Biiblã pʋgẽ, yaa Ebre gom-bil ning sẽn yaa nefɛs la Gɛrk gom-bil ning sẽn yaa psikɛ wã la b lebg tɩ “sɩɩgã.” Ebre gom-bilã võor yaa “bõn-naandg sẽn vʋʋsde,” tɩ Gɛrk gom-bilã võor yaa “nin-vɩɩga.” a Dẽnd sɩɩgã yaa bõn-naandgã tõre. Pa bũmb sẽn be a pʋgẽ n ket n vɩ a soabã kaalem poor ye. D ges Biiblã sẽn wilgd to-to tɩ sɩɩgã yaa ninsaalã tõrã:

•   Wẽnnaam sẽn naan a Ãdem sẽn yɩ pipi ninsaalã poore, Biiblã yeelame tɩ “ninsaal lebga sɩ-vɩɩga.” (Sɩngre 2:7, La Bible du roi Jacques) B pa kõ a Ãdem sɩɩg ye. A lebga sɩ-vɩɩga, bɩ neda.

•   Biiblã yetame tɩ sɩɩgã tõe n tʋmame, tɩ kom tõe n yõk-a lame, t’a tõe n dɩɩme, n sak noyã la a sɩɩs kũum. (Maan-kʋʋre 5:2; 7:20; 23:30; Tõodo 12:20; Rom dãmbã 13:1) Yaa nedã tõrã n tõe n maan bõn-kãensã.

Sɩɩgã yaa bũmb sẽn pa kiid bɩ?

 Ayo. Sɩɩgã kiidame. Biiblã vɛrse-rãmb n wilgd tɩ sɩɩgã kiidame. Ad makr a wãna:

•   “Sɩɩg ning sẽn maand yel-wẽna, yaa sɩ-kãng n na n ki.”—Ezekɩyɛll 18:4, 20, La Bible du roi Jacques.

•   Pĩnd wẽndẽ wã, Israyɛll ned sã n da maan yel-wẽn-kãsems kẽere, b ‘ra segd n yiisa a sɩɩgã’ Israyɛll nebã sʋka. (Yikri 12:15, 19; Maan-kʋʋre 7:20, 21, 27; 19:8, La Bible du roi Jacques) B ra segd n “kʋʋ” a soabã.—Yikri 31:14, La Bible du roi Jacques.

•   Biiblã vɛrse kẽer pʋsẽ, b goma sɩɩg kũum yelle, tɩ yaa nedã kũum yell la b gomda. (Maan-kʋʋre 21:11, notã; Sõdbo 6:6, notã) Baa Biibl-dãmb wʋsg pʋsẽ b sẽn ning tɩ “kũum” wall “ned sẽn ki” wã, Biiblã babg ning b sẽn da gʋls ne Ebre wã pʋgẽ, yaa gom-bil ning sẽn yaa nefɛs bɩ “sɩɩgã” n be be.

“Sɩɩg” tõe n dat n yeelame tɩ “vɩɩm”

 Biiblã mi n gomda “sɩɩg” yelle, tɩ yaa “vɩɩm” yell la a gomda. Wala makre, Zoob 33:22 pʋgẽ, b ninga Ebre gom-bil ning sẽn yaa “sɩɩgã” (nefɛs) ne “vɩɩmã,” tɩ b yiibã fãa võor yaa a yembre. Biiblã wilgdame me tɩ ned sɩɩg bɩ a vɩɩm tõe n bee yell pʋgẽ, pa rẽ bɩ a tõe n bõna a sɩɩgã wall a vɩɩmã.—Yikri 4:19; Bʋ-kaoodb.ã 9:17; Filip rãmbã 2:30.

 B sẽn lebg Ebre gom-bil ning sẽn yaa “sɩɩgã” woto wã sõngda tõnd tɩ d wʋm vɛrse kẽer võore. Vɛrse-kãens pʋsẽ, b gomda “sɩɩg sẽn yit” wall sẽn “loogd” yelle. (Sɩngre 35:18; La Bible du roi Jacques) B sẽn yeel woto wã wilgdame t’a soabã ra rat n kiime. Biibl-dãmb kẽer pʋsẽ, b lebga Sɩngr 35:18 gom-kãensã t’a “pãngã sɛɛme.”—Sebr Sõngo.

Sɩnga wãn tɩ nebã wa tẽed tɩ sɩɩg pa kiidi?

 Yaa pĩnd wẽndẽ Gɛrkã filozof-rãmbã zãmsg n kɩt tɩ kiris-neb tũudum kẽer neb tẽed tɩ sɩɩg pa kiidã. Pa zãmsg sẽn yit Biiblã pʋgẽ ye. Sebr a yembr (Encyclopædia Britannica) pʋgẽ, b yetame yaa: “Zĩis nins Biiblã sẽn gomd sɩɩgã yellã, a gomda vʋʋsem yell me. Biiblã pa wilgd tɩ welgr n be sɩɩgã ne yĩngã sʋk ye. Yaa pĩnd wẽndẽ Gɛrk-rãmbã zãmsgã n kɩt tɩ kiris-nebã wa tẽed tɩ sɩɩgã ne yĩngã yaa toor-toore.”

 Wẽnnaam pa rat tɩ b kalem yẽ sẽn zãmsd nebã bũmb ninsã ne ninsaalb filozofi-rãmba, wala sɩɩg pa kiidã zãmsgã ye. Biiblã pʋd n keoogda tõnd n yetẽ: “Gũus-y y mens tɩ ned ra wa tũnug ne dũniyã bãngr la ne belgr gom-vɩɩd n kɩt tɩ y lebg yembs ye. Bõn-kãens zemsa ne ninsaalbã miningu, la b zems ne dũniyã bũmb toor-toorã, n pa zems ne Kiristã ye.”—Kolos rãmbã 2:8.