Olupe wihina wone muselu dhilimo

Olupele muselu wogwaddela

 OHUDHERA 8

Mulugu aneenyela ddi okalawo obure ni goyi?

Mulugu aneenyela ddi okalawo obure ni goyi?

1. Obure wambele addi?

Mulugu onowenya wihina athu ethongege mudhidhi wowinjhivene wi anoonihe wihina aliwa kinanda omariha makathamiho aathu

Obure wambele veelaboni ya vati Sathana awogiliye yowoota yobajha. Vobajha oliye ari mungero oologomana, mbwenye “kalegele mwibaribarini”. (João 8:44) Oliye ahikalela nrima webedhiwa winfwanelele Mulugu. Sathana ohumuleketha mwihiyana oobajha, Eva, omutujela okala epaddi yaye ohiya omwiwelela Mulugu. Adawu ahitaganyihedha ni Eva ohimwiwelela Mulugu. Yowakela ya yosakula ya Adawu si goyi ni okwa.​—Omwileri Génesis 3:1-6, 19.

Mudhidhi Sathana amutujeliye Eva ohimwiwelela Mulugu, oliye eera obajha ohiwelela othonga wa Mulugu, obe omukodda Mulugu ninga Namadhuludhulu. Ninga Sathana, athu owinjhiva enookodda othongiwa ni Mulugu. Obajha venvo, Sathana ohukala “namathonga eelabo”.​—Omwileri João 14:30; 1 João 5:19.

2. Dhopaddusa dha Mulugu ehikala yaviriganilevo?

Dhopaddusa dhatedhene dha Mulugu sologomana. Angero ni athu Mulugu aapaddusiliye yahikanna owedha womwiwelela ni makalelo oologomana. (Deuteronómio 32:4, 5) Oliye ohunipaddusa ni ofuru wosakula werana yapama obe yabure. Ofuru wosakula wula ononihiya woniha odhivela wehu ni Mulugu.​—Omwileri Tiago 1:13-15; 1 João 5:3.

3. Mulugu aneenyela ddi okalawo goyi ofiyedha peno?

Jeova anowenya ohiweleliwa othonga waye mudhidhi wowinjhivene. Mwaha wa ddi? Mwaha anafuna anoonihe wihina ohithongiwa nuliye kunaakavihera athu. (Eclesiastes 7:29; 8:9) Dhigavirile  yaka 6000 dha thalako yaathu nihona wi eyo ebaribari. Anamathonga kinawedha omariha koddo, opanana, ohogowa ni oredda.​—Omwileri Jeremias 10:23; Romanos 9:17.

Vohiyana ni onamathonga waathu, onamathonga wa Mulugu onowakavihera ale enamurumela. (Isaías 48:17, 18) Vohilegela, Jeova anere odduguddela othonga watewene. Ale enasakula othongiwa nuliye binaahale veelaboni ya vati bahi. — Isaías 11:9.​—Omwileri Daniel 2:44.

4. Ovilela wa Mulugu onanivaha gari yowerana ddi?

Sathana awogile wihina kawo muthu anamulabela Jeova ni odhivela. Onofuna woniha wihina Sathana dowoota? Sowedheya! Ovilela wa Mulugu winonivaha ofuru wowoniha akala nili epaddi ya othonga wa Mulugu obe epaddi ya othonga waathu. Mweddelo wehu onere woniha yosakula yehu.​—Omwileri Jó 1:8-12; Provérbios 27:11.

5. Nnamusakule addi Mulugu ninga Namathonga ehu?

Dhosakula dhehu dhinowoniha wihina nnomusakula Mulugu ninga Namathonga ehu

Nnere omusakula Mulugu ninga Namathonga ehu wodhela osayela onona webedha webaribari onafwanyeya mBibliyani, ni ovirihamo nnahudherihu. (João 4:23) Nnere omukodda Sathana ninga namathonga nahivolosiha mpulitikani ni mukoddoni, ninga Yesu akoddiliye.​—Omwileri João 17:14.

Sathana anolabihedha kopolo dhaye ototelaga yeddelo yabure ni yowopiha. Nakoodda yeddelo ela, akwihu amodhaya obe amudhihu enoniteya ni enoonidda. (1 Pedro 4:3, 4) Bumwahaya nnafunihu nikalena yothoma yehu. Nnasakule ddi? Nnere wedda naathu enna odhivela ni Mulugu? Nnere wawiwelela malamulo aye athotho ni odhivela? Nerana ndo, nnere woniha wihina Sathana ahoota awogiliye wihina noonaga goyi nnomunyanyala Mulugu.​—Omwileri 1 Coríntios 6:9, 10; 15:33.

Odhivela Mulugu anniyena naathu ononivaha ebaribari yowihina obure ni goyi enodha emale. Ale enarumedha ndha enere okanna egumi yamukalakala veelaboni ya vati.​—Omwileri João 3:16.