2 Korẽnt rãmb 7:1Verse-rãmb sã n tong taab seb-yend pʋgẽ, gʋls-bi kãngã n na n zĩnd pipi soabã ne yaoolem soabã sʋka, Yɩɩn. 37:9-1116
-
D yɩlg d mens n yiis rẽgd buud fãa (1)
-
A Poll sũur nooma ne Korẽnt nebã (2-4)
-
A Tɩt lebg n wa togsa koe-noogo (5-7)
-
Sũ-sãang sẽn zems ne Wẽnnaam daab la tek yam n kos sugri (8-16)
7 Woto wã, m nin-nongdse, sẽn mik tɩ tõnd tara pʋlen-kãensa wã, bɩ d yɩlg d mens n yiis rẽgd buud fãa sẽn yaa yĩngã rẽnd la sɩɩgã rẽnda, n lebgd sõamyã n paasd Wẽnnaam zoeesã pʋgẽ.
2 Bao-y weer y sũyã pʋsẽ tõnd yĩnga. Tõnd pa beeg ned baa a ye, d pa sãam ned baa a ye, d pa wẽg ned baa a ye me ye.
3 Mam pa yet woto n na n ning yãmb taal ye. Bala mam zoe n yeelame tɩ yãmb bee tõnd sũyã pʋsẽ n na n naag tõnd n ki, la y naag tõnd n vɩɩmde.
4 Mam tõe n goma ne raood wʋsg yãmb taoore. Mam tõe n zẽka m zug wʋsg yãmb yĩnga. Mam paama belsg wʋsgo. Mam sũur pida ne sũ-noog tõnd namsgã fãa pʋgẽ.
5 Sɩd me, tõnd sẽn wa n ta Masedoannã, tõnd yĩnsã* pa paam yolsg baa bilf ye. La tõnd da ket n paamda namsg ne manesem buud fãa: Yɩnga b ra zabda ne tõndo, la tõnd me ra maanda yɩɩr d sũyã pʋsẽ.
6 La Wẽnnaam sẽn belsd sũ-sãang rãmbã belsa tõnd ne a Tɩt waoongã maasem.
7 La pa ne a waoongã bal ye. Yɩɩ ne belsg ning a sẽn paam yãmb yĩngã me. A lebg n wa togsa tõnd tɩ yãmb rat n yãa maam ne y sũy fãa, tɩ y sũy sãama wʋsgo, la tɩ yãmb tagsda mam yell wʋsgo,* tɩ rẽ maneg n paas m sũ-noogã.
8 Baa mam sã n sãama yãmb sũur ne m sebrã, mam pa maand m bãngẽ ye. Baa mam sã n da maand m bãngẽ sɩngrẽ wã, (mam sẽn yã tɩ sebrã sãamã yãmb sũyã, baa sẽn yɩ wakat bilf pʋgẽ wã yĩngã)
9 mam maanda sũ-noog masã, la pa yãmb sũur sẽn sãamã yĩng ye. Yaa yãmb sũur sẽn sãam hal n kɩt tɩ y tek yam n kos sugrã yĩnga. Bala yãmb sũur sãama ne sũ-sãang sẽn zems ne Wẽnnaam daabã, sẽn na yɩl tɩ y ra bõn bũmb tõnd yĩng ye.
10 Sũ-sãang ning sẽn zems ne Wẽnnaam daabã wata ne tek yam n kos sugri, tɩ rẽ wat ne fãagre, n pa kɩtdẽ tɩ ned maan a bãngẽ ye. La dũniyã sũ-sãangã wata ne kũum.
11 Ges-y yãmb sũ-sãangã sẽn zems ne Wẽnnaam daabã sẽn kɩt tɩ y modgã sẽn wa ne bũmb ninsi: A kɩtame tɩ yãmb yɩlg y mense, tɩ y sãam y sũuri, tɩ y zoe rabeem, tɩ y paam ratem-kãsenga, tɩ y paam yẽesem, la y rems yellã! Bũmb fãa pʋgẽ, yãmb wilgame tɩ y yaa yɩlem* yel-kãngã pʋgẽ.
12 Baa ne mam sẽn gʋls yãmbã, mam pa gʋls ned ning sẽn beegã yĩnga, wall ned ning a sẽn beegã yĩng ye. La yaa sẽn na yɩl tɩ yãmb sẽn modgd n kelgd tõndã lebg vẽeneg yãmb sʋk Wẽnnaam taoore.
13 Yaa rẽ yĩng la tõnd sẽn paam belsgã.
La tõnd belsgã sẽn yãk a toogo, d maneg n kɩdma sũ-noog a Tɩt sũ-noogã yĩnga, bala yãmb fãa kenga a raoodo.
14 Mam sẽn zẽk m zug yẽ taoor yãmb poorẽ wã, mam pa paam yãnd ye. Tõnd sẽn zẽk d zug a Tɩt taoorã yɩɩ sɩda, wa bũmb nins fãa tõnd sẽn yeel yãmbã me sẽn yɩ sɩdã.
15 Sẽn paase, a sẽn tẽegd yãmb fãa sakrã, la yãmb sẽn deeg-a ne rabeem la rigbã kɩtame t’a sẽn nong yãmb to-to wã maneg n paam pãnga.
16 Mam kɩdemda sũ-noogo, mam sẽn tõe n kɩs yãmb sɩd* bũmb fãa pʋgẽ wã yĩnga.
Vẽnegr toor-toore
^ Gɛrk, “yĩn-nemsã.”
^ Gɛrk, “yãmb tara yẽesem mam yĩnga.”
^ Bɩ, “pa tar yelle.”
^ Pa rẽ bɩ, “mam tõe n talla raood wʋsg yãmb yĩnga.”
