1 Tɩmote 6:1-21
6 Bɩ sẽn yaa-b yembsã kell n tags tɩ b zu-soben-dãmbã segda ne waoogr wʋsgo, sẽn na yɩl tɩ Wẽnnaam yʋʋrã la b zãmsgã ra tol n paam paoogr ye.
2 Sẽn paase, sẽn tar-b zu-soben-dãmb sẽn yaa tẽedbã pa segd n paoog-ba, b sẽn yaa saam-biisã yĩnga. La b segd n maneg n tʋma ne yamleoogo, bala, neb nins sẽn dɩt b tʋʋm-sõngã yõodã yaa b tẽed-n-taase, la b saam-bi-nongdse.
Kell n zãms nebã bõn-kãense, la f kõ-b sagl-kãense.
3 Ned sã n zãmsd nebã zãmsg a to, n pa sakd zãmsg ning sẽn nafdã* sẽn yaa zãmsg ning sẽn yit tõnd Zu-soab a Zeezi Kirist nengẽ wã, la a pa sakd zãmsg ning sẽn zems ne Wẽnnaam sakrã,
4 yẽ soab pida ne wuk-m-menga, n pa wʋmd baa fʋɩ võor ye. A nonga kɩɩsg la gom-biis poorẽ no-koɛɛm hal tɩ looge. Bõn-kãens wata ne to bũmb tʋlgre, zaba, tẽn-kãnem,* la kɩtdẽ tɩ nebã pa kõt taab sɩd ye.
5 B kɩtdame me tɩ neb nins tagsa sẽn yaa wẽns zãngã, n yaa neb sẽn pa mi sɩdã n tagsdẽ tɩ Wẽnnaam sakrã yaa f meng nafr yĩngã wẽed no-koɛɛm wakat fãa, bũmb toor-toor sẽn pa zem baa fʋɩ poorẽ.
6 Sɩd-sɩda, Wẽnnaam sakrã nafda ned wʋsgo, la yaa a soabã sẽn na n maand sũ-noog ne bũmb ning a sẽn tarã.*
7 Bala, tõnd pa zã baa fʋɩ n wa dũniyã pʋgẽ, la d pa tõe n zã bũmb n yi me ye.
8 Woto wã, d sã n tar rɩɩb la futu,* d na n maana sũ-noog ne bõn-kãense.
9 La neb nins sẽn dat n lebg rakãag-rãmb ne b sũy fãa wã lʋɩta makr pʋgẽ, bẽdg la ratem wʋsg pʋgẽ sẽn yaa yalemd la sẽn sãamd bãmba, tɩ rẽ wat ne zu-loees la sãoongo.
10 Bala, ligdã nonglem yaa bõn-wẽns buud fãa yẽgre, la neb kẽer sẽn lʋɩ ligdã nonglem pʋgẽ wã, b lakame n bas tẽebã, n kɩt tɩ tood wʋsg paam-ba.*
11 La foom a Wẽnnaam neda, zoe bõn-kãensã, la f bao tɩrlem, wẽn-sakre, tẽebo, nonglem, tõog-toog la sũ-bʋgsem.
12 Zab tẽebã zab-sõngã. Gãd vɩɩm sẽn ka sɛtã kãn-kãe, bala yaa vɩ-kãng yĩng la b bool foom. Sẽn paase, fo kõo vɩ-kãng kaset kaset rãmb wʋsg taoore.
13 Mam yeta foo Wẽnnaam ning sẽn kõt bũmb fãa vɩɩmã taoore, la Kirist Zeezi sẽn yaa soab ning sẽn kɩs kaset sõma a Põns Pɩlat taoorã taoore,
14 tɩ f tũ noyã n da tall rẽok la taale, hal n tãag wakat ning tõnd Zu-soab a Zeezi Kirist sẽn na n wilg b pãngã.*
15 A wakatã sã n ta, sũ-noog soabã sẽn yaa b ye bal n yaa Naabã na n wilga rẽ. Bãmb n yaa rĩm-dãmb nins sẽn dɩt naamã Rĩma, la zu-soben-dãmbã Zu-soaba.
16 Bãmb b ye bal n pa tõe n ki, n be vẽenem ned sẽn pa tõe n kolg pʋgẽ. Ned zɩ n yã bãmba, la ned pa tõe n yã bãmb me ye. Bɩ bãmb paam waoogr la pãng sẽn ka sɛta. Ãmiina.
17 Yeel neb nins sẽn yaa rakãag-rãmb dũni-kãngã* pʋgẽ wã tɩ b ra yɩ wuk-m-mens rãmba, la tɩ b ra teeg arzɛgs nins sẽn satã ye. Bɩ b teeg Wẽnnaam sẽn yaa soab ning sẽn kõt tõnd bũmb fãa wʋsg tɩ d maand sũ-noogã.
18 Yeel-b tɩ b maan sẽn yaa sõma, tɩ b yɩ arzɛk rãmb tʋʋm-sõma wã wɛɛngẽ, tɩ b yɩ kõtba, n pʋɩt bũmb nins b sẽn tarã.
19 Woto, b bĩngda paoong b mens yĩng sẽn yaa yẽbgr sẽn yaa sõma beoog-daar yĩnga, sẽn na yɩl n gãd vɩɩm hakɩɩkã kãn-kãe.
20 Tɩmote, gũ bũmb ning b sẽn kõ foomã neere, n zãag f meng ne gom-vɩɩdã sẽn paoogd Wẽnnaamã, la ne bãng-feedã sẽn wat ne no-koɛɛm ninsã.
21 Neb kẽer sẽn wilg tɩ b tara bãng-kãng buudã, b bʋdgame n bas tẽebã.
Bɩ Wẽnnaam barkã* zĩnd ne foom.
Vẽnegr toor-toore
^ Bɩ, “sẽn yaa sõma.”
^ Bɩ, “tʋya.”
^ Gɛrk, “a sẽn na n kɩt tɩ bũmb ning a sẽn tarã sek-a.”
^ Bɩ, “gãag zĩiga.”
^ Bɩ, “b pogla b mens zĩig zãnga.”
^ Gɛrk, “vẽneg b menga.”
^ Bɩ, “sõmblem d sẽn pa segd ne.”
