Olupe wihina wone muselu dhilimo

Olupele muselu wogwaddela

 OHUDHERA 3

Muthenga dhapama ndha dhinadhela wa Mulugu?

Muthenga dhapama ndha dhinadhela wa Mulugu?

1. Mwinya a Bibliya baani?

Muthenga wapama onawoga wihina athu enere okanna egumi yamukalakala oli mBibliyani. (Salmo 37:29) Mbibliyani ehikalamo malivuru mang’onong’ono owakwana 66. Mulugu aasakule alobwana 40 ororomeleya wi emulebe Bibliya. Malivuru matanu ooroma elebiwe ni Moses. Okuma mudhidhi oyeno ofiyedha peno dhihivira yaka 3500. Livuru nogomihedha nilebiwe ni murumiwi Juwawu. Ofiyedha peno dhihivira yaka 1900. Mbibliyani dhilimo dhubuwelo dhawani? Mulugu era owoga ni anamaleba Bibliya wodhela muzimu wotxena. (2 Samuel 23:2) Aliwa kilebile dhubuwelo dhewa, mbwenye elebile dhubuwelo dha Mulugu. Bumwahaya Jeova akala mwinya a Bibliya.​—Omwileri 2 Timóteo 3:16; 2 Pedro 1:20, 21.

2. Nnaroromele addi wihina Bibliya onowoga ebaribari?

Nnororomela wihina Bibliya da Mulugu mwahaya aapaganyaga dhosogolo kanang’anyedha ni anowoga dhatedhene dhinaapadduwe. Kawo muthu ananda werana dhendho. (Josué 23:14) Mulugu Akopolo Dhatedhene bahi dinawedha opaganya nuhang’anyedha osogolo wathu.​—Omwileri Isaías 42:9; 46:10.

Bibliya kanaligana ni livuru nimodha mwaha livuru na Mulugu. Ehigawiwa a Bibliya matxikwi ni matxikwi ni dhiwogelo gwe. Naari agaarive awale, Bibliya onowiwanana dhawogiwaga muselu dha siyensiya. Kahiyo eyenove bahi. Anamaleba ala 40 kivanyihane mmodha ni mukwe. * MBibliyani mwihilebiwa odhivela Mulugu anniyena ni iyo. Bibliya ohukanna kopolo yosaddula egumi dhaathu wihina  ekale yapama. Mwaha wa eyo enowathukulela athu owinjhivene ororomela wihina Bibliya Madhu a Mulugu.​—Omwileri 1 Tessalonicenses 2:13.

3. Bibliya anawoga muselu baani?

Bibliya anathabwa owoga muthenga dhapama dhiniwanana ni efunelo yodhivela ya Mulugu anniyena naathu. Dholebela dhinowoga makalelo baani mulobwana oobajha ayeleliye ofuru wookala mparayizu mwilaboni ya vati omaambelelo wa thalako yaathu. Bibliya anowoga makalelo parayizu anadhiye ahogolosiwe.​—Omwileri Apocalipse 21:4, 5.

Madhu a Mulugu ehikanna malamulo, malagano ni dholaga. Kahi eyenove bahi. Bibliya anowoga makalelo Mulugu anaweddihiye athu. Eyo enanihudhiha emuthu ya Mulugu. Mowindo, Bibliya anere wukavihera omunona Mulugu ni wandana nuliye.Omwileri Salmo 19:7, 11; Tiago 2:23; 4:8.

4. Onande addi omwiwelelamo Bibliya?

Buruxura nna nnere wukavihera omwiwelelamo Bibliya otajhihaga mweddelo mmodhave wa Yesu. Oliye oowoga dholebela ni owawaddela “yotapulela ya Dholebela”.​—Omwileri Lucas 24:27, 45.

Muthenga dhapama dhinadhela wa Mulugu dhinothukula murima opitha dhithu dhimodha. Naari dhigarive ndo, athu amodha enookodda ni amodhaya enonyoza. Mbwenye kuwukuwe. Ejhehedhelo yawo yowakela egumi yohimala enadhela mwaha omunona Mulugu.​—Omwileri João 17:3.

 

^ paragarafu 3 Osugwe livuru A Bíblia – Palavra de Deus ou de Homem?