1 Korẽnt rãmb 9:1-27
9 Mam pa tar lohorem la? Mam pa tʋm-tʋmd la? Mam pa yã tõnd Zu-soab a Zeezi la? Yãmb pa tʋʋmd ning mam sẽn tʋmd Zu-soabã pʋgẽ wã biis la?
2 Baa mam sã n pa tʋm-tʋmd neb a taabã nifẽ, yaa vẽeneg tɩ mam yaa tʋm-tʋmd yãmb nifẽ! Bala, yãmb yaa kaset sẽn wilgd tɩ mam yaa Zu-soabã tʋm-tʋmda.
3 Ad mam sẽn leokd sẽn wɩt-b maamã to-to:
4 Tõnd tara sor* n na n dɩ la d yũ. Bɩ bõe?
5 Tõnd pa tar sor n na n bao saam-bi-poak* n maan d paga, t’a yãagd tõnd wa tʋm-tʋmdb a taabã ne Zu-soabã ma-biisã n paas a Sefas* sẽn maandã la?
6 Bɩ yaa maam ne a Barnabaas bal n pa tar sor n na n bas d nug-tʋʋma?
7 Soda-bʋg n be sodaar la a get a meng yell a toore? Ãnda n send viyn pʋʋg n yaool n pa rɩt a biisi? Wall ãnda n kɩɩmd rũms n yaool n pa yũud rũmsã bĩisim?
8 Mam yeta bõn-kãensã wa sẽn zems ninsaal tagsg bɩ? Tõogã me pa yet woto sɩda?
9 Bala, b gʋlsa a Moyiiz Tõogã pʋgẽ n yeele: “Loalg sã n wa tʋmd zaeegẽ, fo pa segd n ning a noorã yʋk ye.” Yaa lolsã yell n da pak Wẽnnaam bɩ?
10 Bɩ sɩd yaa tõnd yĩng la b yeel woto? Sɩd-sɩda, b ra gʋlsa rẽ tõnd yĩnga. Bala, ned ning sẽn kood ne ned ning sẽn pãbd kood segd n maanda rẽ la b saagdẽ tɩ b na n paama pʋɩɩre.
11 Tõnd sã n kõo yãmb bũmb wʋsg sẽn yit Wẽnnaam nengẽ, yɩta wẽng tɩ d reeg bũmb yãmb nengẽ tõnd sõngr yĩng sɩda?
12 Neb a taab sã n tara sor n tõe n deeg bũmb yãmb nengẽ, pa tõnd n tar sor n yɩɩd sɩda? La baa tõnd sẽn tar sor* n na n maan dẽ wã, tõnd pa kos yãmb baa fʋɩ ye. La tõnd tõoga toog bũmb fãa pʋgẽ, sẽn na yɩl n da wa gɩdg Kirist koe-noogã ne manesem baa a yembr ye.
13 Yãmb pa mi tɩ rap nins sẽn tʋmd Wẽnnaam tʋʋmã rɩta bũmb nins sẽn be wẽnd-doogẽ wã, la tɩ sẽn tʋmd-b tẽn-kugrẽ wã wakat fãa wã paamda pʋɩɩr sẽn yit tẽn-kugrã zug la?
14 Woto me, Zu-soabã kõo sẽn moond-b koe-noogã noor tɩ b vɩɩmd koe-noogã maasem yĩnga.
15 Baa ne rẽ, mam pa kos yãmb baa fʋɩ ye. Sɩd-sɩda, mam sẽn gʋls yãmb n gom bõn-kãens yellã pa sẽn na yɩl tɩ y maan woto mam yĩng ye. Bala, mam sẽn kiid n são mam sẽn na n bas tɩ b reeg bũmb ning m sẽn tõe n tik n pẽg m mengã!
16 La mam sã n moond koe-noogã, rẽ pa bũmb m sẽn tõe n tik n pẽg m meng ye. Bala, yaa zɩɩb sẽn dog mam zugu. Sɩd-sɩda, mam sã n pa moon koe-noogã, mam na paam toogo!
17 Mam sã n maan dẽ ne yamleoogo, mam tara keoore. La mam sã n pa maan dẽ ne yamleoogo, ket n yaa tʋʋmd Zu-soabã sẽn kõ maam.
18 Woto wã, mam keoorã yaa bõe? Mam keoorã yaa tɩ m sã n wa moond koe-noogã, bɩ m taas-a nebã zaalem, n da wa tũnug ne noor* ning koe-noogã sẽn kõt maamã n wẽg ned ye.
19 Bala baa mam sẽn tar lohorem nebã fãa taoorã, mam lebga nebã fãa yamba, sẽn na yɩl n paam neb wʋsg wa m sẽn tõe tɛka.
20 Ne Zʋɩf-rãmbã mam lebga wa Zʋɩf sẽn na yɩl n paam Zʋɩf-rãmbã. Ne neb nins sẽn tũud tõogã, mam lebga wa ned sẽn tũud tõogã, baa mam mengã sẽn pa tũud tõogã, sẽn na yɩl n paam sẽn tũud-b tõogã.
21 Ne neb nins sẽn pa tũud tõogã, mam lebga wa ned sẽn pa tũud tõogã, baa mam sẽn tũud Wẽnnaam tõogã, la m sakd Kirist tõogã, sẽn na yɩl n paam sẽn pa tũud-b tõogã.
22 Ne neb nins sẽn ka pãngã, mam lebga ned sẽn ka pãnga, sẽn na yɩl n paam sẽn ka-b pãngã. Mam lebga bũmb fãa neb buud fãa yĩnga, sẽn na yɩl n maan m sẽn tõe fãa n fãag neb kẽere.
23 La mam maanda bũmb fãa koe-noogã yĩnga, sẽn na yɩl n taas-a neb a taabã.
24 Yãmb pa mi tɩ zoees sasa, yaa zoɛtbã fãa n zoete, la tɩ yaa nin-yend bal n paamd keoorã la? Bɩ y modg tɩ y sẽn zoet to-to wã kɩt tɩ y wa paam keoorã.
25 La ned ning fãa sẽn kẽ wags-taab pʋgẽ yõkda a meng bũmb fãa pʋgẽ. Yaa sɩd tɩ b maanda rẽ sẽn na yɩl n paam maanf sẽn tõe n sãame, la tõnd maanda rẽ n na n paam maanf sẽn pa sãamde.
26 Rẽ n so tɩ mam sẽn zoet to-to wã pa yaar ye. Mam sẽn pãbd nug-gil to-to wã, yaa sẽn na yɩl n da wa pãb pemsmã ye.
27 La mam pãbda* m yĩngã, la m kɩtdẽ t’a lebgd mam yamba, sẽn na yɩl tɩ m sẽn taas neb a taabã koɛɛgã, bɩ mam mengã ra wa yɩ ned sẽn pa tat Wẽnnaam yam ye.
Vẽnegr toor-toore
^ Gɛrk, “noore.”
^ Bɩ, “pag sẽn yaa tẽeda.”
^ B sẽn boond me t’a Pɩyɛɛrã.
^ Gɛrk, “noore.”
^ Bɩ, “sore.”
^ Bɩ, “sɩbge, kibl sõma.”
