Skip to content

Skip to secondary menu

Skip to table of contents

যেহোবাগী শাক্ষীশিং

মৈতৈলোন্

ঈশ্বরদগী লাকপা নুংঙাইবা পাউ!

 পন্দুপ ২

ঈশ্বর কনানো?

ঈশ্বর কনানো?

১. ঐখোয়না করিগী ঈশ্বর নীংগদৌরিবনো?

অশেংবা ঈশ্বরদি পুম্নমকপু শেম্বীবা মপু অদুনি। মহাক্কী অহৌবা লৈতে অমসুং কৈদৌনুংদা অরোয়বসু লৈরোই। (থাগৎ ঈশৈ ৯০:২) বাইবলদা য়াওরিবা নুংঙাইবা পাউগী হৌরকফমদি মহাক্নি। (১ তীমোথি ১:১১) ঈশ্বরনা ঐখোয়গী পুন্সি পীবিবা মরম্না ঐখোয়না মহাক্তবু নীংজগদবনি।—ফোংদোকপিবা ৪:১১ পাবিয়ু।

২. ঈশ্বরগী মশক-মওং কমদৌই?

মীওইবা অমত্তনা ঈশ্বর উখিবা লৈত্রি মরমদি মহাক্তি শকউদবনি। মসি হায়বগী অর্থদি মহাক্তি পৃথিবীদা লৈরিবা খুৎশেমশিং অসিদগী য়াম্না হেন্না থাক ৱাংই হায়বনি। (যোহান ১:১৮; ৪:২৪) অদুম ওইনমক, ঈশ্বরগী মতিক মগুনদি মহাক্কী খুৎশেমশিংদগী ঐখোয়না খঙবা ঙম্মী। খুদম ওইনা হায়রবদা, মহাক্না মখল কয়াগী হৈ-লৈ শেম্বীরে। মসিনা মহাক অসি নুংশিহৈবা অমসুং লৌশিং লৈবা ঈশ্বরনি হায়বা তাকই। অতিয়াদা লৈরিবা থা-থৱান্মিচাক কয়াশিং অসিনসু মহাক্কী শক্তিবু খঙহল্লি।—রোমীয় ১:২০ পাবিয়ু।

ঐখোয়না বাইবল পারগা ঈশ্বরগী মতিক-মগুনগী মরমদা হেন্না নীংথিনা খঙবা ঙমগনি। খুদম ওইনা, ঈশ্বরনা করি পাম্মী নত্রগা পামদে, মহাক্না মীশিংবু করম্না লোয়নৈ অমসুং তোঙান-তোঙানবা ফিভম কয়া লাকপদা মহাক্কী ৱাখলদা করম্না ফাওবগে হায়বদু বাইবলনা তাকই।—থাগৎ ঈশৈ ১০৩:৭-১০ পাবিয়ু।

৩. ঈশ্বরগী মমিং অমা লৈবরা?

যীশুনা হায়খি: “স্বর্গদা লৈবা ঐখোয়গী ইপা, নহাক্কী মিং অশেংবা ওইসনু।” (মাত্থি ৬:৯) ঈশ্বরগী তোঙান-তোঙানবা মিংথোন কয়া লৈরবসু মমিংদি অমখক লৈ। মশা মশাগী লোন্দা তোঙান-তোঙানবা খোন্থোক্তা পানৈ। মণিপুরী লোন্দদি “যেহোবা” হায়না পাই।—থাগৎ ঈশৈ ৮৩:১৮ পাবিয়ু।

বাইবল অয়াম্বদগী ঈশ্বরগী মমিং অসি লৌথোক্তুনা ইবুংঙো নত্রগা ঈশ্বর হায়বা মিংথোন্না শিন্দোকখ্রে। বাইবল ইখিবা মতমদদি, মসিদা ঈশ্বরগী মমিংসি ৭,০০০ মুক য়াওরম্মী। যীশুনা মীশিংদা ঈশ্বরগী মরমদা তাকপী-তম্বীরম্বা মতমদা ঈশ্বরগী মমিং খঙহল্লম্মী।—যোহান ১৭:২৬ পাবিয়ু।

 ৪. যেহোবানা ঐখোয়গীদমক খনবীবরা?

অসিগুম্লবা নুংশিহৈরবা মপা অমগুম্না ঈশ্বরনা ঐখোয়গী তুং-কোইনা ফনবা তৌবী

মীওইবনা নংলিবা অৱা-অনা কয়াসি উরগা ঈশ্বরনা ঐখোয়গীদমক করিসু খনবীদে হায়না লৌগদ্রা? মীওই খরনদি ঐখোয়বু চাংয়েং তৌনবা ঈশ্বরনা অৱাবা নংহনবনি হায়নৈ, অদুবু মদু অচুম্বা নত্তে।—যাকোব ১:১৩ পাবিয়ু।

ঈশ্বরনা মীওইবদা মশানা ৱারেপ লৌজনবগী নীংতম্বা পী। ঈশ্বর নীংগে নত্রগা নীংলোই হায়বা ইশানা লেপচনবগী নীংতম্বা পীবীরম্লিবসি থাগৎফম থোক্তব্রা? (যোশূৱা ২৪:১৫) অদুবু মীওই কয়ানদি লান্না ৱারেপ লৌদুনা অতোপ্পগী ফত্তনবা তৌই, মরম অদুনা অৱা-অনা কয়া নংই। অসিগুম্বা ৱায়েনচুমদবা কয়াসি উবদা যেহোবানা নুংঙাইতবা ফাওই।—মৈহৌরোন ৬:৫, ৬ পাবিয়ু।

যেহোবাদি ঐখোয়গী খনবীবা ঈশ্বরনি। ঐখোয়গী পুন্সিনা নুংঙাইনা হিংবদু মহাক্না পাম্মী। থুনমক মহাক্না অৱা-অনা অমসুং মসিবু থোকহল্লিবা মীওই পুম্নমক লৌথোকখ্রগনি। মরকসিদা, মহাক্না অকক্নবা মতম খরা অৱা-অনা নংবা য়াহনবগী অফবা মরমসু লৈ। লাইরিক অসিগী ৮ শুবা পন্দুপতা মরমদু করিনো হায়বা ঐখোয়না তমগনি।—২ পিতর ২:৯; ৩:৭, ১৩ পাবিয়ু।

৫. ঐখোয়না করম্না ঈশ্বরদা নকশীনজবা য়াগনি?

ঐখোয়না হায়জবগী খুত্থাংদা যেহোবাদা ৱারী শাদুনা মঙোন্দা নকশীনজনবা মহাক্না হায়রি। মহাক্না ঐখোয় খুদিংমক্কী খনবী। (থাগৎ ঈশৈ ৬৫:২; ১৪৫:১৮) ঐখোয়না ঈশ্বরবু পেলহন্নবা হোৎনবদা অশোয়বা কয়ারক য়াওই, মদু মহাক্না খঙবী অমসুং ঙাকপিনবা শেম শাদুনা লৈ। মরম অদুনা, ঐখোয়গী মপুঙ ফাদবা কয়া লৈদুনসু ঈশ্বরগা ঐখোয়গা নক্নবা মরী থম্বা য়াই।—থাগৎ ঈশৈ ১০৩:১২-১৪; যাকোব ৪:৮ পাবিয়ু।

যেহোবানা ঐখোয়গী পুন্সি পীবিবনি। মরম অদুনা ঐখোয়না অতোপ্পশিং নুংশিবদগী মহাকপু নুংশিবনা খৱাইদগী হেনফম থোকই। (মার্ক ১২:৩০) ঈশ্বরগী মরমদা হেন্না তমজদুনা, মহাক্না হায়বা ইন্দুনা ঐখোয়না মহাকপু নুংশি হায়বা উৎচবা য়াই। মদুনা ঈশ্বরদা হেন্না নকশীনজবা য়াগনি।—১ তীমোথি ২:৪; ১ যোহান ৫:৩ পাবিয়ু।