1 Tɩmote 5:1-25
5 Ra gom nin-kẽem ne toolem ye. La bɩ f sagl-a wa f ba, la f sagl kom-bɩɩsã wa f ba-bi-rapa,
2 pagb nins sẽn kʋʋlã wa f ma-rãmba, pagb nins yʋʋm sẽn pa vẽsgã wa f ba-bi-pogse, la zã f meng sõma ne bãmba.
3 Wilg tɩ f nanda* pʋg-kõap nins sẽn sɩd yaa pʋg-kõapã.*
4 La pʋg-kõor sã n tar kamb wall yagense, b segd n deng n gesa b zakã rãmb yell n wilg b wẽn-sakrã. B segd n kõo b ba-rãmbã la b ma-rãmbã ne b yaab-rãmbã bũmb nins b sẽn segd n kõ-bã, bala rẽ nooma Wẽnnaam.
5 La pag ning sẽn sɩd yaa pʋg-kõor la sẽn ka tar sõngdã teega Wẽnnaam, n yõkd Wẽnnaam sɛɛg la a pʋʋsd wĩndg la yʋngo.
6 La a soab ning sẽn vɩ a mengã tʋlsem* yĩng balã kiime, baa a sẽn ket n vɩ wã.
7 Woto yĩnga, bɩ f kell n kõ-b no-kãensã sẽn na yɩl tɩ ned baa a ye ra tõog n ning-b taal ye.
8 Sɩd-sɩda, ned sã n pa ges a neb yelle, sẽn yɩɩd fãa, a meng zak rãmb yelle, a kɩɩsa tõnd sẽn tẽed bũmb ninsã, la a yaa wẽng n yɩɩd ned sẽn pa tar tẽebo.
9 Pʋg-kõor ning sẽn tõe n paam tɩ b gʋls a yʋʋr sebrã zug yaa sẽn ta-a yʋʋm pis-yoobe, la sẽn yɩ-a nin-yɛng paga.
10 Segd n yɩɩ pag nebã sẽn kõt kaset t’a tʋma tʋʋm-sõma, wala makre, t’a wuba kamba, t’a maana sãamb sãando, t’a peka nin-sõamyã wã naoã, t’a sõnga sũ-sãang rãmba, la t’a tʋma tʋʋm-sõng buud fãa ne a sũur fãa.
11 La bɩ f ra gʋls pʋg-kõap nins yʋʋm sẽn pa vẽsgã yʋy sebrã zug ye. Bala pag ne rao lageng tʋlsmã sã n wa kẽ bãmb ne Kirist tʋʋmdã sʋka, b wat n dat n kẽe kãadem.
12 La b na n paama taale, b sẽn kɩɩs b pipi pʋlengã yĩnga.
13 Sẽn paase, b wat n zãmsa kʋɩɩngo, n gilgd zak-zaka. La pa kʋɩɩng bal la b zãmsd ye. B wat n zãmsa gom-toogo, la b kẽesd b toog neb a taab yɛlẽ, n gomd bũmb toor-toor yell b sẽn pa segd n gome.
14 Woto yĩnga, mam datame tɩ pʋg-kõap nins yʋʋm sẽn pa vẽsgã kẽ kãadem, n dog kamba, n ges zak yelle, la b ra kõ bɛɛbã weer tɩ b wɩd tõnd ye.
15 Sɩd-sɩda, pʋg-kõap kẽer zoe n basa sɩdã n pʋg a Sʋɩtãana.
16 Pag sẽn yaa tẽed sã n tar roagdb sẽn yaa pʋg-kõapa, bɩ a ges b yell sẽn na yɩl tɩ ra yɩ zɩɩb ne tigingã ye. Woto, tigingã tõe n gesa sẽn yaa-b pʋg-kõap sɩd-sɩdã* yelle.
17 Kãsem-dãmb nins sẽn lʋɩt tigingã taoor sõma wã segda ne waoogr wʋsgo, sẽn yɩɩd fãa, b rãmb nins sẽn tʋmd wʋsg koɛɛgã mooneg* pʋgẽ, la nebã zãmsg pʋgẽ wã.
18 Bala, Gʋls-sõamyã yetame: “Loalg sã n wa tʋmd zaeegẽ, fo pa segd n ning a noorã yʋk ye.” B le yeelame: “Tʋm-tʋmd zemsa ne a yaoodo.”
19 B sã n dõd nin-kẽem* bɩ f ra tẽ, sã n pa neb a yiib bɩ a tãab n kõ kaset ye.
20 Gom neb nins sẽn maand yel-wẽnã nebã fãa taoore, tɩ yɩ keoogr neb a taabã yĩnga.*
21 Mam yeta foom Wẽnnaam taoore, Kirist Zeezi taoor la malɛg-tũusdsã taoor tɩ f tũ no-kãensã la f ra tũus neba, wall f bak ned n sõng ye.
22 Ra yɩ yãg-yãg n tik ned baa a ye ne f nus ye.* Ra naag neb a taabã b yel-wẽn pʋgẽ ye. Kell n yɩ yɩlemde.
23 Ra le yũ koom ye.* Yũ divẽ bilfu, fo pʋgã yĩnga, la f sẽn wae n lʋɩt bãasã yĩnga.
24 Neb kẽer yel-wẽn yaa bũmb nebã fãa sẽn mi, tɩ wat ne bʋʋd kaoob zĩig pʋgẽ. La neb sãnda rẽnd wat n lebga vẽenes kaoosg zugẽ.
25 Woto me, tʋʋm-sõma wã yaa bũmb nebã fãa sẽn mi, la ned pa tõe n kell n solg tʋʋm nins sẽn pa sõma wã ye.
Vẽnegr toor-toore
^ Gɛrk, “waooge.”
^ Bɩ, “pʋg-kõap nins sẽn sɩd rat sõngrã,” rat n yeel tɩ sẽn pa tar-b sõngdã.
^ Tõe tɩ yaa pag ne rao lageng tʋlsmã yell la b sẽn gomdã.
^ Bɩ, “pʋg-kõap nins sẽn sɩd rat sõngrã,” rat n yeel tɩ sẽn pa tar-b sõngdã.
^ Gɛrk, “goamã.”
^ Bɩ, “kãsem-soaba.”
^ Gɛrk, “sẽn na yɩl tɩ sẽn ket-bã yɛɛse.”
^ Rat n yeel tɩ f ra yɩ tao-tao n bobl ned tʋʋmd ye.
^ Bɩ, “Ra le yũ koom bal ye.”
