1 Korẽnt rãmb 12:1-31
12 La sã n yaa ne kũun nins Wẽnnaam sẽn kõtã wɛɛngẽ, m saam-biisi, mam pa rat tɩ yãmb be zɩɩlem pʋgẽ ye.
2 Yãmb miime tɩ yãmb sẽn da wa n yaa bu-zẽms nebã,* b ra belga yãmb tɩ y ra pʋʋsd bõn-naandsã sẽn pa tõe n gomã tɩ yaa wa b tɛta yãmba.
3 La mam datame tɩ yãmb bãng tɩ ned baa a ye pa tõe n gom ne Wẽnnaam vʋʋsem sõngã maasem n yeele: “Kãab-wẽng bee a Zeezi zugu!” la tɩ ned baa a ye pa tõe n yeele: “A Zeezi yaa Zu-soaba!” tɩ pa ne vʋʋsem sõngã maasem ye.
4 Kũun toɛy-toɛy n be, la yaa vʋʋsem sõng yɛng n be.
5 Tʋʋm toɛy-toɛy n be neb a taabã sõngr yĩnga, la yaa Zu-soben-yɛng n be.
6 Vʋʋsem sõngã kɩtdame tɩ nebã maand bũmb toɛy-toɛya, la yaa Wẽnnaam-yɛngã n tũnugd ne nebã n maand bõn-kãense.
7 La vʋʋsem sõngã sõngr yaa vẽeneg ned kam fãa pʋgẽ, la Wẽnnaam kõta vʋʋsem sõngã nebã fãa nafr yĩnga.
8 Bala b kõta yãoã soab tõog t’a tõe n gom ne yam vʋʋsem sõngã maasem yĩnga, la b kõt a to wã tõog t’a tõe n gom ne bãngr vʋʋsem sõng yɛngã maasem yĩnga.
9 B kõta nina tẽeb vʋʋsem sõng yɛngã maasem yĩnga, la b kõt a to wã tõog t’a tõe n sãoog bãad-dãmb vʋʋsem sõng kãng maasem yĩnga.
10 B kõta yãoã soab tõog t’a maand yel-soalma, n kõt a to wã tõog t’a togsd bãngr-goama, n kõt nina tõog t’a tõe n bãng gomd sã n yita Wẽnnaam nengẽ. B kõta yãoã soab tõog t’a tõe n gom buud-goam toɛy-toɛya, la b kõt a to wã tõog t’a tõe n kelg buud-goam toɛy-toɛy n wilg b võore.
11 La yaa vʋʋsem sõng yɛngã bal n kõt tõ-kãensã fãa. A pʋɩt-b-la ned kam fãa wa a mengã sẽn datã bal kɛpɩ.
12 Bala yĩng tara wil wʋsgo. La baa a sẽn tar wil wʋsgã, yaa yĩng a ye bala. Yaa woto me ne Kiristã.
13 Yaa vʋʋsem sõng a yembr maasem yĩng la b lis tõnd fãa yĩng a yembr pʋgẽ, sẽn yaa-b Zʋɩf-rãmb wall Gɛrk-rãmbã, sẽn yaa-b yembs wall burkĩmbã,* la b kɩtame tɩ tõnd fãa yũ vʋʋsem sõng yɛnga.
14 Sɩd me, yĩngã pa will a yembr ye. Yaa wil wʋsgo.
15 Naoor sã n yeele: “Mam sẽn pa nugã yĩnga, mam pa naag yĩngã,” rẽ pa kɩtd t’a pa naag yĩngã ye.
16 La tʋbr sã n yeele: “Mam sẽn pa nifã yĩnga, mam pa naag yĩngã,” rẽ pa kɩtd t’a pa naag yĩngã ye.
17 Yĩngã tõr sã n da yaẽ-la nifu, tʋbr ra na n zĩndẽ-la yɛ? A tõrã sã n da yaẽ-la tʋbre, yõor da na n zĩndẽ-la yɛ?
18 La Wẽnnaam ninga yĩngã will fãa zĩig ning sẽn noom bãmbã kɛpɩ.
19 Yĩngã wil fãa sã n da yaẽ-la wil-yɛnga, yĩngã ra na n zĩndẽ-la yɛ?
20 La yĩngã wil yaa wʋsgo, tɩ yaool n yaa yĩng a yembre.
21 Nifr pa tõe n yeel nug yaa: “Mam pa rat fo sõngr ye.” La zug me pa tõe n yeel nao yaa: “Mam pa rat yãmb sõngr ye.”
22 Ayo. Yĩngã wil nins sẽn wõnd b pa tar pãngã tara yõodo,
23 la yĩngã wil nins tõnd sẽn get tɩ b ziirã pa ta b taabã, tõnd kɩtdame tɩ b paamd ziir n yɩɩda. Woto, tõnd yĩngã wil nins sẽn pa be rasãndã paamdame tɩ b get b yell sõma.
24 La tõnd yĩngã wil nins sẽn be rasãndã pa baood bũmb ye. Baasgo, Wẽnnaam naana yĩngã woto, n kõ yĩngã wil nins sẽn pa tar ziirã ziir-kãsenga,
25 sẽn na yɩl tɩ welgr da zĩnd yĩngã pʋgẽ, la tɩ yĩngã wil tõe n ges taab yelle.
26 Yĩngã will a yembr sã n namsdẽ, wilã fãa naagd-a lame n namsdẽ. Yĩngã will a yembr sã n paam ziiri, wil a taabã fãa naagd-a lame n kɩdem sũ-noogo.
27 La yãmb yaa Kiristã yĩngã, tɩ y ned kam fãa yaa b yĩngã willi.
28 La Wẽnnaam yãka neb tigingã pʋgẽ n kõ-b tʋʋm toor-toore: Pipi yaa tʋm-tʋmdba, yiib-n-soab yaa no-rɛɛsdba, tãab-n-soab yaa karen-saam-dãmba. Rẽ poore, yaa neb sẽn maand yel-soalma, neb sẽn paam tõog n tõe n sãoog bãad-dãmba, neb sẽn sõngd b taaba, neb sẽn tar minim n tõe n lʋɩ taoore, la neb sẽn gomd buud-goam toɛy-toɛya.
29 Pa nebã fãa n yaa tʋm-tʋmdb ye. Bɩ bõe? Pa b fãa n yaa no-rɛɛsdb ye. Bɩ bõe? Pa b fãa n yaa karen-saam-dãmb ye. Bɩ bõe? Pa b fãa n maand yel-soalem ye. Bɩ bõe?
30 Pa b fãa n paam tõog n tõe n sãoog bãad-dãmb ye. Bɩ bõe? Pa b fãa n gomd buud-gom-zẽn ye. Bɩ bõe? Pa b fãa n tõe n kelg buud-goam toɛy-toɛy n wilg b võor ye. Bɩ bõe?
31 La bɩ y kell n mao n bao* kũun nins sẽn yaa kãsems n yɩɩdã. Mam na n wilga yãmb bũmb ning sẽn yaa sõma n yɩɩd a taabã hal zĩig sẽn zãre.
Vẽnegr toor-toore
^ Rat n yeel tɩ neb nins sẽn pa tẽedbã.
^ Rat n yeel tɩ neb sẽn pa yembse.
^ Bɩ, “kell n bao ne yẽesem.”
