1 Korẽnt rãmb 2:1-16
2 M saam-biisi, rẽ n so tɩ mam sẽn wa n na n wa yãmb nengẽ wã, m pa wa ne gom-minim wall ne yam goam n na n togs yãmb Wẽnnaam yel-soalgdg sẽn yaa sõngã ye.
2 Bala mam sẽn wa n be yãmb sʋkã, m yãka yam n pa na n gom bũmb a to yell tɩ sã n pa a Zeezi Kirist yelle, la b sẽn kʋ bãmb ra-luk zugã yell ye.
3 La mam waa yãmb nengẽ ne pãn-komsem, ne rabeem la ne rigb wʋsgo.
4 Mam sã n da gomd wall m sã n da zãmsd nebã, m da pa gomd gom-nood nins yam dãmbã sẽn gomdã ye. La mam goamã ra wilgda vʋʋsem sõngã pãnga,
5 sẽn na yɩl tɩ yãmb tẽebã tik Wẽnnaam pãngã zugu, la a ra tik ninsaalb yam zug ye.
6 Tõnd gomda yam goam neb nins sẽn bɩ wã sʋka. La pa dũni-kãngã* yam, wall dũni-kãngã nanambsã sẽn na n sãam ka la bilfã yam ye.
7 La tõnd gomda yel-soalgdg sẽn yaa sõngã yelle, rat n yeel tɩ Wẽnnaam yam sẽn solgã yelle. Sẽn deng dũni-kãngã, Wẽnnaam yãka yam n na n tʋm tɩ zems yam-kãng sẽn na yɩl tɩ tõnd paam ziiri.
8 Yaa yam-kãng la dũni-kãngã* nanambsã baa a ye sẽn pa bãngã. Bala b sã n da bãng-a, b ra pa na n kʋ* Zu-soab ning sẽn tar ziirã ye.
9 La yaa wa sẽn gʋlsã bal kɛpɩ: “Bũmb nins Wẽnnaam sẽn segl sẽn nong-b bãmbã yĩngã, nifr nan pa yã bõn-kãense, tʋbr nan pa wʋme, la ned baa a ye nan pa tags b yell ye.”
10 Yaa tõnd la Wẽnnaam tũnug ne b vʋʋsem sõngã n vẽneg bõn-kãense. Bala, vʋʋsem sõngã feesda bũmb fãa, baa Wẽnnaam yel-zulumsã menga.
11 Ninsaalbã sʋka, ãnda n tõe n bãng bũmb ning sẽn be ned a to yamẽ? Yaa nedã bal n mi bũmb ning sẽn be a yamẽ. Woto me, ned baa a ye pa mi bũmb ning sẽn be Wẽnnaam yamẽ, tɩ sã n pa Wẽnnaam vʋʋsem sõngã bal ye.
12 La tõnd pa reeg dũniyã yamã ye. D reega vʋʋsem sõngã sẽn yit Wẽnnaam nengẽ wã, sẽn na yɩl tɩ d tõog n bãng bũmb nins Wẽnnaam sẽn kõ tõnd ne yamleoogã.
13 Tõnd gomda bõn-kãens me yelle, la pa ne goam ninsaal sẽn yaa yam soab sẽn zãms tõnd ye. La yaa ne goam vʋʋsem sõngã sẽn zãms tõndo. D maanda rẽ, d sã n wa tũnugd ne goam sẽn yit vʋʋsem sõngã nengẽ n bilgd bũmb toor-toor Wẽnnaam zugu.
14 La ned ning sẽn vɩ a mengã ratem yĩngã pa reegd* bũmb nins Wẽnnaam vʋʋsem sõngã sẽn vẽnegdã ye. Bala b yaa yalemd ne-a. A pa tõe n bãng bõn-kãense, bala yaa tɩlɛ tɩ ned paam Wẽnnaam vʋʋsem sõngã sõngr n tõog n fees-ba.
15 La ned ning fãa Wẽnnaam vʋʋsem sõngã sẽn wilgd sor feesda bũmb fãa, la ned baa a ye pa feesd yẽ ye.
16 Bala, “ãnda n tõog n bãng a Zeova* yamã, n na n zãms-ba?” La tõnd tara Kiristã yamã buudu.
Vẽnegr toor-toore
^ Ges-y gom-biis võor bilgrã zĩigẽ.
^ Ges-y gom-biis võor bilgrã zĩigẽ.
^ Bɩ, “kʋ ra-luk zugu!”
^ Bɩ, “sakd.”
^ Ges-y gom-biis võor bilgrã zĩigẽ.
