1 Korẽnt rãmb 6:1-20
6 Yãmb nin-yend sã n tar yell ne a to, a na saag n kẽng bʋʋd neb sẽn pa tẽedb nengẽ, n pa kẽng nin-sõamyã wã nengẽ sɩda?
2 Bɩ yãmb pa mi tɩ nin-sõamyã wã na n kaoo dũniyã bʋʋdo? La sã n mikame tɩ yãmb n na n kao dũniyã bʋʋdo, yãmb pa tõe n welg yɛl nins sẽn pa zem baa fʋɩ wã sɩda?
3 Yãmb pa mi tɩ tõnd na n kaoo malɛgs bʋʋd la? Sã n yaa woto, bõe tɩ tõnd pa tõe n welg vɩ-kãngã yɛlã?
4 La yãmb sã n tar vɩ-kãngã yɛl n segd n welge, yãmb na kẽng rap tigingã neb sẽn pa nand nengẽ tɩ b kao y bʋʋd sɩda?
5 Mam gomdame n na n kɩt tɩ yãnd yõk-yã. Ned sẽn tar yam baa a ye pa be yãmb sʋk n tõe n kao bʋʋd a saam-biisã sʋk la?
6 Saam-biis yaool n tallda taab n kẽnd bʋʋdo, tɩ neb sẽn pa tẽedb kaood b bʋʋdã!
7 Yãmb sã n tall y saam-biig n kẽng bʋʋdo, y ningda y mens yãnde. Yãmb saam-biig sã n maan-y bũmb sẽn pa zemse, bõe yĩng tɩ y pa na n sak bõne? Bõe yĩng tɩ y pa na n bas tɩ b wẽg-yã?
8 Yãmb yaool n maanda y saam-biisã bũmb sẽn pa zemse, la y wẽgd-ba!
9 Yãmb pa mi tɩ tʋʋm-wẽns-maandbã pa na n paam Wẽnnaam Rĩungã la? Da belg-y y mens ye. Sẽn tʋmd-b raglem tʋʋma,* bõn-naands pʋʋsdba, yoaadba, rap sẽn sakd tɩ rap gãe-ba, rap sẽn gãe rapa,
10 wagda, rat-tɩ-loog rãmba, rã-yũud-kãase, nin-tʋʋsdba,* la fãadba pa na n paam Wẽnnaam Rĩungã ye.
11 Yãmb neb kẽer yaool n da yaa woto. La Wẽnnaam peka yãmb tɩ y lebg yɩlma. B kɩtame tɩ y lebg sõamyã, la b yeel tɩ y yaa tɩrs tõnd Zu-soab a Zeezi Kirist yʋʋrã yĩnga, la ne Wẽnnaam vʋʋsem sõngã maasem.
12 Mam tara sor n tõe n maan bũmb fãa, la pa bũmb fãa n be nafr ye. Mam tara sor n tõe n maan bũmb fãa, la mam pa na n bas tɩ baa fʋɩ soog maam ye.
13 Rɩɩb bee pʋg yĩnga, tɩ pʋg me be rɩɩb yĩnga. La Wẽnnaam na n wa kɩtame tɩ b yiibã fãa lebg zaalem. Yĩngã pa yoob* yĩng ye. A yaa Zu-soabã yĩnga, tɩ Zu-soabã yaa yĩngã yĩnga.
14 La Wẽnnaam vʋʋga Zu-soabã, la b na n vʋʋga tõnd me n yiis kũ-rãmb sʋk b pãngã maasem yĩnga.
15 Yãmb pa mi tɩ yãmb yĩnsã yaa Kirist yĩngã wil la? Woto wã, mam segd n talla Kirist yĩngã wil n tɩ kɩt tɩ b lebg pʋg-yoodr yĩng wil sɩda? Lae-lae!
16 Yãmb pa mi tɩ ned ning fãa sẽn lagem ne pʋg-yoodr yaa yĩng a yembr ne-a la? Bala Wẽnnaam yeelame: “B yiibã na n yɩɩ yĩng a yembre.”
17 La ned ning fãa sẽn naag Zu-soabã yaa yembr ne bãmba, n tar b yamã buudu.
18 Zoe-y yoobo!* Yel-wẽn a taabã ned sẽn tõe n maan pa be a yĩngã pʋgẽ ye. La ned ning fãa sẽn yood beegda a meng yĩngã.
19 Yãmb pa mi tɩ yãmb yĩngã yaa vʋʋsem sõngã Wẽnnaam sẽn kõ yãmb tɩ be yãmb pʋsẽ wã roog la? Sẽn paase, yãmb pa so y mens ye.
20 Bala Wẽnnaam kõo bũmb sẽn tar yõod wʋsg n fãag yãmba. Rẽnd y segd n talla y yĩnsã n pẽg Wẽnnaam.
Vẽnegr toor-toore
^ Ges-y gom-biis võor bilgrã zĩigẽ: “Yoobo.”
^ Bɩ, “neb sẽn gomd gom-põaasa.”
^ Gɛrk, porneya. Ges-y gom-biis võor bilgrã zĩigẽ.
^ Gɛrk, porneya. Ges-y gom-biis võor bilgrã zĩigẽ.
