Olupe wihina wone muselu dhilimo

Olupele muselu wogwaddela

 OHUDHERA 2

Mulugu baani?

Mulugu baani?

1. Mwahaya bwaddi nnafunihu nimwebedhege Mulugu?

Mulugu eebaribari duule apaddusile dhithu dhatedhene. Oliye kanna omaromo nee kanna omakuthulo. (Salmo 90:2) Oliye di Ntxela na muthenga dhapama dhili mBibliyani. (1 Timóteo 1:11) Nimwebedhege Mulugu bahi mwaha dinipaddusile.​—Omwileri Apocalipse 4:11.

2. Mulugu dowi ddi?

Kawo muthu anabihaga omoona Mulugu mwahaya oliye Muzimu. Eyo enatapulela wihina egumi ya Mulugu sopitha egumi ya dhopaddusiwa dhili elabo ya vati. (João 1:18; 4:24) Naari dhigalive ndho, eli yowedheya omunona Mulugu wodhela dhithu apaddusiliye. Motajhiha: dhowima ni makupu ohiyana-hiyana enanihudhiha odhivela ni thotho ya Mulugu. Munnuwelo weelabo ela enanihudhiha kopolo ya Mulugu.​—Omwileri Romanos 1:20.

Kahiyo dhendhave, iyo podi ohudhera emuthu ya Mulugu wodhela omwileri Bibliya. Motajhiha: Bibliya anonaddela dhithu dhinamuhagalasa Mulugu ni dhithu dhinamutakalela. Bibliya ononihudhiha makalelo Mulugu anaweddihiye athu ni dhinawereliye yaapadduwela ethu sithu.​—Omwileri Salmo 103:7-10.

3. Mulugu ohukanna ndina?

Yesu ahiwoga egihina: “Babihu ali odhulu, ndina nenyu ntxenihiwe.” (Mateus 6:9) Mulugu ohukanna mathithimiho gwe, mbwenye anna ndina nimodha bahi. Kadda ewogelo enowoga ndina nna mwamakalelo ohiyana. Ni Emanyawa elemele owoga “Jeova”. Mbwenye athu amodha enawoga “Yehova”.​—Omwileri Salmo 83:18.

MaBibliya owinjhiva kinna ndina na Mulugu mwaha wi nihivenyihiwamo wekiwamo nthithimiho Nabuya obe Mulugu.  Mbwenye Bibliya alebiwaga, ndina na Mulugu nahikalamo okwaranya dila 7000. Yesu ahanoniha athu ndina na Mulugu mudhidhi aahudhihiye dha Mulugu.​—Omwileri João 17:26.

4. Jeova anonipwatha iyo?

Ninga babi ola oodhivela, Mulugu annana olaba wihina anivahe egumi yamukalakala

Goyi ni goyi nnonihu enatapulela wihina Jeova kananipwatha iyo? Athu amodha enawoga wi Mulugu anonitabusa wihina aneehe, mbwenye eyo kahiyo ebaribari.​—Omwileri Tiago 1:13.

Mulugu ohathithimiha athu mwaha wowavaha ofuru wosakula. Kunoonelamo wi sapama okanna ofuru wosakula omulabela Mulugu? (Josué 24:15) Mbwenye athu owinjhiva enasakula wawerela athu akwiwa dhithu dhabure. Bumwahaya ekalawo goyi gwe. Jeova onowukuwa oonaga dhithu dhohogowa ndha dhereyaga.​—Omwileri Gênesis 6:5, 6.

Jeova Mulugu ananipwatha iyo. Oliye anafuna wi nikanne egumi yohagalala. Vohilegela oliye anere omariha goyi vamodha naale enadhiha goyi. Dhigarive ndo oliye ohukalana mwaha wapama wowenya okalawo goyi mudhidhi vang’ono. Musolo wa 8, nnere onona mwahoyo buvi.​—Omwileri 2 Pedro 2:9; 3:7, 13.

5. Nnanfiyedhe Mulugu addi?

Jeova onoonithana onfiyedha oliye wodhela nlobelo. Mulugu onoonipwatha kadda muthu wa iyo. (Salmo 65:2; 145:18) Oliye anonilevelela. Mulugu anonoona nilibihedhaga omuhagalasa, naari niviriganihaga dila dhowinjhivadhene. Ebaribarene, eri yowandeya wandana ni onfiyedha Mulugu naari nihilogomane.​—Omwileri Salmo 103:12-14; Tiago 4:8.

Nimudhivelege Jeova opitha muthu ddi muthu mwaha dinipaddusile. (Marcos 12:30) Venvo ononihiwe odhivela wawo ni Mulugu wahudheraga wodhela oliye ni weragana ele anulobiye, onere onfiyedha pama oliye.​—Omwileri 1 Timóteo 2:4; 1 João 5:3.