Olupe wihina wone muselu dhilimo

Olupele muselu wogwaddela

 OHUDHERA 10

Onanone addi webedha weebaribari?

Onanone addi webedha weebaribari?

1. Oliwo webedha weebaribari wimodha bahi?

“Pole-pole ni anamavuhulela owoota”.—MATEUS 7:15.

Yesu aahudhihe webedha wimodha anamaharaye: webedha weebaribari. Webedha wula wiliganihiwe ninga dila enathukulela wigumini. Yesu awogile egihina: “Athu vang’ono binafwanya.” (Mateus 7:14) Mulugu anarumedha webedha winadhela Mmadhuni mwaye eebaribari. Anamwebedha atene eebaribari bowiwanana ni enna nroromelo nimodhave.​—Omwileri João 4:23, 24; 14:6; Efésios 4:4, 5.

2. Yesu awogile ddi wodhela makiristawu owoota?

“Aliwa enowooga vathaddo wihina ehimunona Mulugu, mbwenye enomukodda wodhela dhoweradhiwa”.—TITO 1:16.

Yesu ohunixagiha wodhela anamavuhulela owoota enavunganyedha okiristawu. Wawonaga enakala ninga anamwebedha eebaribari. Aliwa enowoga wi dhigereja dhewa sekiristawu. Mbwenye sokweya wawona wi aliwa kahi makiristawu eebaribari. Mwahaya? Mwaha webedha weebaribari onowawima makiristawu apama enatonyihedha dhikalelo dhapama ni mweddelo wapama onooniwa naathu atene.​—Omwileri Mateus 7:13-23.

3. Nnaanone addi anamwebedha eebaribari?

Kaasugwe makalelo ala matanu:

  • Anamwebedha eebaribari enoomuriha Bibliya ninga Madhu a Mulugu. Aliwa enowilibihedha okalawo yiwelelaga malagano a mBibliyani. Mowindo webedha weebaribari fohiyana ni webedha onadhela mmubuweloni mwaathu. (Mateus 15:7-9) Anamwebedha eebaribari enowerana yele enalaleyiwa.​—Omwileri João 17:17; 2 Timóteo 3:16, 17.

  •   Anamahara eebaribari a Yesu enothithimiha ndina na Mulugu, Jeova. Yesu ohuthithimiha ndina na Mulugu wodhela wanoniha athu. Oliye uhakavihera athu omunona Mulugu ni uhahudhiha olobela wihina ndina na Mulugu ntxenihiwe. (Mateus 6:9) Murudda onakaliwe, athu baani enavuwiha ndina na Mulugu?​—Omwileri João 17:26; Romanos 10:13, 14.

  • Makiristawu eebaribari enolaleya Omwene wa Mulugu. Mulugu ohumuruma Yesu odha olaleya muthenga dhapama dha Omwene. Omwene wa Mulugu bahi bunamarihe makathamiho aathu. Yesu ohulaleya Omwene ola ofiyedha omakwelo waye. (Lucas 4:43; 8:1; 23:42, 43) Oliye ohuwoga wihina anamaharaye yere olaleyela Omwene. Muthu afiya vadevawo adhelaga owoga Omwene wa Mulugu, we onubuwele wi muthuyo namwebedha awuvi?​—Omwileri Mateus 24:14.

  • Anamahara a Yesu kinakosa epaddi yeelabwela yabure. Onere wanona ni mwaha wowawona aliwa ehivolowelaga mwaha dha pulitika, okangana ni owanela dhithu dhelabo. (João 17:16; 18:36) Kahiyo eyenove bahi. Aliwa kinatajhiha dhowera ni mweddelo wabure welabweela.​—Omwileri Tiago 4:4.

  • Makiristawu eebaribari enowoneya wodhela odhivela enniwana mmodha ni mukwaye. Aliwa ehihudhera Mmadhuni a Mulugu waariha athu atene. Dhigereja dhowoota malabo owinjhivene enokavihera koddo dheelabo, mbwenye anamwebedha eebaribari enokodda okavihera koddo. (Miqueias 4:1-3) Makiristawu eebaribari enolabihedha mudhidhiwa ni dhokalanadhiwa ni murima wihina yakavihere ni yalibihe athu amodha.​—Omwileri João 13:34, 35; 1 João 4:20.

4. Uhanda onona webedha weebaribari?

Webedha fuvi winna dhohudhiha dhewa dhatedhene dhinadhela mBibliyani, enathithimiha ndina na Mulugu ni enalaleya Omwene wa Mulugu bahi ninga ejhehedhelo nowamariha makathamiho aathu? Nikuru baani naathu nnatonyihedha odhivela ni ehinavolowa mukoddoni? Onubuwela wihina baani?​—Omwileri 1 João 3:10-12.