2 Korẽnt rãmb 6:1-18
6 Tõnd sẽn yaa Wẽnnaam tʋmd-n-taasã yĩnga, d le sagenda yãmb tɩ y ra reeg Wẽnnaam barkã* zaalem yĩng ye.
2 Bala Wẽnnaam yetame: “Bark wakate, mam kelga foom. Fãagr daare, mam sõnga foom.” Ade! Masã yaa bark wakat n yɩɩda. Ade! Masã yaa fãagr daare.
3 Tõnd pa maand baa fʋɩ sẽn tõe n wa ne ned lʋɩɩse, sẽn na yɩl tɩ ned ra wa paam bũmb n tik n sãbs tõnd tʋʋmdã ye.
4 La bũmb fãa pʋgẽ tõnd wilgdame tɩ d yaa Wẽnnaam tʋm-tʋmdba, ne tõog-toog bũmb wʋsg pʋgẽ, ne toodo, ne yel-pakre, ne zu-loeese,
5 ne pãbre, ne bãens roog kõom, ne tẽn-dãmbgo, ne tʋʋm wʋsgo, ne yʋnd d sẽn pa n pa gũsi, ne rɩɩb kaalem,
6 ne pʋ-peelem, ne bãngre, ne sũ-mare, ne sõmblem, ne vʋʋsem sõngo, ne nonglem sẽn pa naag ne pʋ-lika,
7 ne goam sẽn yaa sɩda, ne Wẽnnaam pãnga, ne tɩrlem zab-teed sẽn be d nug-rɩtg* la d nug-goabg* maasem,
8 ne ziir la paoogr maasem, la ne wɩdg la pẽgr maasem. Nebã geta tõnd wa bɛlgdba, tɩ tõnd yaool n yaa sɩd rãmba.
9 B geta tõnd wa neb b sẽn pa mi, la Wẽnnaam mii tõndo. B geta tõnd wa neb sẽn ki la bala,* la tõnd yaa vɩɩse. B geta tõnd wa neb sẽn paam sɩbgre,* la b pa kʋ tõnd ye.
10 B geta tõnd wa neb sũy sẽn sãame, la tõnd kɩdemda sũ-noog wakat fãa. B geta tõnd wa naong rãmba, la tõnd kɩtdame tɩ neb wʋsg lebgd arzɛk rãmba. B geta tõnd wa neb sẽn pa tar baa fʋɩ, la tõnd tara bũmb fãa.
11 Korẽnt neba, tõnd yaaga d noor n gom* ne yãmba. D paka d sũy yalenga.
12 Weer bee tõnd sũyã pʋsẽ yãmb nonglem yĩnga, la yãmb pa bas weer yãmb sũyã pʋsẽ tõnd nonglem yĩng ye.
13 Mam gomda ne yãmb wa m sẽn gomd ne m kamba. Mam kotame tɩ y maan tõnd wa tõnd sẽn maan yãmbã. Bɩ yãmb me pak y sũyã yalenga.
14 Da bao-y lagem-n-taar* sẽn pa zems ne sẽn pa-b tẽedbã ye. Bala bõe zems-n-taar n be tɩrlem ne tʋʋm-wẽns sʋka? Wall bõe lageng n be vẽenem ne lik sʋka?
15 Sẽn paase, bõe zems-n-taar n be Kirist ne Belyall* sʋka? Wall bõe pʋɩɩr n be tẽed* ne ned sẽn pa tẽed sʋka?
16 La bõe zems-n-taar n be Wẽnnaam doogã ne bõn-naands sʋka? Bala, tõnd yaa Wẽnnaam sẽn vɩ roogo, wa Wẽnnaam sẽn yeelã: “Mam na n zĩnda bãmb sʋka, la m kẽn b sʋka. Mam na n yɩɩ bãmb Wẽnnaam, tɩ bãmb me yɩ mam neba.”
17 “A Zeova* le yetame: ‘Woto yĩnga, bɩ y yi bãmb sʋk la y lak y mense, la y ra le sɩɩs bõn-dẽgdã,’ ” “ ‘la mam na reeg yãmba.’ ”
18 “A Zeova* sẽn yaa Sẽn-tõe-a-fãa wã yetame: ‘La mam na n lebga yãmb ba, tɩ yãmb me lebg mam kom-dibli la m kom-pugli.’ ”
Vẽnegr toor-toore
^ Bɩ, “sõmblem d sẽn pa segd ne.”
^ Tõe tɩ yaa sẽn na n tall n zabe.
^ Tõe tɩ yaa sẽn na n tall n kogl d mense.
^ Bɩ, “b geta tõnd wa neb sẽn segd ne kũum.”
^ Bɩ, “kiblgu.”
^ Bɩ, “d goma vẽeneg-vẽenega.”
^ Gɛrk, “balgre.”
^ Ebre wã gom-bila, t’a võorã rat n yeel tɩ “Ka barka.” Yaa a Sʋɩtãan la b boond woto.
^ Bɩ, “ned sẽn sakd Wẽnnaam.”
^ Ges-y gom-biis võor bilgrã zĩigẽ.
^ Ges-y gom-biis võor bilgrã zĩigẽ.
