Yãk leoore

•  Fo sũurã mi n nong n yikdame bɩ?

  •  ayo

  •  wakat ninga

  •  daar fãa

•  F sũurã sã n puugi yaa wãn to?

  •  yaa bilfu

  •  yaa kãsenga

  •  tolg n yaa yelle

•  Fo sũurã mi n nong n yikda ne ãnda?

  •  ne f baaba bɩ ne f ma

  •  ne f kẽem bɩ ne f yao

  •  ne f zoa

 Fo sã n tagsd tɩ f segd n modgame n tõog f sũ-yikrã, sõs-kãngã na n sõnga foo. Bɩ d reng n ges bũmb ning yĩng sẽn kɩt tɩ tar yõodo, tɩ f tõog f sũurã baa b sã n wa baood f noore.

 Bõe yĩng tɩ tar yõod tɩ d gom rẽ yelle?

 Fo yĩnsã na tall laafɩ yĩnga. Yel-bũn 14:30 yetame yaa: “Sũur sẽn gãe bãan kõta yĩns laafɩ.” Sebr a ye sẽn gomd logtoeemdã la yĩnsã laafɩ wã yell meng yetame tɩ “sũ-yikrã tõe n waa ne sũur bãase.”

 Zoodã wɛɛngẽ. Biiblã yetame yaa: “Ra maan tũud-n-taar ne sũur soaba, wall f bao ned sũur sẽn yikd tao-tao zĩigẽ” ye. (Yel-bũnã 22:24) F sã n yaa ned sũur sẽn yikd tao-tao, nebã sã n pa baood f zĩiga pa segd n ling foo ye. Bi-bɩɩg a ye yʋʋr sẽn boond t’a Jasmine yeelame yaa: “Fo sã n pa zãms n tõogd f menga, fo pa na n paam zo-rãmb sẽn na n sõng foo tɩ f bɩɩs zʋg-sõma ye.”

 Fo yʋʋrã yĩnga. A Ethan sẽn tar yʋʋm 17 yeelame yaa: “Fo sũurã sã n nong n yikdẽ, nebã fãa na n wa bãnga f yellã, tɩ f yʋʋrã sãame.” Rẽ wã sok f meng yaa: “M datame tɩ nebã yã tɩ mam yaa ned sẽn baood laafɩ bɩ, bɩ ned sũur sẽn yikd tao-tao?” Biiblã yetame yaa: “Ned ning sũur sẽn pa yikd tao-tao tara yam-vẽenem wʋsgo, la sẽn pa tar-a sũ-mar vẽnegda a yalemdo.”—Yel-bũnã 14:29.

 Bõe la f tõe n maane?

 Karem vɛrse-rãmbã ne bũmb nins kom-bɩɩs kẽer sẽn yeelã, la f sok f meng sogsg nins sẽn pʋgdã:

•   Yel-bũnã 29:22: “Sũur soab wata ne zaba. Ned sũur sẽn yikd tao-tao beegda naoor wʋsgo.”

   “M sẽn wa n yaa bi-bɩɩgã, Ra yaa toog ne maam tɩ m tõog m sũurã. M baaba buudã neb me yaa woto. D ra yetame tɩ bee d zɩɩme wã. Rẽnd ra yaa toog tɩ d tõog d menga.”—A Kerri.

   Mam sũurã wae n yikda tao-tao bɩ? Rẽ yĩnga zemsame tɩ m tags tɩ m tõe n bɩɩsa zʋ-sõma, n yaool n yetẽ tɩ m doga ne m zʋg-wẽnsã n pa tõe n toeeme?

•   Yel-bũnã 15:1: “Ned sã n leok ne bʋgsem, sigsda sũuri, la gom-kãs yikda sũuri.”

   “Tara yõod tɩ d modg n tõogd d menga. F sã n modg n yɩ ned sẽn bʋgsa, la sẽn tagsd tɩ zemse, f na n mikame tɩ f sũurã pa na n yikd tao-tao ye.”—A Daryl.

   B sã n wa bao m noore, bõe yĩng tɩ mam sẽn na n tall manesem ning zĩig pʋgẽ wã tar yõodo?

•   Yel-bũnã 26:20: “Raad sẽn kae zĩig ningã, bugum kiidame. Munaafɩɩk me sẽn kae zĩig ningã, zabr satame.”

   “B sã n wa bao m noore, m gũus n gesame tɩ m sã n leok ne bʋgsem, ned a to wã me sũur maagdame tɩ d yiibã fãa tõog n gom tɩ yellã pa zẽn ye.”—A Jasmine.

   Wãn to la m no-goamã wall m tʋʋm-tʋmdɩ wã tõe n zẽn yɛlã?

•   Yel-bũnã 22:3: “Gũus-m-meng soab yãta yell n solge, la sẽn pa tar-b minimã kelld n kẽngame, n bao yell n kõ b mense.”

   “Wakat ninga m segd n kʋʋga sõsgã n looge, tɩ m sũurã sã n wa sig bɩ m lebg n wa weleg yellã.”—A Gary.

   Wakat-bʋg la f tõe n kʋʋg sõsgã ne waoogre, tɩ f to wã ra getẽ tɩ f paoog-a lame?

•   Zak 3:2: “Tõnd fãa tudgda naoor wʋsgo.”

   “D sã n tudgi, d segd n maana d bãngẽ, la pa rẽ bal ye. D segd n dɩka yam d kongrã pʋgẽ, n modg n da le maan a buud ye.”—A Kerri.

 Saglga: Y tõe n yãka yam n na n modg n tõog y menga, wala makre kiuug a ye pʋgẽ. Ges-y y sã n tõog n maana rẽ, la y sẽn tõe n modg n paas to-to.