Olupe wihina wone muselu dhilimo

Olupele muselu wogwaddela

 OHUDHERA 5

Mulugu apaddusele ddi elabo ya vati?

Mulugu apaddusele ddi elabo ya vati?

1. Mulugu apaddusele ddi elabo ya vati?

Jeova ohavaha athu atene elabo ya vati. Mulugu anipaddusele wihina nikalege veelaboni ya vati. Mowindo, anamatelana ooroma, Adawu ni Eva, kiyapadduseliwe okala odhulu. Mulugu ahapaddusa angero wihina ekalege odhulu. (Jó 38:4, 7) Mulugu ohumweka mulobwana ooroma mParayizu withaniwa mundda wa Ideni. (Génesis 2:15-17) Jeova ahinvaha Adawu vamodha ni anaye abalegiye oneeti wokala mParayizu veelaboni ya vati ni mukalakala.​—Omwileri Salmo 37:29; 115:16.

Omaambelelo, mundda wa Ideni wali parayizu. Anamatelana oobajha yere waabala aniwa edhale elabo ya vati. Yindo yerege wing’anela elabo yatene ya vati ni esaddule wihina ekale parayizu. (Génesis 1:28) Elabo kinadha egujhuliwa. Athu enere okala mwilaboni ya vati ni mukalakala.​—Omwileri Salmo 104:5.

2. Kivano mwahaya bwaddi elabo ehikala parayizu?

Adawu ni Eva kiyamwiwelele Mulugu. Bumwahaya Jeova adhe awigarege mmunddani mwa Ideni. Parayizu ohuyeleliwa ni kavo muthu ananda omuhogolosa. Bibliya anihina: “Elabo ya vati eli mmaddani mwaathu abure”.—Jó 9:24.​—Omwileri Génesis 3:23, 24.

Efunelo Jeova anniyena omaambelelo ohuhiya? Naari! Oliye da kopolo dhatedhene ni kayiwo enamurusa. (Isaías 45:18) Mulugu anere ohogolosa efunelwaye anniyena naathu ninga mwafuneliye.​—Omwileri Salmo 37:11, 34.

3. Parayizu anahogoloseliwe addi?

Parayizu anahogoloseliwe mwilaboni ya vati mumweneni mwa Yesu ninga Mwene asakuliwe ni Mulugu. Yesu anere wasogolela angero mukoddoni ya Armajedo. Aliwa enere  wagujhula atene yaale enamwidda Mulugu. Indo Yesu anere ommaga Sathana yaka 1000. Athu a Mulugu enere ovuluwa mwaha Yesu anere wasogolela ni anere wabarela. Baliweene enaajhevo egumi yamukalakala mParayizu, veelaboni ya vati.​—Omwileri Apocalipse 20:1-3; 21:3, 4.

4. Goyi enadha emale alini?

Fi alini Mulugu anadhiye amarihe obure veelaboni ya vati? Yesu ohuvaha yintelelo enatonyihedha wihina omagomo wihaddamela. Dhopadduwa dhovanene dhinereya mwilaboni ya vati dhinoothusa egumi ya athu. Dhopadduwa ndha dhinononiha wi nnakala “omakuthulo wa dhithu dhatedhene”.​—Omwileri Mateus 24:3, 7-14, 21, 22.

Mumweneni mwaye wa yaka 1000, Yesu anere omariha goyi yatene. (Isaías 9:6, 7; 11:9) Yesu anere olaba ninga Mwene odhulu vamodha ninga Namakutha Munddimuwa. Oliye anere odduguddela dhothega dhaale enamudhivela Mulugu. Modhela Yesu, Mulugu anere omariha oredda, wuluvala ni okwa.​—Omwileri Isaías 5:8; 33:24.

5. Baani anaakale mparayizu osogolo?

Munyumbani Dhomwene onere wanona athu enamudhivela Mulugu ni enafuna ohudhera makalelo omuhagalasa

Athu enaamwiwelele Mulugu enere okala mParayizu. (1 João 2:17) Yesu oharuma anamahudheraye wihina yasayele athu owiyeviha ni yahudhihe werana efunelo ya Mulugu. Mwapeno Jeova onna wasasanyedha matxikwi ni matxikwi aathu wihina ekalewo mParayizu osogolo mwilaboni ya vati. (Sofonias 2:3) Munyumbani Dhomwene dha Anamona a Jeova athu enohudhihiwa okala anamatela apama, anamateliwa apama, ababi apama ni amayi apama. Ahima enomwebedha Mulugu vamodha ni makolwiwa, vano atene enohudhera opurelamo muthenga dhapama dha Mulugu.​—Omwileri Miqueias 4:1-4.