1 Tɩmote 2:1-15
2 Pipi, mam sagenda nebã fãa tɩ b modg ne se-yõkre, ne pʋʋsgo, ne kosgo, la ne bark pʋʋsg ned buud fãa yĩnga,
2 wala makre, rĩm-dãmbã ne neb nins fãa sẽn tar naamã yĩnga, sẽn na yɩl tɩ tõnd tõog n vɩɩmd ne bãan la laafɩ, n sakd Wẽnnaam ne d sũur fãa, la d maand bũmb fãa sõma.
3 Bõn-kãens yaa sõma Wẽnnaam sẽn yaa tõnd Fãagdã nifẽ, n tat b yam.
4 Bãmb raabã yaa tɩ nebã buud fãa paam fãagre, la b paam bãngr hakɩɩk sɩdã zugu.
5 Bala Wẽnnaam a yembr n be, la se-yõkd a yembr me n be Wẽnnaam ne nebã sʋka: Yaa rao a Kirist Zeezi.
6 Bãmb kõo b meng n yao yaood ning sẽn da segd n yao n fãag ninsaalbã fãa* ne yel-wẽndã. Nebã na n kõo bõn-kãng kaset a wakate.
7 Yaa kaset-kãng yĩng la b yãk maam tɩ m yaa koe-moond la tʋm-tʋmda, rat n yeel tɩ m yaa bu-zẽmsã karen-saamba, n zãmsd-b tẽebã la sɩdã wɛɛngẽ. Mam togsda sɩda, mam pa yagd ziri ye.
8 Woto yĩnga, mam datame tɩ zĩig fãa bɩ rapã pʋʋsd Wẽnnaam, n zẽkd b nusã n teesd Wẽnnaam ne kɩs-sɩda, tɩ sũ-yikr la no-koɛɛm kaẽ ye.
9 Woto me, pagbã segd n manegda b mens ne sik-m-meng la gũusgu, n yer fut sẽn zemse.* Pa segd n yɩ ne zut pãneng buud toor-toor la ne sãnem, wall ne kĩndi, bɩ ne fut ligd sẽn yaa toog wʋsg ye.
10 Segd n zemsa ne pagb sẽn yet tɩ b tũuda Wẽnnaam sẽn manegd b mens to-to wã, rat n yeel tɩ ne tʋʋm-sõma.
11 Pag segd n sĩndame* n kelgd zãmsg ne sik-m-menga.
12 Mam pa kõt pag sor t’a zãms raoa, wall a soog rao ye. A segd n kell n sĩndame.*
13 Bala, yaa a Ãdem la b reng n naane, n yaool n naan a Awa.
14 Sẽn paase, pa a Ãdem la b belg ye. Yaa pagã la b belg-yã, t’a lebg kɩɩsda.
15 Baasgo, a na n paama koglg kambã rogem maasem yĩnga. La yaa a* sẽn na n kell n tall tẽeb la nonglem, n yɩ sõng la a maan gũusgu.
Vẽnegr toor-toore
^ Bɩ, “ninsaalbã buud fãa.”
^ Bɩ, “sẽn be waoogre.”
^ Bɩ, “zĩnd sɩɩ.”
^ Bɩ, “kell n zĩnd sɩɩ.”
^ Gɛrk, “b.”
