ pa tar yõod baa bilfu, bala wãada* neb nins sẽn kelgdã.
15 Maan f sẽn tõe fãa n ta Wẽnnaam yam, n yɩ tʋm-tʋmd sẽn kõn zoe yãnde, la sẽn zãmsd nebã sɩdã koɛɛgã neere.
16 La bɩ f zãag f meng ne gom-vɩɩd nins sẽn paoogd Wẽnnaamã. Bala rẽ na n waa ne wẽn-kɩɩsg wʋsgo.
17 Neb nins sẽn gomd gom-kãensa wã goamã na n paama pãng wa solenkẽega. A Imene ne a Filɛt bee b sʋka.
18 Nin-kãens lak n basa sɩdã, n yetẽ tɩ kũum vʋʋgrã zoe n zĩndame, la b sãamd neb kẽer tẽebo.
19 Baa ne rẽ, Wẽnnaam yẽbgrã sẽn tar pãngã yasa kãn-kãe, n tar bãnd sẽn gʋls n yetẽ: “A Zeova* mii sẽn yaa-b bãmb dẽndã,” la “Bɩ ned ning fãa sẽn pʋt a Zeova* yʋʋrã bas tʋʋm-wẽnse.”
20 La ro-kãseng pʋgẽ, pa sãnem la wanzuri laas bal n be be ye. Laas sẽn maan ne raad la tãnd me bee be. Kẽer yaa laas sẽn tar n maand bũmb sẽn be waoogre, tɩ sãnda yaa sẽn tar n maand bũmb sẽn pa be waoogre.
21 Woto wã, ned sã n lak a meng ne laas nins sẽn tar n maand bũmb sẽn pa be waoogrã, a na n yɩɩ teoog* b sẽn tar n maand bũmb sẽn be waoogre, teoog sẽn yaa sõngo, sẽn tar yõod ne a soabã, la b sẽn segl tʋʋm-sõma buud fãa yĩnga.
22 Bɩ f zoe yãadmã tʋls-wẽnsã, la f naag neb nins sẽn pʋʋsd Zu-soabã ne sũur sẽn yaa yɩlemdã n bao tɩrlem, tẽebo, nonglem la laafɩ.
23 Sẽn paase, bɩ f ra kẽes f toog no-koɛɛm nins sẽn yaa yalemd la sẽn ka võorã pʋsẽ, f sẽn mi tɩ b wata ne zabã yĩnga.
24 Bala, Zu-soabã tʋm-tʋmd pa segd n zab ye. A segd n talla bʋgsem ne nebã fãa, n mi neb zãmsgo, n tõe a meng wẽng b sẽn maan-a taoore,
25 la a remsd kɩɩsdbã ne sũ-bʋgsem. Daar ninga, Wẽnnaam na kɩt tɩ b tek yam, n tõog n paam bãngr hakɩɩk sɩdã zugu.
26 Rẽ la b yamã na n vẽnege, tɩ b yiis b mens a Sʋɩtãan* bẽdgã pʋgẽ, bala a yõg-b-la vɩɩs sẽn na yɩl tɩ b maan a raabã.
Vẽnegr toor-toore
^ Bɩ, “sõmblem d sẽn pa segd ne.”
^ Gɛrk, “gĩd a menga.”
^ Pa rẽ bɩ, “daar fãa tʋʋmã.”
^ Gɛrk, “reem.” Yaa ɛspoor buud toor-toore.
^ Bɩ, “kõ foo yam-vẽenem.”
^ Gɛrk, “kõt-b kaset sõma.”
^ Bɩ, “sãamda.”
^ Ges-y gom-biis võor bilgrã zĩigẽ.
^ Ges-y gom-biis võor bilgrã zĩigẽ.
^ Bɩ, “laaga.”
^ Gɛrk, “diabolos” sẽn dat n togs tɩ “munaafɩɩka.”
